7
"Ipan in tlaltikpaktli, iminnemilis on tlaltikpaktlakamej kenon soldados yejuan chikauak tekitij. 2 No ijki ken sen esclavo yejuan kinekiskia ma kipiya kanon notonalseuis, niman ken sen tlakeuajli yejuan kicha ma kitlaxtlauilijtetsikan. 3 Miyek metstli hasta ontlatlami yonitlajyouij, cada tlayoua hasta ontlatlami, ninokokojtok. 4 Ijkuak ninoteka para nikochi, machisti xkaman tlamis, niman nikijtoua: "¿Kamanon ninokuiteuas?" Nochi tlayoua ninokuejkueptok hasta ijki tlanesi. 5 Notlalnakayo tentikaj ikan okuilimej niman ikan itakajlo. Nokuetlaxyo nochiuiyan tsajtsayani niman temalkisa.6 "Nonemilis isijkapan ye tlantikaj. No ijki ken isijkapan yau on kojtli yejuan ika kichijchiuaj tela, niman xok nikcha nipajtis. 7 Xkelnamiki noDios ika nonemilis ken itlaj ijyotl, niman xokaman kipiyas pakilistli. 8 Xakaj oksejpa uelis nechitas. Ijkuak tejua tinechixkechis, nejua xok ninemis. 9 Ijkon kenon moxtli san panoua niman popoliui, on yejuan miki no xokaman uajkisa ipan itlalkon. 10 Xkaman nokuepas ichan, niman ichanchanejkauan xok kaman kitaj.
11 "Yejua ika, ika onkaj nitlajtos. Pampa ninokokoua niman ninajmana, nikijtos nochi tlen xkuajli nopan nochijtikaj. 12 ¿Tlen, nejua nión temojtij yolki yejuan nemi ijtik mar? ¿Yejua ika tikneki tinechkamasalos? 13 Ijkuak niknemilia ika ipan notlapech ninoseuis, niman ijkon achi nikelkauas ika nitlajyouiya, 14 tejua yej tinechkochmojtia ipan notemik; ¡tlamach niktemiki tlen temojmojtij! 15 Más kuajli yeskia tla tinechkechmiktiskia. On mikilistli más kuajli xken in nonekokol yejuan nikpiya ipan nonemilis. 16 !Nejua xok nikxikoua in tlajyouilistli, niman xok nikneki ninemis¡ !Ma ijki, xnechtlalkaui; nonemilis xokuitlaj kijtosneki¡
17 "¿*Tlen tikita sanoyej ueyixtikaj sen tlaltikpaktlakatl, yejua ika itech tiktlalia moyojlo niman mojmostla ipan titlacha? 18 ¿Tline tikixtlaloua mojmostla tlinon kichiua, niman sa chika tiktlatlata? 19 ¿Tline xtinechixkaua nion achijtsin, nion para niktolos nokualak? 20 Tla onitlajtlakoj, ¿tlinon xkuajli nimitschiuilia tejua akin tikintlapiya in tlaltikpaktlakamej? ¿Tline nejua tinechtlalia para tinechmotla ika moflechas? ¿Tlen itlaj ika nimitspajsoloua? 21 ¿Tline xueli tinechtlapojpoluilia notlajtlakol? ¿Tline xuelis tinechtlapojpoluilis on tlen xkuajli onikchiu? Saniman nechtekaskej ipan notlalkon. Tinechtejtemos, pero xok nikan ninemis."