Nehemías 2

Artajerjes okauilij Nehemías ma uiya ne Jerusalén

Niman se tonajli, ipan on metstli itoka Nisán, ijkuak Artajerjes kuikaya sempoajli xipan ika tlamandarouaya ken rey, chika nejua niktekaya ivino ipan icopa, yejua onechitak ika sanoyej ninajmana. Pampa nejua xe kaman nechitaya tla ninajmana ixpan yejua, 2 onechtlajtoltij:

—Nesi sanoyej timajmana. ¿Tlinon mopan nochiua? Xnesi tla tikualo, pero nesi ika timajmana niman ika xmoyolika.

Ijkuak ijkon onechijlij, sanoyej oninomojtij, 3 pero ijkin oniknankilij:

—¡Nochipa xueyixtia toueyirey! ¿Kenijki tej, uelis nipaktias tla on ueyikalpan kampa toktôkej nouejkatajuan yokixoxotonijkej niman itsakuijlouan yokintlatijkej?

4 Kemaj on rey onechijlij:

—¿Kenijki uelis nimitspaleuis?

Ijkuak xe niknankiliaya, oninoueyikatsajtsilij ipan noyojlo itech Dios yejuan nemi iluikak, 5 niman kemaj ijkin oniknankilij on rey:

—Tla tejua noueyirey tikita kuajli niman tla tikneki tinechpaluis, nimitstlajtlanilia xnechtitlani Judá para oksejpa ma nikchijchiuati on ueyikalpan kampa toktôkej nouejkatajuan.

6 Inakastlan on rey yeuatikatka on reina. Kemaj on rey onechtlajtoltij:

—¿Keski tonajli tikonchiuas?¿Niman kamanon tiuajmokuepas?

Nejua onikijlij kamanon niuajnokuepas, niman yejua onechtitlan. 7 No onikijlij tla kita kuajli, ma nechinmaka amatlajkuiloltin para nikinmakas on gobernadores yejuan nemij kampaka ikalakiyan tonaltsintli de on río Éufrates, para ma nechkauilikan ma nipano hasta najsis Judá. 8 Niman no oniktlajtlanilij okse amatlajkuilojli para nikmakas Asaf, itekitkau on rey yejuan cuidarouaya on kojyoj, para ma nechmaka on kojtin yejuan ika tikinkuektlaliskej itsakuijlouan on torre yejuan onkaj nisiu iueyitiopan Dios, niman no, para tikuektlaliskej itepanchinan on ueyikalpan, niman para on kajli kampa nejua nichantis. Niman on rey onechmakak nochi tlen oniktlajtlanilij pampa Dios yejuan sanoyej kuajli iyojlo onechpaleuij.

9 On rey nouan okintitlan keskimej soldadostlayekankej yejuan yayaj ipan incaballos. Niman ijkuak otajsikej ne kampaka ikalakiyan tonaltsintli de on río Éufrates, on gobernadores onikinmakak iamatlajkuiloluan on rey. 10 Pero ijkuak Sanbalat, on horonita, niman Tobías, on tlapaleuijketl amonita okimatkej ika ompa yonajsik para nikimpaleuis on israelitas, sanoyej okualankej.

Nehemías okijitato itepanchinan on ueyikalpan Jerusalén

11 Ijkon tej, onajsik ne Jerusalén. Niman ijkuak nikuikaya yeyi tonajli ika ompa ninemiya, 12 onikis ijkuak tlayoua, niman nouan oyajkej keskimej tlakamej, pero xakaj onikijlij on tlen Dios okitlalij ipan noyojlo para nikchiuas ipampa Jerusalén. Niman san nejua niyetiaya ipan nopoloko, chika on sekimej nejnentiayaj. 13 Ipan on tlayoua oniuajkis ipan on ueyitsakuijlotl yejuan itoka Iueyikalakiyan on Ixtlauatl, niman oniaj kampaka onkaj on pila yejuan itoka Dragón niman kampaka onkaj on ueyitsakuijlotl yejuan itoka Tlajsolchapaniloyan. Chika ninejnemiya, nikitstiaya ken okixoxotonijkej itepanchinan on ueyikalpan Jerusalén niman ken otlatlakej iueyitsakuijlouan. 14 Kemaj oniaj kampaka onkaj on ueyitsakuijlotl yejuan itoka Amejli niman kampa onkaj Ipila on Rey, pero nopoloko xouel opanok ompaka. 15 Yejua ika, ijkuak sanken tlayoua katka, oniaj ipan on ixtlauatl niman oniktokak on ayajtoktsin para onikixtlaloj on tepanchinantli. Niman ijkuak yotlan nikita on tepanchinantli, oksejpa oninokuep ipan on ueyitsakuijlotl itoka Iueyitsakuijlou on Ixtlauatl para oksejpa onikalakito ipan on ueyikalpan.

16 On tlapaleuijkej xokimatkej kanon oniajka nion tlinon nikchijtinemiya. Nion on hebreos xitlaj nikinmijliaya. No ijki, xitlaj nikinmijliaya on tiopixkej, on uejueyixtokej, on tlapaleuijkej niman oksekimej yejuan nechpaleuiskiaj ipan on tekitl. 17 Kemaj ijkin onikinmijlij:

—Nemejuamej nenkimatstokej ika sanoyej teajman ken tikpanouaj, pampa ipan in ueyikalpan Jerusalén otlaxoxotonikoj niman itsakuijlouan okintlatijkej. Aman tej, ma titekitikan niman ma tikchijchiuakan oksejpa itepanchinan in ueyikalpan Jerusalén para makasa ma toka uetskakan.

18 Niman ijkuak yonikintlajtlajtouilij kenijki Dios sanoyej yonechpaleuij pampa sanoyej kuajli iyojlo, niman no onikinmijlij on tlen onechijlij on rey, yejuamej ijkin onechnankilijkej:

—¡Ma tikpeualtikan on tekitl!

Niman nochimej san seknek onoyolejkej para tekitiskej.

19 Pero ijkuak Sanbalat, on horonita, Tobías, on tlapaleuijketl amonita, niman Gesem, on árabe, okimatkej tlinon tikchiuaskej, otechpijpinauijkej niman ijkin tlamach otechijlijkej:

—¿Tlinon nenkichiuaj? ¿Tlen xipan nenkitasnekij on rey?

20 Pero nejua ijkin onikiminnankilij:

—Dios yejuan nemi ne iluikak techpaleuis. Tejuamej yejuan tiitekitkauan, oksejpa tikchijchiuaskej in ueyikalpan, niman nemejuamej xitlaj uelis nentechijliskej pampa nikan xitlaj nemoyaxka, nion xnenkimauistiliaj Dios nikan Jerusalén.