Ester okitlalijkej reina
2
Sakin, ijkuak yopanok keski tonaltin, on rey Asuero otlauelseu niman okelnamik on siuatl Vasti niman on tlen okichiu. Niman no okelnamik on castigo yejuan otlanauatij ma kitlalilikan. 2 Kemaj on itlapaleuijkauan ijkin okijlijkej:—Toueyirey, nonekis ma mitsintejtemouikan ichpokamej yejuan kualtsitsimej niman yejuan xekaman notekaj iuan sen tlakatl. 3 Tejua toueyirey xkintlali yejuan kintejtemoskej on ichpokamej ipan on uejueyitlalpanmej kampa tejua titlamandaroua, niman ma kinuajuikakan ipan in ueyikalpan Susa, ipan on kajli kampa chantij on siuamej. Niman ompa ma kincuidaro on tlakatl Hegai eunuco* yejuan tejua kuajli tikpiyalia moyojlo niman yejuan ika nokaua kincuidaroua on siuamej. Yejua Hegai, más ma kinkualtsintili on ichpokamej. 4 Niman kemaj, on ichpochtli yejuan tejua más tikuelitas, yejua tiktlalis reina para kipatlas Vasti.
Ijkon tej, on rey sanoyej okuelkak on tlen okijlijkej, niman ijki onochiu.
5 Ipan on ueyikalpan Susa nemiya sen judío yejuan itoka katka Mardoqueo, yejuan ikoneu katka Jair, ixuiu katka Simei niman ika okpa ixuiu katka Cis, yejuan kisaya ipan itribu* Benjamín. 6 Ijkuak on rey Nabucodonosor de Babilonia okuikak Jeconías de Jerusalén para okinuikak ipan ipaís inuan oksekimej, no teuan okiuikak Mardoqueo. 7 Mardoqueo kipiyaya sen iprima yejuan xok kimpiyaya itajuan niman yejuan okinokonetij ijkuak itajuan omikkej. On ichpochtli ikan hebreo itoka katka Hadasa, niman no itoka katka Ester. Yejua, sanoyej ixkualtetsin katka niman no kualtetsin katka nochi itlalnakayo.
8 Ijkuak nochimej okimatkej itlanauatil on rey, okinsentlalijkej miyekej ichpokamej ipan on palacio ne ipan on ueyikalpan Susa. On ichpokamej okinmaktilijkej Hegai para yejua ma kincuidaro, niman Ester no ompa teuan nemiya. 9 Niman Hegai okitak ika Ester sanoyej kuajli ichpochtli niman más okipakaitak xken on oksekimej. Yejua ika, nimantsin opeu más kipaleuiya para okualtsintilijtiaj, niman okimakak tlakuajli yejuan más kuajli. No ijki, okinuikilij chikomemej siuamej yejuan más tekimatkej katkaj yejuan nemiyaj ipan on palacio para cuidarouayaj Ester, niman iminuan okuikak ipan sen kalijtik yejuan más kuajli ipan on kajli kampa chantij on siuamej.
10 Pero Ester xitlaj* okiteijlij ika tekoneu katka imintech on judíos, pampa Mardoqueo okijlij para maka kiteijlis. 11 Niman Mardoqueo mojmostla panouaya ixpan ikiauak on kajli kampa nemiyaj on siuamej, pampa kinekiya kimatis tla Ester kuajli nemi niman tla kuajli kipiyayaj.
12 Kuikaya se xipan para sen ichpochtli más kikualtsintiliayaj. Ipan on achtoj chikuasen metstli, kalauiliayaj aceite de mirra, niman ipan on okse chikuasen metstli kalauiliyaj ajuiyalistli niman sesekneka cremas yejuan kikuij on siuamej. Ijkuak tlamiya on tonaltin ika on ichpochtli kikualtsintiliayaj, yayaj ixpan on rey Asuero. 13 Sen ichpochtli kauiliayaj ma nokualnexti ken yejua kinekiya ijkuak kisaya ipan on kajli de on siuamej para yaya kampa nemi on rey. 14 Niman sen ichpochtli yaya ijkuak tlayoua ipan on palacio kampa nemiya on rey, niman uajmostla kualkan kipanoltiayaj ipan okse kajli kampa chantiyaj itlakpasiuauan on rey. Ompa on tlakatl itoka Saasgaz yejuan eunuco, kincuidarouaya on itlakpasiuauan on rey. Pero sakin*, on ichpochtli oksejpa uajlaya san tla on rey kitekuitlaniya ikan itoka, yejuan yejua kuelitaya.
15 Ijkuak Ester, (ikoneu Abihail, yejuan itioj katka Mardoqueo, niman yejuan okinokonetijka) okitocaroj yas ixpan on rey, san okitlalijtiaj on tlen okinauatij Hegai, on eunuco* yejuan san ika nokauaya kincuidaroua on siuamej. Ijkuakon, Ester ye nochimej kipakaitayaj on yejuan kitayaj. 16 Ester okuikakej ipan on palacio para yas ixpan on rey Asuero, ipan on ika majtlaktli metstli yejuan no kitokayotiayaj Tebet, ijkuak kuikaya chikome xipan ika tlamandarouaya on rey Asuero. 17 Niman on rey Asuero sanoyej okuelitak Ester, niman okinek ken xkaman yakaj okse siuatl kinekiya. Yejua más okitlajsojtlak xken on oksekimej ichpokamej. Yejua ika, okitlaliltij sen kuaxochitl ipan itsontekon para okalaktij reina, niman ijkon okipatlak Vasti. 18 Kemaj on rey Asuero okichiu sen ueyi iluitl para Ester. Ipan on iluitl okiminnots nochimej iuejueyitlapaleuijkauan niman nochimej yejuan tekiuajkej katkaj ipan ireino. Niman no, okitemoltij on impuestos ipan on uejueyitlalpanmej, niman okitetlayokolij miyek tlajtlamach* ken kitocaroua kichiuas sen rey yejuan kuajli iyojlo.
Mardoqueo okak ken okitlajtouilijkej kimiktiskej on rey Asuero
19 Ipan on tonaltin, ijkuak on ichpokamej kimpanoltiayaj ipan okse kajli kampa chantiyaj itlakpasiuauan on rey, Mardoqueo onnotlaliaya itech itsakuijlou ipalacio on rey. 20 Niman Ester sanken* xkiteijliaya kanon ualeuaya niman kanon tefamiliaj katka, ijkon ken Mardoqueo okinauatij. Ijki okichiu, pampa sanken* kitlakamatiya ken ijkuak itech nemiya.
21 Chika Mardoqueo yeuatikatka itech itsakuijlou on palacio, okak tlinon kijtouaya Bigtán niman Teres, on omemej tlakamej yejuan itlapeliuikauan katkaj on rey, yejuan tlajpiyayaj ikalakiyan on palacio. Yejuamej sanoyej kualaniyaj itechkopa on rey Asuero niman okitlajtouilikej kimiktiskej. 22 Niman ijkuak Mardoqueo okak ika on rey yokitlajtouilijkej para kimiktiskej, okijlij on reina Ester, niman on reina Ester okijlij on rey on tlen okijlij Mardoqueo. 23 Kemaj, on rey otlanauatij ma kitetlajtlajtoltikan tla melauak on tlen okijtoj Mardoqueo, niman ijkuak okimatkej ika melauak, on omemej tlapaleuijkej okinkechpilojkej. In tlen onochiu, okitlajkuiloltlalijkej ixpan on rey ipan on amamoxtli* kampa kijkuilouayaj nochi tlinon nochiuaya ipan on nación.