Job okinankijlij Zofar
21
Kemaj Job ijkin okijlij Zofar: 2 "Nemejuamej nennechyoltlaliskej tla nenkakiskej tlinon nemechijlis. 3 Xnechpakaijyouikan chika nitlajtoua, niman kemaj xnechuejuetskilikan tla nenkinekij.4 "Tla nikualani, xiuan yakaj tlaltikpatlakatl, yej pampa xnikpiya yolseuilistli. 5 Tla nenkakiskej tlinon nikijtos, hasta xok uelis nentlajtoskej pampa sanoyej nenmomojtiskej. 6 Hasta nejua no ninomojtia ijkuak niknemilia tlinon nikijtos, niman notlalnakayo hasta kuekuetlaka.
7 "¿Tline xmikij on tlakamej xompayejyeuamej? ¿Niman tline ijkuak ueuentsintiaj tentokej ikan riquezas? 8 Kitaj ika iminkoneuan niman inmixuiuan xitlaj* kimpajsoloua ijkuak noskaltiaj. 9 Xitlaj kinmomojtia ipan iminchan. Dios xkaman kincastigaroua. 10 Iminyolkauan nochimej kuajli tlaxinachouaj, niman on siuayolkej xkaman piluetsij. 11 Inkoneuan on xompayejyeuamej tlakamej , notlatlalouaj niman nauiltiaj ken itlaj borreguitos. 12 Niman ijkuak kakij kintsotsonaj on arpas, on tambores niman on flautas, yejuamej nijtotiaj niman tsijtsikuinij ikan paktli. 13 On tlakamej xompayejyeuamej xmikij ikan mayantli, niman ijkuak mikij, xnajmantiuij. 14 Pero ijkin kijliaj Dios: '¡Xtechkaua! Maka itlaj xtechijli. Tejuamej xtiknekij tikmatiskej de motlanauatiluan!' 15 Niman no kijtouaj: '¿Man Akinonon Dios yejuan nochi ueli kichiua, para yejua tiktekipanoskej? ¿Tlinon tiktlanij tla tikchiuaj oración ixpan yejua?' 16 Pero on xkuajkualtin tlakamej xejuamej inyaxka on tlen kipiyaj. ¡Pero maka Dios kineki no ijkon nitlanemilis ken yejuamej! 17 "¿Kamanon otikitakej ika on xkuajkualtin tlakamej mikij ijkuak xe ajsi para mikiskej? ¿Kamanon imimpan onochiu on tlen xkuajli? ¿Kamanon okualanijkej Dios, niman yejua okintlajyouiltij? 18 Yejuamej xkaman chajchayauij, kenon polokatl chajchayaui ijkuak ajaka noso ijkuak uajlau ajkomalakotl.
19 "Kijtouaj kitl Dios kincastigaroua on tekoneuan ipampa intlajtlakoluan intajuan. Pero más kuajli tla on tatajtin yejuamej kitlaxtlauaskiaj intlajtlakoluan. 20 Yejuamej noneki kiseliskej on castigo. Yejuamej ma kiselikan itlauel on Dios yejuan nochi ueli kichiua. 21 Yejua xok notenmati tlinon ipan nochiuas ifamilia ijkuak yejua yomik.
22 "Pero, ¿akinon uelis kimachtis Dios yejuan kinyolkuitia on yejuan chantij ne iluikak? 23 Sekimej kuajli chijchikajtokej ijkuak mikij, paktiuij niman, inyolika yauij. 24 Nochi kipiyaj niman kuajli chijchikajtiuij. 25 Pero oksekimej uej mikij ipan ajmantli, xkaman okixmatkej pakilistli. 26 Pero ijkuak yauij ipan imintlalkon, ompa sano ijki impan nochiua. Ompa on kuilimej kinkuaj sano ijki cada se.
27 "Nejua nikmatstikaj tlinon nenkinemilijtokej de nejua, niman nikmatstikaj ika itlaj xkuajli nennechchiuilisnekij. 28 Nemejuamej nenmotlajtoltiaj: '¿Kanon onkaj ikal on xkuajli tekimakaketl yejuan sanoyej tekanauiltiani niman xompayejyeua?' 29 ¿Xkaman nentlajtlajtouaj iminuan on tlakamej yejuan yauij uejka? ¿Xkaman nenkakij on tlen yejuamej kitetlajtlajtouiliaj? 30 Yejuamej kijtouaj, kitl ijkuak Dios kualani, tecastigaroua, pero on tlakatl xompayejyeua uej nion xitlaj* ipan nochiua. 31 Niman xakaj kixkomaka tla xkuajli nouika; noso xakaj kitlaxtlauilia ken kitocaroua ipampa on tlen kichiua. 32-33 Niman ijkuak kuikaj para kontôkaskej, nochimej yauij. Sekimej yakatstiuij, niman oksekimej tlatokatiuij. Niman ijkuak kajxiltiaj ipan itlalkon, sen soldado nokaua ompa para kitlajpiya on tlalkontli. Niman on mikatsintli kiselia on tlajli ikan paktli.
34 "¡Nemejuamej, xuelis nennechyoltlaliskej maski nenkinekiskej! !On tlen nenkijtouaj nochi xmelauak!"