9
Kemaj Job ijkin okinankilij Bildad: 2 "On melauak tlen tikijtoua, pero ¿kenijki sen tlaltikpaktlakatl noteneuas melajki ixpan Dios? 3 Xakaj uelis nokamauijsokis iuan Dios, pampa tla Dios itlaj se mil tetlajtoltis, xakaj uelis kinankilis nion se. 4 Dios sanoyej ueyixtikaj pampa kipiya sanoyej ueyi poder niman tlamatkilistli*. ¿Akinon uelis kixnamikis niman xitlaj* ipan nochiuas?5 "Ijkuak Dios kualani, kimejkuania on tepemej, niman xakaj ueli kimati ken kichiua. 6 Yejua kichiua para ma uiuixka in tlajli niman para ma kuekuetlaka ipeuyan. 7 Tla kinauatia on tonaltsintli maka ma kisa, yejua xkisa, niman tla yejua kinnauatia on sitlalimej maka ma petlanikan, yejuamej xpetlanij. 8 Yejua xakaj okipaleuij para okichijchiu on cielo, niman yejua kiteltia ikoxonajlo on mar. 9 Yejua okintlalij on grupos de sitlalimej niman ijkin tojtokayejkej: se itoka Osa Mayor, okse itoka Orión, okse itoka Pléyades, niman okse itoka la Cruz del Sur. 10 ¡Yejua kichiua miyek uejueyi tlajtlamach* yejuan tetlatlachaltij, tlajtlamach yejuan xakaj ueli kipoua!
11 "Tla Dios panoskia notech, nejua xueliskia nikitaskia. Tla yejua nejkuania notech, nejua no xueliskia nikitaskia. 12 Tla yejua itlaj kitekuilis, xakaj uelis kijlis: '¿tline tiktekuilia?' Niman xakaj uelis kitlajtoltis: '¿tlinon tikichiua?' 13 Ijkuak Dios kualani, xnimantsin tlauelseui, niman hasta on yejuan más noueyimatiyaj, notlakuantelketsaj ixpan.
14 "Tla ijkon tej, xnikmatis ken niknankilis, nion xnikmatis tlinon nikijlis para nikixnamikis 15 Maski nejua niyolchipauak yeskia, xniueliskia niknankiliskia. Yejua noteyolkuitijkau, niman san uelis niktlajtlanilis ma nechikneli. 16 Maski niktekuitlaniskia niman yejua uajlaskia, nikuitia, xkinekiskia kakis on tlen nikijliskia. 17 Yej más nechajtitlanilis tlajyouilistli, niman kichiuaskia para más ma ninokoko maski xitlaj* tlajtlakojli nikpiya. 18 Nechtemiltiskia ikan miyek ajmantli, hasta xok niueliskia nijyokuiskia. 19 Tla tikixtlaloskej akinon más kipiya poder, tikitaskej ika Dios yejua más kipiya poder. Tla tiknekisej tikuikaskej kampa teyolkuitiua, ¿akinon uelis kichiuas para yas kampa kiteixpanuiyaj? 20 Maski nejua kuajli niyolmelajki yeskia niman sanoyej niyolchipauak yeskia, yejua kitenkixtisia ika kemaj nitlajtlakolej.
21 "Maski xitlaj* tlajtlakojli nikpiya, xitlaj* ika nechpaleuiya, pampa nejua xok nikneki más ninemis. 22 Nejua nikita ika para Dios nochi sano ijki. Ijkon ken kimpopoloua on yejuan tlajtlakolejkej, no ijki kimpopoloua on yejuan xtlajtlakolejkej. 23 Ijkuak itlaj xkuajli nochiua niman on tlakamej san amanamantsin mikij yejuan xkipiya tlajtlakojli, Dios uetska ipampa imintlajyouililis. 24 Ijkuak in tlaltikpaktli kinoyaxkatiaj on xompayejyeuamej, Dios kinmixtlapachoua on teyolkuitijkej. Tla xejua kichiua, ¿tla ijkon, akinon?
25 "Nonemilis san panotikisa, niman nion xnikixmat on pakilistli. 26 Nonemilis ken sen barco yejuan san panotikisa pampa xyetik, ken sen águila yejuan uajnopílojtikisa para kajsi on yolki yejuan kikua. 27 Maski nikchiua kanika para nikelkauas on tlen nechajmana niman nikteititisneki ika nipaki, 28 on tlen nechkokoua oksejpa nechmomojtia. Nejua tej, nikmatstikaj ika Dios xkineltoka ika niyolchipauak. 29 Tla yejua ye nechpiya ken sen tlajtlakolej, tla ijkon, xitlaj* ika nechpaleuis maski kuajli ninouikas. 30 Maski ninaltiskia ikan xapoj, niman kuajli ninomapajpakaskia, 31 Dios nechpolaktis ipan sokiatl, niman hasta notlaken nechtlajyelitas.
32 "Nejua xniuelis nikixnamikis Dios ken nikixnamiki sen tlakatl, nion xuelis nikuikas kampa nemij on tekiuajkej yejuan teyolkuitiaj para yejuamej kijtoskej tla nitlajtlakolej noso ka. 33 ¡Kuajli yeskia tla totech nemiskia sen teyolkuitijketl, yejuan techijliskia tlinon noneki tikchiuaskej, 34 yejuan kijliskia Dios makasa ma nechcastigaro, niman makasa ma nechmomojti! 35 Niman ijkon, nejua xnikmakajsiskia niknotsas, pampa ixpan xitlaj* tlajtlakojli nikpiya.