Job okinankilij Zofar
12
Kemaj Job ijkin okinankilij Sofar: 2 "¡Melauak nemejuamej nenkuitiaj sanoyej nentlamatkej*! Niman nenkuitiaj ijkuak nenmikiskej xok nemiskej yejuan no ijki tlamatkej* ken nemejuamej 3 Pero nejua no ijki nikpiya kajsikamatilistli ken nemejuamej, niman xnikaki tla más nenkimatij xken nejua, pampa on tlen yonennechijlijkej, san akinon uelis nechilis. 4 Achtoj, ijkuak Dios niknotsaya, yejua nechnankiliaya. Pero aman, hasta notlajsojkaikniuan noka uetskaj maski xitlaj* tlajtlakojli nikpiya. 5 Ijkuak se xitlaj kipoloua, kipijpinauiya yejuan tlamach ipan nochiua, niman xkiknelia, yej tlamach kijtouilia. 6 On yejuan tlachtekej, iminyolika nemij iminchan. On yejuan kikualaniaj Dios, xitlaj* kimpajsoloua kampa chantij. Yejuamej kinemiliaj, Dios yokinkauilij ma kichiuakan tlen kinekiskej.7 "Xkintlajtolti on yolkej noso on totomej, yejuamej uelis mitsmachtiskej. 8 Niman in tlajli niman on michimej no uelis tikintlajtlanilis ma mitsmachtikan. 9 ¿Sanken nemi yakaj yejuan xkimati ika nochi on tlen onkaj, Dios okichijchiu ika imatsin? 10 Dios kipiya ipan ima inemilis nochi kech kipiya nemilistli. 11 Ijkon ken tonakas kuajli kaki tlinon se kijtoua, tokamak ueli kimati ken uelik on tlakuajli. 12 On ueuentsitsimej kipiyaj tlamatkilistli niman kajsikamatalistli, pampa miyek xipan yonenkej.
13 "Pero Dios san yejua tlamatki* niman kipiya nochi poder. On tlen kijtoua kichiuas, kichiua. 14 On tlen Dios kixoxotonia, xakaj uelis oksejpa kichijchiuas. Tla Dios kichiua para sen tlakatl ma kitsakuakan ipan cárcel, on tlakatl xakaj uelis kimakauas. 15 Tla yejua kiteltia on kiautli, tlauajuaki. Niman tla kuajmakaua on kiautli, apachiui in tlajli.
16 "Ikan iueyi poder nochipa tetlani. Ipan imauan nemij on yejuan tlakajkayauaj niman yejuan kinkajkayauaj. 17 Yejua kichiua para on tlamatkej* makasa kipiyakan tlamatkilistli, niman yejua kichiua para on jueces ma kipolokan intlamachilis. 18 No ijki, yejua kichiua para on reyes makasa ma tlamandarokan, yej kichiua para ma kimajsikan niman ma kinuikakan tetsotsoltikej ipan okse país ken esclavos. 19 Yejua kinkixtia on tiopixkej ipan intekiu, niman kimejkuania on yejuan uejueyixtokej kampa tlamandarouaj. 20 Yejua kinkamatsakua on yejuan tetlajtolpaleuiyaj niman kintlamachilispoloua on yejuan ueuentsitsimej. 21 Yejua kichiua para on tlayekankej makasa ma kintlakaitakan, niman kichiua para on yejuan kojtikej xok kipiyaj poder.
22 "Yejua techpantlannextilia on tlen ichtaka onkaj, niman techpanextilia on tlen onkaj kampa más tlayouatok. 23 Yejua kichiua para on naciones ma uejueyixtiakan, niman no yejua kichiua para ma kinxoxotonikan. Yejua kinchajchayaua niman yejua kinsentlalia. 24 Yejua kinkixtilia intlamachilis on yejuan tlayekanaj ipan sen país, niman yejua kichiua ma nopojpolokan ipan sen xalpatlajkan kampa xitlaj* ojtli. 25 Ipan on xalpatlajkan nejnemij ipan tlayouajlotl. Sa majmayautiuij niman papatilijtiuij ken tlauankej.