Zofar tlamach kixkomaka Job
11
Kemaj Zofar, on Naamatita, ijkin okijlij Job: 2 "Nochi on miyek tlajtoltin yejuan xitlaj kijtosneki, noneki para kinankiliskej, pampa maski sen tlakatl sanoyej kijtoua miyek tlajtojli, xkijtosneki tla xkipiya tlajtlakojli. 3 ¿Tikuitia pampa tlamach yotitechijlij titechkamatsakuas? ¿Niman tikuitia xakaj uelis itlaj mitsijlis ika yotitechpijpinaui? 4 Tejua timoteneua ika on tlen motemachtil melauak, niman sano tejua timoteneua tichipauak. 5 ¡Kuajli yeskia tla Dios mitsnankiliskia! 6 Yejua mitsijliskia on tlamatkilistli yejuan ichtakaonkaj yejuan ouijtikaj tikajsikamatis. Niman ijkon tikmatisia ika Dios xmitscastigaroua ken mitsmelauaya mitscastigaros.7 "¿Tiknemilia uelis tikmatis nochi on tlajtlamach* yejuan onkaj ichtaka, yejuan san Dios kimatstikaj? ¿Niman tiknemilia tiueli tikajsikamati on iueyilis Dios yejuan nochi ueli kichiua? 8 Ka, xtiuelis pampa nochi on sanoyej tlakpak onkaj, más tlakpak onkaj xken on cielo, niman más uejkatlan xken kampa nemij on mikatsitsimej. 9 Itlamatkilis* Dios más ueyi xken in tlaltikpaktli, niman más patlauak xken on mar. 10 ¿Akinon uelis kiteltis Dios, tla yejua kichiua ma kajsikan niman ma kitsakuakan ipan carcel sen tlakatl, niman kemaj ma kiyolkuitikan? 11 Yejua kimatstikaj akinon tlakajkayaua, niman akinon xompayejyeua. ¿Tlen tiknemilia yej xkimati? 12 Ijkon ken xkaman uelis sen tlakatl tonto nochiuas tlamatki, no ijki xkaman uelis sen poloko kitlakatilis sen tlaltikpakkonetla. Noso sen tepepoloko uelis kitlakatilis sen kalpan poloko.
13 "Job, xtlali ipan moyojlo para melajki timouikas, niman xmoueyikatsajtsili itech Dios. 14 Tla tikpiya tlajtlakojli, xmokixtili. Maka xkauili ma kalaki mochan on tlen xkuajli. 15 Ijki, xtipinauas imixpan oksekimej. Moyolika tinemis, niman xitlaj* tikmakajsis. 16 Tikelkauas nochi on motlajyouilis ken itlaj atl yejuan san opanok. 17 Monemilis más petlanis xken ijkuak petlani on tonaltsintli tlakualispan. On tlayoualotl nokuepas, ken tlanexyotl para tejua. 18 Tikmatis ika nochipa kuajli tinemis niman nochipa moyolika tinemis. Dios mitscuidaros para moyolika tikochis. 19 Xitlaj mitsmomojtis ijkuak timoseuis. Miyekej mitstejtemoskej para tikimpaleuis. 20 Pero on xkuajkualtin tlakamej, uej xkipiyaskej akinon kimpaleuis. Xkipiyaskej kanon nomanauiskej, yej sa kichaskej mikilistli."