Ester
Sen ueyi iluitl yejuan okichiu on rey Asuero
1
Ijkin onochiu ipan on tonaltin ijkuak on rey Asuero tlamandarouaya ipan sen país yejuan kipiyaya 127 uejueyitlalpanmej yejuan pejtoya desde on país itoka India niman ontlamiya hasta on país Etiopía. 2 Niman yejua tlamandarouaya ipan on ueyikalpan itoka Susa.3 Ijkuak on rey Asuero kuikaya yeyi xipan ika tlamandarouaya, okichiu sen ueyi iluitl para nochimej iuejueyitlapaleuijkauan niman para nochimej on yejuan tlapaleuijkej katkaj kampa yejua tlamandarouaya. On iluitl katka para on soldadostlayekankej de on país Persia niman on país Media, niman on gobernadores niman on uejueyitlapaleuijkej yejuan ualeuayaj ipan on uejueyitlalpanmej. 4 On iluitl okichiu para okiteititij ika sanoyej miyek riquezas kipiyaya, ika sanoyej ueyixtikatka kampa tlamandarouaya, niman ika sanoyej kipiyaya poder. Niman on iluitl ouejkau tlajko xipan.
5 Ijkuak otlan on iluitl, on rey oksejpa okichiu okse iluitl yejuan ouejkau chikome tonajli. Okichiu ipan ikiauak on xochitlan de on palacio. Nochimej yejuan chantiyaj ipan on ueyikalpan Susa, yejuan uejueyixtikatkaj niman yejuan xuejueyixtikatkaj, okiminnotskej para ma uiyan ipan on iluitl. 6 Ipan on kiauak okimpilojkej kualtsitsimej cortinas yejuan istakej, niman azules. Okimpilojkej ikan mekamej de lino yejuan morados. Niman ipan on mekamej, okinkakalaktijkej anillos de plata para ika pilkayaj on cortinas, niman on mekamej sasalijtikatkaj ipan pilares de mármol. No ijki, onkatkaj ueueyakej sillones de oro niman de plata. Niman on piso tlachijchijtli katka ikan temej yejuan kualtsitsimej niman patiojkej. On temej katkaj de mármol yejuan istak niman tlilijki, niman no, okuikej concha nácar. 7 On vino yejuan koniyaj kinmakayaj ipan copas de oro yejuan nochimej sesentlamantikej katkaj. Niman on vino sanoyej mijmiyek kiminmakayaj, ijkon ken kitocaroua kitemakas sen rey yejuan kuajli iyojlo. 8 On rey okiminnauatij on tekipanojkej de on palacio para cada tlakatl ma koni kech vino yejua kinekis.
9 Sano ijkuakon, on reina Vasti no okichiu sen iluitl para insiuauan on tlakamej yejuan on rey okiminnots ipan ipalacio.
10 Ipan on ika chikome tonajli de on iluitl, on rey sanoyej pakiya pampa yokonika vino. Yejua ika, okintekuitlan on chikomemej eunucos* yejuan más kuajli kimpiyaliaya iyojlo: Mehumán, Bistá, Harboná, Bigtá, Abagtá, Zetar niman Carcás. 11 In tlakamej okiminnauatij on rey para ma kuikilikan on reina Vasti niman ma kitlalijtiu on kuaxochitl de reina para on itenotskauan niman iuejueyitlapaleuijkauan ma kitakan ika sanoyej kualtetsin, pampa on reina melauak sanoyej kualtetsin katka. 12 Pero on reina xokitlakamat on tlanauatijli yejuan on rey okititlan intechkopa on tlakamej yejuan más kuajli kimpiyaliaya iyojlo. Niman on rey sanoyej okualan. Niman ikan itlauel, 13 okiminnots on yejuan kixmatij leyes niman on nouikalistin, pampa nochipa ijkuak on rey itlaj kinekiya kimatis noso itlaj kinekiya ma nochiua, kiminnotsaya on yejuan kixmatij leyes para kimatiya tlinon kichiuas. 14 In yejuamej on tlakamej yejuan más nochipa kiminnotsaya on rey: Carsená, Setar, Admata, Tarsis, Meres, Marsená niman Memucán. In chikomemej uejueyitlapaleuikej yejuamej más uejueyixtikatkaj ipan on países Persia niman Media, niman yejuamej itlajtolpaleuijkauan katkaj on rey niman iuejueyitlapaleuijkauan katkaj ipan nochi kampa tlamandaruayaj. 15 Niman on rey ijkin okintlajtoltij:
—¿Tlen castigo tlanauatia on ley ma kiseli on reina Vasti pampa xokitlakamat notlanauatil yejuan oniktitlan intechkopa on eunucos ma kijlitij?
16 Niman Memucán ijkin okinankilij imixpan on rey niman iuejueyitlapaleuijkauan:
—Toueyirey, on reina Vasti xsan tejua omitspinajtij, yej no okimpinajtij nochimej on uejueyitlapaleuijkej niman nochimej on chanejkej ipan on uejueyitlalpanmej kampa titlamandaroua ken rey ,tejua Asuero. 17 On tlen okichiu on reina kimatiskej nochimej on siuamej niman no xok kintlakaitaskej iminueuentsitsiuan pampa kijtoskej: "On rey Asuero okitekuitlan on reina Vasti niman yejua xokitlakamat". 18 Ijkon tej, ijkuak iminsiuauan on mouejueyitlapaleuijkauan de in países Persia niman Media kimatiskej on tlen okichiu on reina, on no kichiuas para on siuamej xok kintlakaitaskej nion kintlakamatiskej inueuentsitsiuan, niman on tlakamej kualaniskej intech insiuauan. 19 Yejua ika tej toueyirey, tla tejua tikita kuajli, xtlali sen tlanauatijli niman ma kitlajkuiloltlalikan kampa tlajkuilolnestokej on oksekimej leyes de in países Persia niman Media para xkaman popoliuis. Niman on tlanauatijli ma kijto: "On reina Vasti xokaman uelis yas nixpan on rey." Niman tejua toueyirey okse siuatl xtlali reina yejuan más kimelaua. 20 Motlanauatil toueyirey, noneki noteijlis nochiuyan ipan on moueyitlalpan kampa titlamandaroua, para ijkon nochimej on siuamej kintlakaitaskej iminueuentsitsiuan maski san tlinon imintekiu, tla uejueyixtokej noso xuejueyixtokej.
21 On rey niman on iuejueyitlapaleuijkauan okuelkakkej on tlen okijtoj Memucán, niman on rey otlanauatij para ijki ma nochiua. 22 Niman okintitlan amatlajkuiloltin nochiuiyan ipan on uejueyitlalpanmej kampa tlamandarouaya. On amatlajkuiloltin okinmijkuilojkej ikan itlajtol cada ueyitlalpan niman cada kalpan kampa yejua tlamandarouaya. Ipan on amatlajkuiloltin otlanauatij para on tlakamej yejuamej ma tlayekanakan ipan iminchan niman nochimej ma tlajtokan itlajtol on tajtli.