Job okinankijlij Elifaz
16
Kemaj Job ijkin okinnankilij Elifaz: 2 "Nemejuamej xnennechyoltlaliaj, yej más nennechtlajyouiltiaj. 3 ¿Tlen xkaman tlamis ika nennechijliskej on tlen xitlaj* kijtosneki? ¿Tline sa ika nennemij nennechtenkuikuij? 4 Tla nemejuamej nennemiskiaj ken nejua aman ninemi niman nejua ninemiskia ken nemejuamej, nejua no ijki nitlajtoskia ken nemejuamej aman nentlajtouaj. Hasta ninokuauiuixoskia ika nemechpijpinauiskia, niman sa tlamach nenmechtechtiskia. 5 Pero nejua uej nemechyemankanotsaskia niman nenmechyoltlaliskia, para ijkon nenmoyolchikauaskiaj niman xok nemokokoskiaj. 6 Pero maski tlinon nikijtoua, xitlaj* ika nechpaleuiya. Maski nitlajtoua noso xnitlajtoua, xnipajti, yej sanken* ninokokoua,7 "Dios yonechkixtilij nochi nofuerza. Yonechinmejkuanilij nochimej notlajsojkaikniuan, 8 niman onechtsaku ipan icarcel. Pampa sanoyej yoniteuak, on tlakamej kijtouaj ika nikpiya tlajtlakojli pampa sanoyej yoniteuak. 9 ToTEKO nechtokatinemi niman nechtsajtsayanilia nonakayo. Nechmiktisneki ken itlaj on tepeyolki tekuani, niman nechtlaueltlajtlata ken notlauelikniu yeskia. 10 On tlakamej san setipan nopan yoyajkej niman noka uetskaj. Tlamach nechteneuiliaj, niman nechxayakauijuitekij. 11 Dios yonechtlalij inmak on xkuajkualtin tlakamej, niman inmak on yejuan xompayejyejkej.
12 Nejua noyolika ninemiya, pero yejua onechajsik ipan nokechkojyo niman onechkechpatskak niman onechpojpostek. Dios sa nejua nechijita para nechmotla ikan itlaminal. 13 Hasta onechyejyeualoj niman nochiuyan nechajmotla ikan itlaminal. Xonechiknelij, yej onechtlajkotsopinij, niman nochi noriñones ochachapan, niman nochichikau otojtoyau ipan tlajli. 14 Dios kichiua para ninokokoua oksejpa niman oksejpa. Nechuijsoki ken sen soldado yejuan nemi ipan nouijsokilisti. 15 Ika miyek ajmantli oninotlakentij ikan ajmankatlakentli*,niman oniknotemilij tlalij ipan notsontekon. 16 Yonixpojposau pampa sanoyej yonichokak, niman iyeuelkan nixtololojuan yotlijtlilejkej, 17 maski nejua xkaman yakaj itlaj onikchiuilij tlen xkuajli, niman nochipa ikan nochi noyojlo onikchiu nooración.
18 "¡Ay teua tlajli! maka xtlapacho noyesyo. In tlen xkuajli nopan nochijtikaj, kijtoua ika xnechmelaua* tlinon nopan nochiua. 19 Nemi yakaj ne iluikak yejuan uelis nopampa tlajtos, 20 pero notlajsojkaikniuan nechchichiitaj. Yejua ika, ixpan Dios sanoyej nichoka. 21 Nikneki yakaj ma tlajto nopampa itech Dios, ijkon ken yakaj tepampa tlajtoua para kimanauiya itlajsojkaikniu. 22 Sa keski xipan poliu para ninemis. Kemaj nias kampa xokaman niuajnokuepas.