2
Oyejkok on tonajli ijkuak nonekiya uajlaskej on ángeles ixpan toTEKO, niman no teuan ouajlaj Satanás on ángel tlateixpanuijketl 2 Niman toTEKO ijkin okitlajtoltij:—¿Kanon otonualeu?
Niman Satanás okinankilij:
—Ononualeu ipan on tlaltikpaktli, kampa onikistinen nouiyan .
3 Kemaj toTEKO okijlij:
—¿ Yotikitak notekitkau Job? Ipan nochi on tlaltikpaktli xnemi okse ijki ken yejua. Yejua sanoyej kuajli tlakatl, yolchipauak, nochipa nechtlakamati, niman kichiua kanika para xkitechiuilia itlaj tlen xkuajli.
4 Pero Satanás ijkin okinankilij toTEKO:
—Tla sen tlakatl xakaj kiteloua, yejua xitlaj kijtoua. Pero tla yakaj kimiktisneki, san tlinon kitemakasneki para nomanauis. 5 Yejua ika tej, tla tejua tiktitlanilis Job sen temojtij kokolistli, tikitas ika mixkoyejyejuas niman mitsuijuikaltis.
6 Niman toTEKO okinankilij Satanás:
—Kuajli, xchiuili Job tlin tiknekis, pero maka tikmiktis.
7 Kemaj Satanás onejkuanij itech toTEKO niman oyaj okitato Job. Niman okichiu para Job ma nayochpilo ikuetlaxyo* ipan nochi itlalnakayo desde ikxiuan hasta ikuanepantlaj. 8 Kemaj Job oyaj onotlalito kampa tlajsoltipan, niman okonkuik sen tepalkatl para ika notejchikiyaj. 9 Pero isiuau okijlij:
—¿Sanken tikneki kuajli timouikas? ¡Xkuijuikalti Dios niman xmiki!
10 Niman Job okinankilij isiuau:
—¡Siuatl, on tlen otikijtoj sen tontojyotl! Tla Dios tikseliliaj tlen kuajli, ¿tline* xno tikseliskej on tlen xkuajli?
Ijkon tej, maski Job sanoyej tlajyouiyaya, xotlajtlakoj ikan itlajtol.
On itlajsojkaikniuan* Job okitlajpalotoj
11 Job kipiyaya yeyi itlajsojkaikniu yejuan ijkin imintoka katka: Elifaz, yejuan chanej* katka ipan on ueyitlalpan de Temán; Bildad, yejuan chanej* katka ipan on ueyitlalpan de Súa; niman Zofar, yejuan chanej* katka ipan on ueyitlalpan de Naamat. Ijkuak in tlakamej okimatkej on tlen xkuajli ipan onochiu Job, okinojlijkej para yaskej san sekan kontlajpaloskej Job, para konyoltlaliskej niman konyolchikauaskej. 12 Niman ijkuak ye ajsitikatkaj yejuamej okontakej Job de uejka pero xokixmatkej. Kemaj ijkuak okitakej ika melauak yejua, opeu chikauak chokaj. Kemaj ikan ueyi ajmantli, onotlakentetsayankej niman okixinijkej tlajli tlakpak, niman no okinoxinilijkej tlikonextli ipan intsontekon para okiteititijkej ika sanoyej najmanaj. 13 Kemaj onotlalijkej iuan Job ipan tlajli, niman chikome tonajli niman chikome yeuajli ompa ikon nemiyaj, pero nion se tlajtojli xkijtouayaj, pampa kitayaj ika Job sanoyej tlajyouiyaya.