Job
Dios okauilij Job ma tlajyoui
1
Ipan on ueyitlalpan itoka Uz, nemiya sen tlakatl yejuan itoka katka Job. Yejua sanoyej kuajli nouikaya niman yolchipauak katka. Yejua kitlakaitaya Dios, niman xkuelitaya kitechiuilis tlen xkuajli. 2 Job okipix chikomej itelpoch niman yeyi ichpoch. 3 Yejua más rico katka ipan on ueyitlalpan kampaka ikisayan tonaltsintli. Kipiyaya chikome mil borregos, yeyi mil camellos, tlajko mil yuntas de uakaxtin niman tlajko mil siuapolokomej*. Niman no, kimpiyaya miyekej esclavos.4 On itelpochuan Job kuelitayaj tlaluichiuaj, niman nopatlatiayaj para cada se tlaluichiuaya ichan. Niman no kintekuitlaniyaj on yeyimej imikniuan yejuan siuamej para tlakuayaj niman tlaoniyaj san sekan. 5 Niman nochipa ijkuak tlamiyaj on tonaltin ika tlaluichiuaj, Job kintekuitlaniya ikoneuan, niman kichiuaya oración imimpampa para Dios ma kintlapojpolui imintlatlakol. Job nokuiteuaya kualkan saniman, para kimakaya Dios uentli yejuan nochi tlatla para cada se ikoneu. Nochipa ijki kichiuaya pampa ijkin kijtouaya: "Manin nokoneuan otlajtlakojkej, niman ipan iminyojlo itlaj xkuajli okijtojkej ixpan Dios".
6 Se tonajli ijkuak nonekiya uajlaskej on ángeles ixpan toTEKO, no teuan ouajlaj on ángel tlateixpanuijketl itoka Satanás. 7 Niman toTEKO okitlajtoltij:
--¿Kanon otonualeu?
Niman Satanás okinankilij:
--Oniualeu ipan on tlaltikpaktli, kampa onikistinen nochiuiyan.
8 Kemaj toTEKO okijlij:
—¿ Yotikitak notekitkau Job? Ipan nochi on tlaltikpaktli, xnemi okse ijki ken yejua. Yejua sanoyej kuajli tlakatl, yolchipauak, nochipa nechtlakamati, niman kichiua kanika para xkitechiuilia tlen xkuajli.
9 Pero on Satanás okinankili toTEKO:
—On melauak, pero Job mitstlakamati, pampa tikmaka nochi tlajtlamach* tlen kuajli. 10 Tejua sanoyej ticuidaroua. Xakaj tikauilia ma kipajsolo iuan nochi ifamilia, niman nochi tlen kipiya. Niman no tiktiochiua ipan nochi itekiu. Ipan on país, yejua más rico ikan yolkej. 11 Pero tla tejua tikuilis nochi tlin kipiya, tikitas ika yejua xmelauak mitstlakaita, yej mitsuijuikaltis.
12 Niman toTEKO ijkin okinankilij on Satanás:
—Kuajli tej, xkuili nochi tlen kipiya, pero maka itlaj tikchiuilis yejua.
Kemaj Satanás onejkuanij itech toTEKO.
13 Se tonajli, chika itelpochuan niman ichpochuan Job tlaluichiuayaj ichan inmikniu yejuan yenkuiyotl,
14 oyejkotets sen temachistijketl ichan Job niman okijlij:
—Tejuamej titlaxoponijtikatkaj ikan on uakaxtin, niman on polokomej tlakuajkuayaj ompaka nisiu. 15 Kemaj nimantsin otikitakej ompa yoajsikej on tlakamej sabeos. Niman okinmichtekej on yolkej niman okinmiktijkej on tlakeualtin ikan espadas. Sa nejua ouel oniuajcholojteu para onimitsmachistiko.
16 Sanken tlajtojtikatka on tlakatl ijkuak okse temachistijketl oyejkotets niman ijkin okijlij Job:
—Ipan cielo oualeu tlapetlanajli niman okintlatij on borregos iminuan on tlajpixkej. Sa nejua ouel oniuajcholojteu para onimitsmachistiko.
17 Sanken tlajtojtikatka on tlakatl ijkuak okse temachistijketl oyejkotets yejuan ika yeyi niman ijkin okijlij Job:
—On caldeos onoxexelojkej yexkantipan niman otechyejyeualojkej, niman okinmichtekej on camellos niman okinmiktikej on tlakeualtin ikan espadas. Sa nejua ouel oniuajcholojteu para onimitsmachistiko.
18 Sanken tlajtojtikatka on tlakatl ijkuak oksejpa okse temachistijketl oyejkotets niman ijkin okijlij Job:
—Motelpochuan niman mochpochuan tlaluichijtikatkaj ichan mokoneu yejuan yenkuiyotl. 19 Kemaj, oyejkotets sen ajakatl sanoyej chikauak yejuan ualeua kampaka xalpatlakan. Niman on ajakatl okitlajkal on kajli kampa nemiyaj mokoneuan, niman nochimej mokoneuan omikkej. Sa nejua ouel oniuajcholojteu para onimitsmachistiko.
20 Kemaj, Job ijkuak ijkon okak ouajnotelkets, niman ikan miyek ajmantli onotlakentetsayan niman onokuatexikaloj. Kemaj onotlakuantelkets para okimauistilij toTEKO. 21 Niman ijkin okijtoj:
—Ijkuak onechtlakatilij nonanaj, xitlaj* onikuajkik ipan in tlaltikpaktli, niman xitlaj* nikiktis ijkuak nimikis. ToTEKO onechmakak, niman toTEKO onechkuilij on tlin nikpiyaya. ¡Nikiyekteneua toTEKO!
22 Ijkon tej, maski Job nochi okipoloj, xotlajtlakoj pampa xitlaj* okixkomakak Dios.