24
1¿ "Tline tej, toTEKO yejuan nochi ueli kichiua, xkitlalia sen tonali ijkuak teyolkuitis, para on yejuan kineltokaj no ma kimatikan? 2 On xkuajkualtin tlakamej kejkuaniaj on neskayotl kampa teuan notlalnamikij para más kueyiliaj imintlal. Yejuamej kinmichtekij borregos para kinmiyekiliaj yejuan ye kipiyaj. 3 Kinkuiliaj iminpolokouan on iknomej niman on inuakaxuan on siuakaualtsitsimej*. 4 On yejuan xitlaj kipiyaj xkinkauiliaj ma kipiyakan tlen kikuaskej. On yejuan mayankej nijiyanaj pampa nomojtiaj. 5 On mayankej, ken itlaj tepepolokomej* yejuan nemij kampa xalpatlajkan, kisaj kontejtemouaj intlakual niman sa axkan* kinextiaj. Niman ipan on xalpatlajkan kixtiaj tlen kinkualtiaj inkoneuan. 6 Konnotijtixuiyaj trigo niman uvas ipan imintlal on xkuajkualtin tlakamej. 7 Tlayoua ijkuak kochij, xkipiyaj tlinon ika notlapachoskej para xsekuiskej. 8 Otlakenapalijkej ika kiautli yejuan oxin ipan tepetl, niman onopepechojkej intech on temej uejueyimej para onomanauijkej.9 "On xkuakualtin tlakamej kinkuiliaj inkoneuan on kakaualtsitsimej yejuan kemach tlakatij, niman inkoneuan on mayankej para kitlaxtlauaj tlen kiteuikiliaj. 10 On mayankej kistinemij tetsotsoltikej. Niman on xkuakualtin tlakamej kinchiualtiaj ma pixkakan, pero xkintlakualtiaj. 11 Kuechouaj aceitunas para kixtiaj aceite niman kipatskaj uvas para kichijchiuaj vino, pero sanoyej amiktinemij. 12 Uejka de on ueyikalpan, on yejuan yemiktokej chokaj niman ajmankatsajtsij, pero Dios xkaki iminoración.
13 "On xompayejyeuamej xkuelitaj on tlauijli niman nochipa kitlalkauiyaj pampa xkinekij yaskej kampa on tlauijli kinyekanas. 14 On temiktijketl saniman nokuiteua para konmiktia on mayanki, niman ijkuak tlapoyaui nokuepa sen tlachteketl. 15 On yejuan siuapapatla kicha ma tlapoyaui niman kuajli nixtlapachoua, niman kijtoua: 'Ijkin xakaj nechitas.' 16 On tlachteketl onkalaki ipan techan ijkuak tlayoua. Ipan tonajli nokaltsakua pampa kitlauelita on tlauijli. 17 Yejuamej kitlauelitaj on tlauijli, pero kuelitaj on tlayouajlotl.
Zofar okitlajtolkoton Job
18 "On tlakatl xompayejyeua ajkotokoua ken itlaj tlajsojli. Itlaluan, Dios kintlaueli, niman xok yakaj kitekiti iuvasyoj. 19 Ijkon kenon tlaxotlajli yejuan tlauajuatsa kipâtla on nieve, no ijki popoliui ipan itlalkon on tlajtlakolej. 20 Hasta inanaj kelkauas; on okuilimej kikuaskej; niman xok yakaj kelnamikis. On tlakatl xompayejyeua uetsis ken itlaj on kojtli* yejuan kitsontekij. 21 Yejua nochipa okintlajyouiltij on siuatetsakamej, niman xkaman okinek okimpaleuij on siuakakaualtsitsimej.
22 "Pero Dios ika ipoder, kintlajkali on yejuan kuitiaj no kipiyaj poder. Ijkuak Dios kincastigaroua, xkimatij tla sanken nemiskej. 23 Dios kinkauilia ma inyolika nemikan, pero nochipa kinmitstikaj tlinon kichiuaj. 24 On xkuajkualtin tlakamej san panotikisa ijkuak uejueyixtokej. Pero yejuamej no kenon xojtli yejuan nimantsin pilini ijkuak yokuiuitlakej, niman kenon trigo yejuan yokitekej.
25 Tla xijki, yakaj ma kijto ika xmelauak tlen yonikijtoj. Ma kijto tla nitlakajkayaua."