Elifaz okinankilij Job
15
Kemaj Elifaz, on temanita, ijkin okinankilij: 2 "Timoteneua ika titlamatki. Sen tlakatl yejuan melauak tlamatki xtlajtlajtoua ikan tontojyotl. Motlajtol ken itlaj ajakatl totonki yejuan kistikaj mokamak. 3 Sen tlakatl yejuan tlamatki xtlajtoua ken titlajtoua, nion nomanauiya ikan tlajtojli yejuan sanenkaj. 4 Pero tejua xok tiktlakaita Dios. ¡Xok tikmauistilia ken kimelaua kimauistiliskej! 5 Motlamachilis xkuajli onkaj; yejua ika ijkon titlajtlajtoua, niman yejua ika tikijtoua tlen xnejli. 6 Xnoneki nimitsteixpanuis, pampa on tlen tikijtoua, sano tejua ika timotlajtlakolmaka.7 "¿Tiknemilia achtoj tejua otitlakat xken Adán? ¿Noso tiknemilia nion on tepemej xe onkatkaj ijkuak tejua otitlakat? 8 ¿San uelijkuak yotikakka iplanes Dios? ¿Noso tiknemilia san tejua titlamatki* ipan in tlaltikpaktli? 9 ¿Tlinon tikmati tejua tlen tejuamej xtikmatij? ¿Tlinon tikixmati tejua tlen tejuamej xtikixmatij? 10 ¡Tejuamej más ye tiueuetkej, yejua ika más tikmatij xken motataj!
11 "¿Xitlaj ika mitspaleuiya ika Dios mitsyoltlalia niman tejuamej timitsyemankanotsaj? 12 ¿Tline tikmokauilia mopan ma kalaki on tlauejli niman hasta tixtlijtlikui ijkuak tikualani? 13 ¿Tline tikualani itech Dios niman sa tlamach tikixkomaka? 14 Xnemi nion se tlakatl yejuan chipauak nion yejuan xtlajtlakolej. 15 Tla Dios xkitlalia iyojlo nion intech iángeles, niman nion on cielo kita xchipauak, 16 tla ijkon, itech sen tlaltikpaktlakatl más xuelis kitlalis iyojlo. Yejua xuelis, pampa sen tlaltipaktlakatl sanoyej tlajtlakolej niman sanoyej tetlajyeloj* ixpan Dios, niman sa kamiktikaj kichiuas tlajtlakojli.
17 "Xnechkaki tej, nimitsijlis tlen nejua nikmatstikaj pampa nopan onochiu. 18 Nimitsijlis on tlen techmachtiaj on tlamatkej*. Yejuamej okinselikej imintech inachtojtajuan yejuan xijtlaj kiyanaj. 19 Yejuamej okiminmakakej on tlajli, niman yejuamej xononelojkej iminuan on yejuan xchanejkej para xokinyekankej uejka de itech Dios.
20 Sen xompayejyeua tlakatl semi xueyi nemilistli kipiya niman nochi inemilis sanoyej tlajyouiya. 21 Yejua sa tlamach kaki yejuan kimomojtia. Ijkuak más iyolika nemi, on tlachtekej kontlachtekiliaj. 22 Yejua xkichixtikaj tla uelis kisas ipan on tlayouajlotl. ¡Sa kicha on espada yejuan kimiktis! 23 Itlalnakayo kikuasnekij on tsojpilomej. Niman yejua kimatstikaj ika on tlen ipan nochiua xakaj uelis kimanauis. 24 On tlayouajlotl sanoyej kimojtis. San amanaman ipan uajlas ueyi ajmantli niman on tlen xkuajli. Yejua nomatis ken yakaj yejuan ye kuajuijsokis sen rey yejuan más kojtik. 25 Ijkin ipan nochiua sen xompayejyejketl yejuan kixnamikij Dios, yejuan nochi ueli kichiua, 26 niman yejuan, kikti sen kojtik escudo,* niman kemaj ipan yau Dios kixnamiki ikan noueyimatilistli.
27 "In xompayejyeua tomauak niman rico. 28 On uejueyikalpanmej kampa chantis xoxotoniskej. Ipan inkaluan xakaj chantis, nochi xoxotonki yes. 29 On iriqueza xuejkauis kipiyas, niman nochi on tlen kipiya ipan in tlaltikpaktli, xok más miyekixtias.
30 "Yejua xuelis cholojteuas ipan on tlayouajlotl. Yes ken itlaj on kojtli* yejuan tlatlak iitsmolinajlo, noso kenon xochitl yejua kuiuitla ajakatl. 31 Maka ma kitlali iyojlo ipan on tlakajkayauilistli, pampa san kajkayauaskej. 32 Yejua ken sen kuamatli yejuan pilini ijkuak xe ajsiya tonajli para pilinis, niman xkaman oksejpa xoxouiyas. 33 Yes ken itlaj on uvasyoj yejuan xini itlakyo ijkuak xe chikaui, noso ken itlaj on olivojkojtli yejuan xochiyoxini niman xok tlaki. 34 On xkuajkualtin tlakamej xkipiyaskej inkoneuan, niman on yejuan ricojtiaj ikan ichtakatlaxtlauijli, tlatlaskej inkaluan. 35 Yejuamej kinemiliaj tlen xkuajli kichiuaskej, niman kichiuaj, ipan iminyojlo san onkaj tlakajkayaualistli."