Job okinankijlij Bildad:
10
"¡Nejua xok nikneki ninemis! Yejua ika, nikijtos nochi tlen xkuajli nopan nochijtikaj, niman nikijtos nochi ika sanoyej ninoyolkokoua.2 Nikijlis noDios: '¡Maka xnechtlajtlakolmaka! ¡Yej xnechijli tline tikualani nouan!3 Maski sano tejua otinechchijchiu xtinechtlajsojtla, yej tinechtlajyouiltia, niman on xkuajkualtin tlakamej tikinkauilia ma nechchiuilikan tlen xkuajli.4 ¿Tlen tejua no ijki tikita itlaj kenon tlaltikpaktlakamej kitaj?5 ¿Tlen monelis no ijki achijtsin, ken iminnelis tlaltikpaktlakamej?6 Ijkon nimitsijlia, pampa tiktejtemoua tla onikchiu tlen xkuajli, noso tla itlaj tlajtlakojli nikpiya,7 maski kuajli tikmatstikaj ika nejua xitlaj* tlajtlakojli nikpiya, niman xakaj ueli nechmanauiya itech mopoder.
8 " 'Tejua otinechchijchiu ika momauan, ¿niman aman tikneki tinechmiktis? 9 Xkelnamiki tej, ika otinechchijchiu ikan tlalajmojli ¿Aman tej, oksejpa tinechkuepas tlalkuechtli? 10 Otikchijchiu notlalnakayo, ken kichijchiuaj on queso ijkuak ixauetsi on leche. 11 Ikan tlaluamej otikinsasaloj noomiyouan, niman otinechtlalilij nonakayo niman nokuetlaxyo. 12 Otinechmakak nemilistli niman otinechtlayokolij tetlajsojtlalistli*, niman sanken* ninemi pampa tejua tinechcuidaroua.
13 " 'Pero aman nikmati ika yoknemilijka tinechchiuilis tlen xkuajli: 14 tejua tinechitstikakta tla nitlajtlakos, para ijkon, tikpiyas tlinon ika tinechtlajtlakolmakas. 15 Tla nikpiya tlajtlakojlij, tla ijkon, semi nixpolijtikaj, niman tla xnikpiya tlajtlakolij, no xitlaj* ika nechpaleuiya pampa tinechpiya ipan pinaualistli niman ipan tlajyouilistli. 16 Pero tla achi ninoueyimati, tejua ken itlaj león tinechtejtemoua, niman tinechtotokatinemi niman hasta tikchiua milagros* para ika tinechtlajyouiltia. 17 Nochipa tikimpiya yejuan nechteixpanuitokej. Ikan motlauel tinechuijsoki ken nechuijsokiskiaj miyekej soldados.
18 ¿Tline otinechkauilij onitlakat? Kuajli yeskia tla nimikiskia ijkuak xe yakaj nechitaya. 19 Kuajli yeskia tla ijkuak onikis ijtik nonanaj, san nipanoskia hasta ipan notlalkon, para ijkon, ken xkaman ninemiskia. 20 Niman pampa xok ueyi nemilistli nikpiya, nimitstlajtlanilia achitsin xnechkauili noyolika ma ninemi 21 chika xe niau ne kampa xokaman niuajnokuepas, ipan on país kampa tlayouatok, kampa yauij on mikatsitsimej, 22 ipan on país kampa onkaj tlayouajlotl niman xkimatij tlinon nochiua, kampa on tlastajlotl no sano ijki kenon tlayouajlotl.' "