Bildad tlamach okixkomakak Job
8
Kemaj Bildad, on suhita, ijkin okijtoj: 2 "¿Hasta kamanon sanken* ijkon titlajtojtias? Mokamak hasta ken chikauak ajakatikaj. 3 Dios, yejuan nochi ueli kichiua, xkaman kijtlakoua on tlen kuajli nion on tlen melajki. 4 Kas mokoneuan otlajtlakojkej ixpan Dios. Yejua ika, Dios okincastigaroj ken kimelauaj. 5 Xtejtemo Dios, yejuan nochi ueli kichiua, niman xtlajtlanili ma mitsikneli. 6 Tla tejua timouika ikan yolchipaualistli niman ikan melajkanemilistli, yejua oksepa mitspaleuis, niman mitsmakas *sen chanyotl* yejuan mitsmelaua* tikpiyas. 7 Tikitas ika on riqueza yejuan tikpiyas, más miyek yes xken on yejuan achtoj tikpiyaya.8 "Xkintlajtolti on yejuan más ueuentsitsimej kenijki onouikakej iminachtojtajuan. 9 Tejuamej semi xitlaj* tikmatij pampa más tikokonej, niman tonemilis san panotikisa ipan in tlaltikpaktli ken sen tlaseuajlotl. 10 Pero on ueuentsitsimej uej kipiyaj tlinon mitsijliskej, niman mitstlajtlajtouiliskej miyek tlen yejuamej kimatij.
11 "On akokojsakatl niman papiro yejuan no ijki tlajtlacha, san noskaltiaj ijtik atl, 12 pero maski xkintsontekij niman xojxoki, ijkuak on atl uaki, más nimantsin uakij xken okseki xojtli. 13 Ijkon tej, on xompayejyeuamej no ijki imimpan nochiua. On yejuan kelkauaj Dios imintlamachalis popoliuij. 14 On tlen ipan kitlaliaj iminyojlo para xitlaj* imimpan nochiuas, ken iikpayo sen tekatsauajli. 15 Kinekiskej nokitskiskej ipan on ikpatl, pero nimantsin tekotonis, noso kinekiskej notlatsaskej ipan on tekatsauajli, pero on tekatsauajli no xkixikos. 16 On xompayejyeuamej ken itlaj on xkuajli xojtli yejuan selistikaj, niman ijkuak kima tonaltsintli, más nomayeualoua niman kitemiltia nochi on xochitlan. 17 On xkuajli xojtli noneluayotia ipan temej, niman kuajli nokitskia ipan temej. 18 Pero tla yakaj kuiuitla kampa onkatka, sakin* xakaj kimati tla ompa onkatka sen xkuajli xojtli. 19 Ijkon tej, on xkuajli xojtli ijki popoliui, niman kemaj ompa noskaltiaj okseki plantas.