Bildad tlamach okixkomakak Job
18
Kemaj Bildad, on suhita, ijkin okijlij Job: 2 "¿Hasta kamanon titlajtoltlamis? Achtoj, kuajli xnemili tlinon tikijtos, niman kemaj uelis titlajtlajtoskej. 3 ¿Tline titechita ken titontos niman ken tiyolkej? 4 Maski sanoyej tikualanis hasta timotlakentetsayanas, in tlaltikpaktli xojolinis, noso on temej xnejkuaniskej kampa onokej.5 "On tlakatl xompayejyeua seuis itlauil, niman itliu xok tlikuis. 6 On ilámpara seuis, niman ipan ichan xok onyas tlauijli. 7 On chikaualistli yejuan kipiya para nejnemi, tlamis. Niman on tlen xkuajli kitechiuilisneki, sano yejua ipan nochiuas.
8 "Sano yejua kinotlalilis sen matlatl kampa nejnemi, niman on matlatl kichiuas para ma uetsi niman ompa nokauas. 9 Kitlalis sen mekatl kampa sano yejua nokximalinas, niman ipan ikxi nosalos on mekatl. 10 On tlatlalijli yejuan ika uejuetsis, iyantikaj ipan ojtli kampa panos. Niman ijkuak panos ompa nokauas.
11 "Kimati ken nochiuiyan kimiktisnekij, niman kimati ken sa nochiuiyan kitokatinemij. 12 Ichikaualis tlami pampa xtlakua. On tlen xkuajli sa kicha para ipan uetsis. 13 On kokolistli, yejuan tetlajsojkakoneu itech on mikilistli, kipalanaltijtiu ika yolik nochi itlalnakayo on xompayejyeua. 14 On tlakatl xompayejyeua kixtiaj ichan kampa iyolika nemiya, niman kitejchiuilanaj itech on temojtij rey yejuan kimandaroua mikilistli. 15 On kajli kampa chantiya kitlatiliskej, niman nochi tlen iyaxka kitlatis on azufre. 16 On tlakatl xompayejyeua, ken itlaj on kojtli* yejuan neluayouaki niman mauajuaki. 17 Ipan in tlaltikpaktli, nochimej kelkauaskej ika nemiya, niman xokaman yakaj kiteneuas. 18 Kixtiskej kampa tlauilpan nikan ipan in tlaltikpaktli, niman kontlajkaliskej kampa tlayouatok. 19 Ipan ikalpan, xkimpiyas iuejkakoneuan; ifamilia nochimej mikiskej. 20 Ijkuak on yejuan chantij kampaka ikisayan tonaltsintli niman hasta ikalakiyan tonaltsintli kimatiskej tlinon ipan nochiuas sanoyej nomojtiskej. 21 Ijkin tlami inemilis on tlakatl yejuan xompayejyeua, on tlakatl yejuan xkineki kakis Dios."