Job xpaki ika on tlinon ipan nochiua
3
Más sakin*, Job otlajtoj, niman okitlauelij on tonajli ijkuak yejua otlakat.Job okinnots itlajsojkaikniuan*
2 Inkin Job okimijlij itlajsojkaikniuan:
3 "¡Niktlauelia on tonajli ijkuak onitlakat! ¡Niktlauelia on tlayoua ijkuak oninoyolitij ijtik nonanaj! 4 ¡Kuajli yeskia tla on tonajli nokuepaskia tlayoua, niman Dios kichiuaskia maka ma tlanesi, para ijkon, on tonajli xteuan tlapouajli yeskia! 5 ¡Kuajli yeskia tla sen tilauak tlayouajlotl kitlayouatiliskia on tonajli, noso sen tilauak moxtli yejuan sanoyej tlilijki* kitlapachoskia, noso itlaj temojtij kitlapachoskia on tonajli! 6 ¡Kuajli yeskia tla on tlayoua popoliuiskia ipan on tlayouajlotl niman on tonajli xteuan kipouaskiaj ipan on metstli niman ipan on xipan! 7 ¡Kuajli yeskia tla on tlayoua xakaj tlakatiskia, niman xakaj pakatsajtsiskia! 8 ¡Kuajli yeskia tla on tlakamej yejuan kichiuaj tetlatejtemouilistli kitlaueliskiaj on tonajli, on yejuan uelij kitlachaltiaj on temojtij yolki Leviatán. 9 ¡Kuajli yeskia tla xpetlaniskiaj on sitlalimej ijkuak ye uajtlanestiu. Kuajli yeskia tla on tonajli xok tlanesiskia ken nochipa kichaj ma tlanesi. Kuajli yeskia tla xnesiskia on tlastajlotl ijkuak ye uajtlanestiu! 10 Niktlauelia on tlayoua yejuan onechkauilij ma nitlakati pampa aman nikan nitlajyouijtikaj*.
11 "¿Man tline xonimik ijtik nonanaj, noso tline xonimik ijkuak onitlakat? 12 ¿Hasta tline onen on siuatl yejuan onotlakuantelkets para onechajsik ijkuak onitlakat? ¿Niman tline onen yejuan onechchichitij? 13 Tla nejua nimikiskia, maniskia, noyolika nikochtok, amantsin noyolika ninoseuijtiaskia 14 iminuan on reyes niman iminuan on tekiuajkej yejuan okichijchijkaj uejueyimej pirámides. 15 Noso maniskia ninemi inminuan on yejuan tlamandarouaj, yejuan kitemiltiaj imimpalacios ikan oro niman plata. 16 ¿Tline xonechtôkakej ken kintôkaj on konetsitsimej yejuan san uetsij, noso kenon konetsitsimej yejuan mikij ijkuak xe tlakatij? 17 Ipan on tlalkontli, xok tepajsolouaj on xompayejyeuamej, niman on yejuan siautokej, ompa noseuiyaj. 18 On yejuan tsakutokej ipan cárcel, ompa kinextiaj yolseuilistli, niman xok kakij ken tetsajtsilia on tlakatl yejuan tlatekitiltia. 19 Ompa, nemij on uejueyixtokej niman on xuejueyixtokej, niman ompa, on yejuan esclavo katka, xok kipiya iteko.
20 "¿Tline Dios kauilia ma tlakati on yejuan san uajtlajyouiya? ¿Tline kimaka nemilistli on yejuan xkipiya paktli ipan inemilis? 21 Yejua kinekisia ma miki, niman kitejtemoua on mikilistli ken kitejtemoskia sen tesoro yejuan kuajli iyantikaj, 22 Ipakilis sen tlakatl yejko, ijkuak yejua yau ipan itlalkon. 23 Dios nochiuiyan kitsakuilia iojui on tlakatl, niman yejua xok kimati kanika yas. 24 Nejua xok nitlakua, yej sa ika ninemi ninejeltia; nochokilis sa ken atl toyaui. 25 Nochi on tlen nikmakajsiya, yejuan sanoyej nechmojtiaya, nopan youajlaj. 26 Nejua xok noyolika ninemi, xok nikpiya yolseuilistli, nion xok ninoseuiya, yej sa ikan nemojtijli ninemi."