Elifaz tlamach kixkomaka Job
4
Kemaj Elifaz, on temanita, ijkin okinankilij Job: 2 "¿Tikualanis tla nimitsnotsas? Pero xnikxikoua tla xnimitsnankijlia.3 "Tejua, miyek tlakatl tikmachtiaya, niman tikinyolchikauaya yejuan xyochikajkej. 4 Tejua, tikinyoleuaya para ma nokuiteuakan on yejuan uetsiyaj, niman tikimpaleuiyaya para maka uetsikan on yejuan uetsisnekiyaj. 5 Pero aman, ijkuak tejua titlajyouiya, uej xtikxikoua, niman xtikmati tlinon tikchiuas. 6 Tla nochipa tiktlakamati Dios niman nochipa timouika kuajli, ¿tline xok tikpiya nochi moyojlo yejua itech?
7 "Xkixtlalo in. ¿Kamanian onen yakaj, yejuan xkipiyaya tlajtlakojli niman okipoloj inemilis. 8 Nejua yonikualitstiaj ika on yejuan kitôkaj tlajtlakojli niman xompayejyejualistli, no yejua kipixkaj on tlen kitôkaj. 9 Dios san kinmilpitsa ikan itlauel niman yejuamej popoliuij. 10 Maski sanoyej nanalkaskej ken itlaj on leones niman sanoyej kualaniskej, Dios kinkamatsakuas niman kintlantetlajtlapanas. 11 Mikiskej kenon leones yejuan xouel okajsikej sen yolki para kikuaskej, niman inkoneuan nosesemanaskej.
12 "Onechijlijkej sen yemanka tlajtojli. Pampa sanoyej onechyemankaijlijkej, sa axkan onikak. 13 Tlayoua, ijkuak nochi tlakatl kochi, onikpix sen temojtij temiktli. 14 Sanoyej oninomojtij, nochi noomiyouan kuekuetlakayaj. 15 Sen ajakatl opanok ipan noxayak, niman hasta onechtlaloj sekutli. 16 Niman ipan on ajakatl nemiya akinonon, pero xonikitak ixayak; san onikitak itlaseuajlo. Kemaj onikak akinonon otlajtoj yoliktsin, niman ijkin okijtoj: 17 '¿Manin nemi sen tlakatl yejuan xtlajtlakolej ixpan Dios? ¿Manin ueli chipajkanemi ixpan on akin okichijchiu?'
18 "Dios xkitlalia iyojlo intech on ángeles yejuan itekitkauan. Dios kita ika hasta iángeles itlaj kimpoloua. 19 ¡Tla ijkon, nion achijtsin xuelis kitlalis iyojlo itech sen tlakatl yejuan semi xkojtik, kenon kajli de sokitl yejuan okitelketskej ipan tlalkuechtli niman kemaj tepaxiui ken itlaj pochauistli! 20 On tlaltikpaktlakamej kuajli nemij ijkuak kualkan, pero tlayoua mikij. Ijkon yauij nion xitlaj nesi tla nikan nemiyaj. 21 Inemilis sen tlakatl tlami ken ijkuak kitekij ikpatl. Ijki miki, qniman xkaman kipiya tlamatkilistli."