Job okinankijlij Elifaz
23
Job ijkin okinankilij Elifaz: 2 "Aman tej, oksejpa nimitsnankilis ixpan Dios ikan tlaueltlajtojli, pampa Dios nopan yokitlalij icastigo. 3 ¡Kuajli yeskia tla nejua ueliskia niknextiskia niman nikmatiskia kanon chanti! 4 Nikonixpantiliskia on tlen nopan nochiua. Nejua miyek nikpiya tlinon ika ninomanauis. 5 Ijkuakon yejua nechmelajkaijliskia tline ijkon onechchiuilij. 6 ToTEKO xnechixnamikiskia ikan iueyi poder, yej kinekiskia nechkakiskia. 7 Niman kimatiskia ika on tlen nikijtoua melauak, niman kijtoskia ika xitlaj* nikpiya tlajtlakojli.8 "Tla niktejtemoua Dios kampaka ikisayan tonaltsintli, xompa nemi. Tla niktejtemoua kampaka ikalakiyan tonaltsintli, no xniknextia. 9 Tla niau kampaka norte, no xnikita, niman tla niau kampaka sur, no xak. 10 Pero yejua uej nochiuiyan nechita kampa niau. Ijkuak yonechtlatlatak, nikisas chipauak ken itlaj oro.
11 "Nejua nochipa niau ipan on ojtli yejuan Dios onechititij. Xkaman nikau iojui. 12 Nochipa niktlakamati ileyes niman itlanauatiluan. Xkaman san nejua ninoyekana. 13 Ijkuak yejua kijtoua itlaj kichiuas, kichiua, niman xakaj ueli kiteltia. 14 On tlen yokijtoj nopan nochiuas, nochiuas. Niman no, nochiuas on okseki tlajtlamach* tlen yejua yokijtoj. 15 Ijkuak niknemilia nochi in tlajmach, nejua sanoyej ninomojtia. 16 Dios yejuan kipiya nochi poder, yonechkixtilij noyolchikaualis niman nechpiya ikan nemojtijli. 17 ¡Ojalá on tlayouajlotl nechejkuaniskia niman nechtlapachoskia on tlayouajlotl!