Elifaz okinankijlij Job
22
Kemaj Elifaz, on temanita ijkin okijlij Job: 2 "Tisen tlakatl sanoyej tlamatki*, pero in xitlaj ika kipaleuiya Dios. 3 ToTEKO xpaki maski tejua xitlaj* tikpiya tlajtlakojli noso maski sanoyej kuajli timouika 4 Tla yejua mitscastigaroua noso mitsyolkuitia, xpampa nochipa tiktekipanoua. 5 Yej yotikchiu miyek tlen xkuajli, niman motlajtlakol sanoyej yomiyekiyak. 6 "In sen ejemplo, ijkuak tikintlanejtiaya tomin mokniuan, tikintlajtlaniliaya imintlaken ken itlaj promesa ika melauak mitstlaxtlauiliskej, niman tikinkauaya tetsotsoltikej. 7 On yejuan amikiya xotikatlitij, niman yejuan apismikiya xotiktlakualtij. 8 ¡Pampa nochi tikpiyaya, tikmatiya ken nochi moyaxka* katka in tlaltikpaktli! 9 Yejuan siuakaualtsitsimej xitlaj* tikinmakaya ijkuak itlaj mitsajtlajtlaniliayaj, niman yejuan iknomej nochi tikinkuiliaya tlen kipiyayaj. 10 Yejua ika, mopan youajlaj tlen xkuajli, niman mopan yejkotetsi on nemojtijli. 11 On tilauak tlayouajlotl, xmitskauilia titlachas niman sen ueyi apachiuilistli mitstlapachoua.12 "Dios nemi kampa más tlakpak xken on cielo, niman más tlakpak xken on sitlalimej. 13 Tejua tikijtoua: '¿Tlinon kimati Dios?' Yejua xuelis techtlajtlakomakas pampa xtechita, 14 pampa on tilauak moxtli kitsakuilia. Yejua san paxalojtinemi nochiuiyan ipan on cielo.
15 "¿Tiknemilia sanken* tiknejnemis on ojtli kampa tlayouatok yejuan kitokaj on xkuajkualtin tlakamej? 16 Yejuamej omikkej ijkuak xe ajsiya para mikiskej, ijkuak okinuikak sen ueyi río. 17 Kijliayaj Dios: '¡Xtechkaua! ¿Tlinon uelis techchiuilis on yejuan kipiya nochi poder?. 18 Xkaua tej, yejua okinmakak nochi on kuajli tlajtlamach* tlen kipiyayaj iminchan. ¡Nejua xnikneki ninouikas iminuan yejuamej!
19 "On yejuan yolchipajkej pakij, niman on yejuan xitlaj* tlajtlakojli kipiyaj uetskaj, 20 ijkuak kitaj, ken popoliui iminriquezas on xkualkualtin tlakamej, niman ken nochi kitlatia on tlitl.
21 "Oksejpa xmoyoltlali iuan Dios, niman kemaj oksejpa kuajli tinemis. 22 Kuajli xkaki itlanauatil yejuan mitsmaka, niman xkejeua ipan moyojlo. 23 Tla timoknelia niman oksejpa timokuepa itech toTEKO yejuan kipiya nochi poder niman tikejkuania nochi tlen xkuajli ipan monemilis, on tlajyouilistli nejkuanis mochan. 24 Niman tla on oro yejuan más patioj yejuan tikixtlajsojtla tikitas ken tlalkuechtli niman temej yejuan onokej atlajko, 25 tla ijkon, toTEKO yejuan kipiya nochi poder yejua nochiuas mooro niman moplata yejuan sanoyej miyek yes.
26 "Yejua mopakilis yes, niman xok tipinauas itech. 27 Ijkuak tiknotsas, yejua mitskakis, niman tejua tikmakas on tlen otikprometerouilij. 28 Nochi tlinon tikchiuas kuajli kisas, niman tikpiyas tlauijli ipan monemilis. 29 Dios kichiua para ma nokneli on yejuan noueyimati, niman kimanauiya on yejuan yolyemanki*. 30 Dios mitsmanauis tla xtikpiya tlajtlakojli, niman tla timouika kuajli ken kitocaroua."