17
"Ye nijyojtlantikaj, xok uekauis ninemis, niman notlalkon sa nechcha. 2 Yejuan notech nemij, sa ika nemij nechpijpinauiyaj. Tlajokaj niman tlayoua nikita ken nechtlauelitaj.3 "Pero tejua noTEKO, uelis tinechmanauis san tejua uelis tikchiuas. 4 Tejua yotikintlamachilispoloj notlauelikniuan. Maka tej, tikinkauilis ma nechtlanikan. 5 On yejuan kichtakauiyaj intlajsojkaikniu para kitlanij tomin, tlajyouiskej inkoneuan ikan apistli. 6 NoDios, tejua tikchiua para nochimej ma nechteneuilikan tlen xkuajli, niman para ma nechchijchakan nixko. 7 Nixtololojuan hasta xok tlachaj pampa sanoyej nichoka; notlalnakayo yoteuatsaliu, nesi ken sen tlaseuajlotl. 8 Ijkuak on yejuan kuajli nouikaj ijkin nechitaj, nechmojkaitaj. Kualanij notechkopa, niman kijtouaj sanoyej nitlajtlakolej. 9 Niman sa kijtojtokej ika yejuamej kitl uej xtlajtlakolejkej, yejuamej kijtouaj ika machijchipajkej.
10 "Pero xuajlakan nikan nochimej nemejuamej yejuan tlamach nennechteneuiliaj, niman nikitas ika nemotech xnemi nion se yejuan tlamatki*. 11 Nonemilis ye panotikaj, niman nochi tlinon niknekiya nikchiuas, xok uelis nikchiuas. 12 Pero nemejuamej, ijkuak tlayoua nenkijtouaj tlajokaj. Maski tlayouatok, nenkijtouaj ye tlanestikaj, pero ninokaua ipan on tlayouajlotl. 13 Nejua sa nikcha para nimikis, niman sa nikcha ninotekas para nikochis ne kampa tlayouatok. 14 On okuilimej yejuan nechkuaskej niman on tlalkontli, yejuamej nochiuaskej notataj, nonanaj niman nokniuan yejuan siuamej. 15¿Kanon onkaj notlamachalis para on kuajli nemilistli? Akinon uelis kitas on tlamachalistli para nejua? 16 ¿Notlamachalis temos nouan ne miktlan, niman san sekan titoseuiskej ipan on tlalkuechtli?"