Job okinnankijlij Elifaz
6
Kemaj Job ijkin okinankilij Elifaz: 2 "Tla nochi on tlen nechajmana niman on tlen xkuajli nopan nochiua, kitemachiuaskiaj ipan sen balanza, 3 más yetik yeskia xken on xajli yejuan onkaj ipan mar. Yejua ika san onisikatlajtojtets. 4 ToTEKO, yejuan nochi ueli kichiua, nopan yokitlalaktij iflechas, niman inveneno on flechas yonechnokenti ipan nochi notlalnakayo. Sanoyej yoninomojtij pampa Dios nechuijsoki. 5 ¿Tlen tsajtsi on poloko* tla kipiya tlen kikua? ¿Noso tsajtsi on uakax tla kipiya sakatl para kikua? 6 ¿Akinon uelis kipakakuas itlaj tla xpoyek? ¿Tikuelitas tikuas iistakyo on tototetl tla xiksik? 7 Aman tej, on tlen xkaman niknekiya nikuas, aman yejua notlakual.8 "¡Niknekisia Dios ma nechkaki, niman ma nechmaka tlinon más nikneki nikpiyas! 9 ¡Niknekisia Dios ma nechmikti niman ma kipopolo nonemilis! 10 Maski ninokokoua, noyolika ninokauaskia tla amanaman nimikisia. Nejua nochipa niktlakaita ileyes Dios, yejuan yektli 11 Xuelis nikxikos in kokolistli pampa xok nikojtik nion xnikpiya tline sanken* ninemis. 12 Nejua xnichikauak ken sen ueyi tetl, nion xnichikauak kenon bronce. 13 Xniueli ninopaleuiya sano nejua,
nion xnikpiya akinon nechpaleuis.
14 "Sen tetlajsojkaikniu yejuan tlajyouiya, noneki kiselis tetlajsojtlalistli; maski yejua kamanian kitlalkauiya toTEKO yejuan nochi ueli kichiua. 15 Pero notlajsojkaikniuan xok kinekij nechpaleuiskej. Yejuamej no kenon ríos yejuan uakij. 16 Yejuamej kenon atl moyauak, yejuan uajnelijtiu iuan hielo niman nieve. 17 Pero on hielo pâti, niman ijkuak tona on atl uaki, niman on ayajtokmej popoliuij. 18 Yejua ika, on yejuan uejka yauij on tlasemanaj, ijkuak xkinextiaj atl ipan on xalpatlajkan; xok kimatij kanika yaskej, niman ompaka mikij. 19 On yejuan tlasemanaj, chanejkej Tema niman Sabá; kintejtemouaj on ayajtoktsitsimej niman kinekiskiaj ma kinnextikan. 20 Pero ijkuak ompa ajsij, san tlen kuajchiuaj pampa kominnextiaj youakkej, niman sanenkaj uejka nejnemij. 21 Niman nemejuamej no ijki. Nemechita kenon ayajtoktsitsimej yejuan xnechmakaj tlamachalistli. Nenmomojtiaj pampa sanoyej xkuajli tlen nopan nochijtikaj. 22 Pero nejua xitlaj* nemechtlajtlanilia, nion xnemechtlajtlanilia tomin para makasa nitlajyoui. 23 Xnemechtlajtlanilia xnechmanauikan itech sen notlauelikniu, noso intech on yejuan teuijsoktinemij.
24 "Xnechmachtikan, niman xok ninauatis, xnechijlikan tlinon xkuajli onikchiu. 25 Nejua, xnikualanis tla nennechijliaj on tlen xkuajli onikchiu, pero nenmejuamej nennechijliaj tlen xmelauak. 26 Nemejuamej nenkinemiliaj hasta xok nikmati tlen nikijtoua, niman notlajtol ken itlaj ajakatl yejuan san panoua. 27 ¡Yonikitak ika nemejuamej hasta uelis nenkinamakaskej sen iknokonetl noso sen nemotlajsojkaikniu para esclavo yes! 28 Aman xnechitakan nixko, niman xnechijlikan tla nemechkajkayaua. 29 Makasa xkijtokan ika nikpiya tlajtlakojli. Yej xkijtokan ika melauak niyolmelajki. 30 ¿Nenkinemiliaj sen nitlakajkayajketl yejuan xkimat on tlen melauak niman on tlen tlakajkayaualistli?