Zofar okinankijlij Job
20
Kemaj Zofar, on naamatita, ijkin okinankilij Job: 2 "Xok nikmati tlinon niknemilis, yejua ika, noneki nimitsnankilis pampa on tlen otikijto achi onechpajsoloj. 3 On tlen tinechijlia nechkualania, pero nejua nikmatstikaj kenijki nimitsnankilis.4 "Tejua tikmatstikaj ika desde ye uejkaui, desde ijkuak on tlaltikpaktlakatl opeu nemi ipan in tlaltikpaktli, ijkin uajnochijtiu: 5 On tlakatl xompayejyeua xuejkaui ipakilis. Ipakilis san panotikisa. 6 Maski iueyimatilis sanoyej tlakpak ajsis hasta ipan cielo, noso maski itsontekon ajsis hasta ipan moxtli, 7 popoliuis para nochipa ken itlaj xixalistli, niman itlajsojkaikniuan tetlajtoltiskej: '¿Tlinon ipan onochiu?' 8 Popoliuis ken itlaj temiktli, niman xakaj uelis kinextis. noso ken itlaj tlatlachalistli yejuan se kipiya ijkuak tlayoua, 9 Itlajsojkaikniuan* nion ifamilia yejuan nochipa kitayaj , xokaman oksejpa kitaskej. 10 Ikoneuan, ika onkaj kinkuepiliskej on mayankej on tlen yejua okinmichtekilij niman okinmixpachouilij 11 Ijkuak tiempo chikajtikaj pampa telpochtli, ijkuakon yas ipan tlalkontli.
12 "On tlakatl xompayejyeua sanoyej kuelita kichiua tlen xkuajli. Kimati ken itlaj yejuan sanoyej uelik. 13 Kikua niman kuekuechoua ika yolik pampa sanoyej kuelilia. 14 Pero ijkuak yokitoloj, ijtik nokuepa chichik ken ipajyo kouatl. 15 Niman Dios kichiua para ma kisotla, nochi on tlen yokikuaj yejuan san okichtek. 16 On tlakatl xompayejyeua, ken kipachichintikaj ipajyo kouatl, niman sano yejua nopajmiktis. 17 Xkaman nemis ikan paktli para kintas on ríos yejuan yajtok de leche niman de nekutli. 18 On tlen kitlanis ipan itekiu, xok yejua iyaxka* yes, niman xkaman nemis ikan paktli maski kipiyas riquezas. 19 Okitekuilij tlajtlamach, niman xokimpaleuij on mayankej. Niman okinnoyaxkatij kaltin yejuan xejua okinchijchiu. 20 Xkaman oyolpachiu iapismikyo para kichiuaya on tlen xkuajli, niman nochi on tlen kinekiya okipoloj. 21 Xitlaj kixuikauaya de on tlen kikuaya, yej, nochi kitlamiyaya. Yejua ika xuekauis ipakilis.
22 "Maski más miyekixtiu iriqueza, xok kipiya paktli, niman más ipan uajlau nochi tlen xkuajli. 23 Ijkuak notlalis kikuas nochi tlen kinekis, ipan uajlas itlauel Dios. Nochi itlauel Dios ipan uajlas. 24 Tla xokimailijkej ikan espada, kimotlaskej ika sen tlaminajli yejuan ikuayak de bronce. 25 On tlaminajli kipanauis itlalnakayo, niman ikuayak on tlaminajli panotikisas ipan iyeltapach. Niman sanoyej nomojtis.
26 "Ipan uajlas sen ueyi tlayouajlotl niman kuajli kitlapachos. Sen ueyi tlitl yejuan xnesis akinon kitsmolinaltia, kitlatis iuan nochi ikal. 27 Dios kipantlannextis itlajtlakoluan on tlakatl xompayejyeua, niman in tlaltikpaktlakamej kiteixpanuiskej. 28 Ijkuak itlauel Dios uetsis ipan on tlakatl, on tlakatl kipolos nochi iriquezas. 29 In yejua castigo yejuan Dios kuajtitlanis ipan on tlakatl xompayejyeua. In yejua itlaxtlauil yes yejuan Dios kimakas."