13
"Nochi tlen yonenkijtojkej, yonikitak ika nixtololojuan, niman nejua yonikak ika nonakasuan niman yonikajsikamat.2 On tlen nemejuamej nenkimatij, nejua no nikmati, niman xnikneltoka tla más nentlamatkej ken nejua.3 Pero nejua, yej niknekiskia nitlajtlajtos iuan Dios yejuan nochi ueli kichiua. Nochi on tlen xnikuelita, niknekiskia nikijlis toTEKO.4 Ikan tlakajkayaualistin nentlakajkayauaj para nenkitlapachouaj tlen melauak. Nenmoteneuaj nentepajtijkej, pero xakaj nenkipajtiaj.5 ¡Más kuajli yeskia tla xnennauatiskia; ijkon uej nesiskia ika nentlamatkej*!6 Aman tej, nemechtlajtlanilia kuajli xkakikan; xkakikan on tlen nikijtos para ninomanauis.
7 "¿Nenkuitiaj nenkimanauiyaj Dios ika on tlakajkayaualistli? ¿Niman nenkuitiaj kuajli ika nentlakajkayauaj ika itokatsin? 8 Nemejuamej nenkuitiaj nenkipaleuiyaj Dios, niman nenkuitiaj nenkimanauiyaj. 9 Pero ¿tlinon nenkijtoskej tla Dios kipantlannextia nochi on tlen nemejuamej nenkiyanaj? ¿Nenkuitiaj uelis nenkajkayauaskej ken nenkajkayauaskiaj sen tlaltikpaktlakatl? 10 Yej, Dios mechajuas tla nenkinekij nekimanauiskej ikan tlakajkayaualistli. 11 Iueyilis Dios sanoyej nenkimojkaitaskej niman mechmojtis sanoyej. 12 On tlen nenkijtouaj para nenmomanauiskej, sanenkaj, pampa on ken iteuyo itlaj. On tlinon ika nenmomanauisnekij, ken itlaj tepanchinantli de sokitl.
13 "Aman tej, ¡maka xnauatikan niman xkakikan tlinon nemechijlis, maski ma uajla nopan tlen xkuajli! 14 Nitlajtos, maski nikmatstikaj ika Dios uelis nechmiktis pampa nitlajtoua. 15 Maski ma nechmikti, nejua itech niktlalis noyojlo, niman ixpan nikijtos tlinon ika ninomanauis. 16 Manin, yej ijki ninomanauis, pampa itech Dios xueli nonisiuiya sen xompayejyeua.
17 "Kuajli xkakikan tej, on tlen nemechijlis. Ma nemonakas kaki notlamanauil. 18 Ye nikpiya tlinon ika nitlanankilis para ninomanauis, niman on tlen nikijtos nikmatstikaj ika Dios nechneltokilis. 19 Tla yakaj kipiya tlinon ika nechteixpanuis, nejua xokuitlaj nikijtos niman yej nimikis.
20 "NoDios, san ome tlen nimitstlajtlanilia tejua maka tinechnenekilis, niman xok niniyanas motech. 21 Makasa más xnechcastigaro, niman makasa xchiua para ma ninomojti. 22 Kemaj xnechnotsa, niman nejua nimitsnankilis, noso tla achtopa nejua nimitsnotsas, xnechnankili. 23 Xnechijli: ¿Katlejua notlajtlakoluan nikimpiya? Xnechijli tlinon sanoyej xkuajli onikchiu yejuan sanoyej omitskualanij. 24 ¿Tline xtikneki ma nimitsita? ¿Tline tinechita ken yakaj motlauelikniu? 25 Nejua ken nixojtli yejuan kuika ajakatl. ¿Yejua ika, tline tikneki más tinechtlajyouiltis? Yoninokau ken itlajsojlo trigo yejuan uaki. ¿Yejua ika, tline más tinechtotokatinemi?
26 "Yotikijkuiloj nochi tlinon xkuajli onikchiu yejuan nechajmanaj, hasta on tlinon xkuajli onikchiu ijkuak nitelpochtli katka. 27 Tinechtlalilia teposcadenas ipan nokxiuan, niman nochiuiyan kampaka niau tinechitstiu; tikitstiu hasta kampa nicholojtiu. 28 Nochi notlalnakayo ye xoxotontiu ken itlaj yejuan palanki, ken itlaj tlakentli* yejuan yotlakuanyouak.