5
"Xtsajtsi Job niman tikitaskej tla yakaj mitsnankilia. ¿Katleua ángel tiktlajtlanilis para mitspaleuis? 2 On yejuan tontos niman yejuan xtlamatkej sano yejuamej nomiktiaj ikan chichiyalistli niman nexikojli. 3 Nejua nikitani ken peua ricojtitiu sen tonto, pero ikal nimantsin xoxotoni. 4 Niman ikoneuan xkipiyaj akinon kinmanauis. Imintech on tekiuajkej yejuan teyolkuitiaj, xnemi akinon impan tlajtoua. 5 On tlen kipixkaj, kinkuiliaj on yejuan apismikij, kominkuiliaj maski kampa uitstlaj, niman iminriquezas, kiminnexikolkuiliaj on yejuan amikij. 6 On tlen xkuajli, xitsmolini ipan tlaltipan. On tlen tepajsoloj, xuajkisa ijtik tlajli. 7 No ijki ken ipan on tlitl kisa on tlimochitl. On tlaltikpaktlakamej sano yejuamej impan kuajkij on tlen tepajsoloj.8 "Tla nejua ijkon ninemiskia ken tejua tinemi, nejua ninokuepaskia itech Dios, niman nochi nikauaskia ipan imauan on tlen nechajmana. 9 ¡Yejua kichiua miyek tlajtlamach* tetlatlachaltij, niman milagros yejuan xakaj ueli kajsikamati! 10 Yejua kuajtitlani on kiautli ipan in tlaltikpaktli, niman yejua ika katekiya on tlatoktli. 11 Yejua kichiua para ma kintlakaitakan on yejuan xnoueyimatij, niman kinyoltlalia yejuan najmanaj. 12 Yejua kintlamachilispoloua on yejuan sanoyej kimatij ken tlakajkayauaj, para maka ma kichiuakan tlen kinekij. 13 Yejua kichiua para on yejuan kimatij ken tekajkayauaj xuelij kichiuaj ken kinekij, niman sano yejuamej impan uetsi on tlen xkuajli kitechiuilisnekij. 14 ¡Maski tlajokaj, yejuamej xkitaj kanon kistinemij, niman ijkuak tlakualispan yejuamej majmayautinemij ken ijkuak tlayoua! 15 Dios kinmanauiya ipan mikilistli on mayankej, niman kinmanauiya on yejuan tlajyouiyaj intech impoder on xkuajkualtin tlakamej. 16 On yejuan mayankej, kichaj Dios yejua ma kinmanaui, ¡Dios yejua kinkamatsakua on xkuajkualtin tlakamej!
17 "¡Miyek pakilistli kipiya on tlakatl yejuan Dios castigaroua para ma nokuektlali! Yejua ika tej, tejua maka xkualani tla Dios, yejuan nochi ueli kichiua, mitscastigaroua. 18 Tla yejua kichiua xmokoko, sano yejua mitspajtis. Tla mitsmailia chikauak, sano yejua mitstejkuilis kampa mitskokoua. 19 Yejua nochipa mitsmanauis para maka itlaj mopan nochiuas, niman nochipa mitspaleuis para maka kaman ajsis motech on tlen xkuajli. 20 Ijkuak onyas apistli, mitsmanauis para maka timikis ikan apistli, niman ijkuak onyas guerra, mitsmanauis de on mikilistli. 21 Ijkuak yakaj mitstlauelis, Dios mitspaleuis. Xkipiya tline timomojtis pampa on tlauelijli xnochiuas. 22 On apistli niman on miyek tlajtlamach tlajyouilistli san tikinuejuetskilis, niman on tepeyolkej tekuanimej, xtikinmakajsis. 23 On temej niman on tepeyolkej tekuanimej, xmitspajsoloskej ipan mocampo. 24 Ipan mochan nochipa moyolika tinemis, niman ijkuak tikimpouas moyolkauan, tikitas ika xse poliui. 25 Tikimpiyas miyekej mokoneuan niman mouejkakoneuan, ijkon yeskej ken miyek xojtli onkaj ipan campo. 26 Ijkuak tiueuentsintias, sanken* tichikajtias, kenon trigo yejuan yochikau imiyauayo.
27 "Tejuamej yotikitakej ika melauak ijki. Xkaki tlen nimitsijlia, niman sano tejua xkita ika melauak ijki."