14
"Sen tlaltikpaktlakatl tlakati itech sen siuatl, niman san nemi keski tonajli, niman chika nemi kipiya miyek tlajyouilistli. 2 Niman on inemilis, ken sen xochitl yejuan poni niman kemaj pilini. Noso ken sen tlajseuajlotl yejuan san panoua, kemaj popoliui. 3 Tejua noDios, ¿nopan tiuajtlacha, niman tikneki tinechyolkuitis? 4 Xakaj uelis kichipauas sen tlakatl yejuan otlakat xchipauak. 5 Tejua noDios, tejua yotiktlalij keski xipan nemiskej in tlaltikpaktlakamej. Tejua tikintlalilia kasta tlamis iminnemilis, niman xuelis kipanauiskej. 6 Tla ijkon tej, makasa xnechita, yej xnechkauili noyolika ma ninemi. ¡Xnechkauili ma nipakanemi ken sen tlakeuajli!7 "Sen kojtli* yejuan kitsontekij, oksejpa ueli itsmolini niman oksejpa kipiya imatsitsiuan. 8 Maski on kojtejtepojli niman ineluayouan ye palantikatkaj ipan on tlajli, 9 oksejpa xoxouiya ijkuak kimati on atl, niman oksejpa nomajmatia ken sen kojtli* yejuan selik.
10 "Pero sen tlakatl miki niman xok kaman nemi. Niman ijkuak miki ¿kanon yau? 11 On atl yejuan onkaj ipan mar ijpotokisa, niman on ríos ueli uakij. 12 Pero chika on cielo onkaj, on tlaltikpaktlakamej xnokuiteuaskej ipan imintlalkon, yej sanken* miktoskej.
13 "¡Kuajli yeskia tla tinechiyanaskia ne miktlan chika panoua motlauel, niman kemaj oksejpa tinechelnamikiskia para tinechtlachaltiskia! 14 Ijkuak sen tlakatl miki, ¿oksejpa yoliuis? Nochi on tiempo nikchixtias chika ninemi hasta ma nechmanauikan de notlajyouilis. 15 Niman ijkuakon, tejua tinechnotsas niman nejua nimitsnankilis, niman tinechitas ikan tetlajsojtlalistli* pampa tejua otinechchijchiu. 16 Tla aman nochiuiyan tinechita kampaka niau, ijkuakon nion notlajtlakoluan xok tikintas, 17 Nochi tlen xkuajli onikchiu, tikelkauas, niman tinechchipauas de nochi notlajtlakoluan.
18 "Ijkon kenon tepemej popoliuij pampa xoxotonij, niman on uejueyimej temej no popoliuij pampa nejkuaniaj, 19 niman on atl kitlamitiu on tetl, niman on kiautli kuika on tlalkuechtli, ijki tiktlaxoxotonilia sen tlakatl yejuan kichaya kiselis sen nemilistli yejuan kuajli. 20 Tiktlani, niman tikpopoloua, niman tikixtia ipan itlal para nochipa. Niman ijkuak yau nion xok ixmachyoj. 21 Tla ikoneuan kipiyaskej tlakaitalistli, yejua xkaman kimatis, noso tla kimpijpinajtiaj, no xkimatis. 22 San kimati on tlen kokoua ipan itlalnakayo, niman on tlen san yejua kijyouiya."