Job okinankijlij Bildad
19
Kemaj Job ijkin okinankilij Bildad: 2 "¿Hasta kamanon xok nennechpajsoloskej, niman hasta kamanon xok tlamach nennechijliskej yejuan nennechtlajyouiltiaj? 3 Sa ika nennemij nennechuijuikaltiaj. ¿Tline nion xnempinauaj para nennechuijuikaltiaj? 4 Maski tla melauak nikpiyaskia tlajtlakojli, notlajtlakol san nejua nikijyouiskia. 5 Nemejuamej nenkuitiaj más kuajli nenmouika xken nejua, yejua ika tlamach nennechixkomakaj para nennechpijpinajtiaj. 6 Kuajli xmatikan tej, ika Dios yejua okichiu para tlamach nopan ma nochiua, niman sano yejua onechtlalilij sen matlatl para ipan ma niuetsiti.7 "Maski ijkin nitsajtsiya: "ye nechmiktijtokej", xakaj nechnankiliaya. Maski nitsajtsiya para ma nechpaleuikan, xakaj kinekiya nechpaleuis ken kitocaoua ikan melajkilistli. 8 Dios yonechtsakuilij noojui para maka ma nipano. Yokitlalij tlayouajlotl ipan noojui. 9 Yonechkuilij nochi on riquezas yejuan nikpiyaya, niman yonechkixtilij notlakaitalis yejuan onikman ken sen corona. 10 Dios semi nochi yonechkuilij. ¡Yonechkau ken sen kojtli* yejuan kuajli ouiuichiu! 11 Nejua nopan onotlauelkixtij, niman onechitak ken yakaj itlauelikniu. 12 Nochi on tlen nikpiyaya onikpoloj ika on tlen onechajtitlanilij, yejuan yejuan onechajtitlanilij, ken itlaj isoldados yeskiaj. Yejuamej okiyejyeualojkej nochan niman san setipan onechuijsokkej.
13 "Dios okichiu para ma nechtlalkauikan nokniuan niman notlajsojkaikniuan, niman okichiu para ma nechitakan ken yakaj yejuan xkixmatij. 14 On yejuan ken nikinta niman on notlajsojkaikniuan, yonechtlalkauijkej. 15 Notenotskauan, yonechelkajkej. Notekichiuilijkauan siuamej nechitaj ken yakaj yejuan xchanej. Xok nechixmatij. 16 Tla niknotsa sen notekitkau, xnechnankilia maski niktlajtlanilia ken favor. 17 Tla niknisiuiya nosouau, yejua xnechselia pampa nijyomolonki, niman nokoneuan xnechxikouaj. 18 Hasta on kokonej xnechitasnekij. Nimantsin peua tlamach xkuajli nechijtouiliaj. 19 On notlajsojkaikniuan yejuan más kuajli iminuan ninouikaya, xok nechitasnekij. Yejuan más nikintlajsojtlaya, nopan yonokuepkej. 20 Nokuetlaxyo pepechiui ipan noomiyouan, niman sa axkan ninemi.
21 "Xnechiknelikan nemejuamej notlajsojkaikniuan, pampa Dios chikauak nechcastigaroua. 22 ¿Tline nennechtotokatinemij ken Dios nechtotokatinemi? ¿Tlen xnenkitaj ika sanoyej yonennechtlajyouiltijkej?
23 "Kuajli yeskia tla yakaj kijkuiloskia ipan sen amamoxtli* nochi tlen nikijtoua para xkaman popoliuiskiaj. 24 ¡Kuajli yeskia tla yakaj kitetsotsonaskia ipan plomo noso ipan tetl ika sen cincel para ijkon xkaman popoliuisiaj.
25 "Nejua nikmatstikaj ika nemi on akin nechmanauiya, niman nikmati ika kitlanis on mikilistli niman kijtos ika xnikpiya tlajtlakojli. 26 Nikmatstikaj ika maski in notlalnakayo palanis, nejua uelis nikitas Dios ikan nixtololojuan. 27 Nejua nikitas ikan nejua nixtololojuan. Ijkuakon xnikitas ken yakaj xchanej, yej nikitas ken notlajsojkaikniu. ¡Sanoyej nikneki nikitas!