Amán okinemilij kenijki kinmiktis on judíos
3
Sakin, ijkuak nochi in yopanok, on rey Asuero okitlalij Amán ipan sen tekitl kampa más ueyixtias. Okitlalij tlayekanki de nochimej on tekiuajkej de on nación. (Amán, ikoneu katka Hamedata, niman iuejkakoneu* katka Agag.) 2 Niman nochimej itekitkauan on rey yejuan tekitiyaj ipan on palacio notlakuantelketsayaj niman nopachouayaj ijkuak Amán imintech panouaya noso ijkuak yayaj ixpan, pampa ijki otlanauatij on rey. Pero Mardoqueo xonotlakuantelkets para okitlakaitak.3 Kemaj, on itlapeliuikauan on rey okitlajtoltijkej Mardoqueo tline* xkitlakamatiya itlanauatil on rey. 4 Niman mojmostla sano ijki kitlajtoltiayaj, pero yejua xkintlakamatiya. Yejua ika, on itlapeliuikauan on rey okijlitoj Amán, pampa kitasnekiyaj tla Mardoqueo xnomojtis kijlis ika yejua judío, pampa Mardoqueo yokinmijlijka ika yejua judío.
5 Niman ijkuak Amán okitak ika Mardoqueo melauak xnotlakuantelketsaya niman xnopachouaya ijkuak itech panouaya, semi sanoyej okualan. 6 Niman pampa yokijlijkaj ika Mardoqueo sen judío katka, okinemilij ika xmás kuajli yes tla san yejua castigaros. Yejua ika tej, opeu kinemilia kenijki kinmiktis nochimej on judíos yejuan nemiyaj nochiuiyan kampa tlamandarouaya on rey Asuero.
Tlanauatijli para kinmiktiskej on judíos
7 Ipan on achtoj metstli de on xipan, yejuan no kitokayotiaj Nisán, ijkuak on rey Asuero kuikaya majtlaktli uan ome xipan ika tlamandarouaya, okichijkej suertes ixpan Amán para okitak tlen tonajli niman tlen metstli kinmiktis on judíos. Niman ipan on suertes ones para kichiuas ipan on tonajli majtlaktli uan yeyi, kampa ika majtlaktli uan ome metstli, yejuan itoka Adar.
8 Kemaj Amán okijlij on rey Asuero:
—Noueyirey, de nochimej on kalpanmej yejuan onokej ipan in uejueyitlalpanmej kampa tejua titlamandaroua, nemij tlakamej yejuan xijki nouikaj kenon oksekimej tlakamej. On tlakamej kipiyaj sesentlamantikej leyes, niman xkintlakamatij motlanauatiluan. Yejua ika tej, noueyirey, in tlakamej yejuan nemij kampa tejua titlamandaroua, noneki mikiskej. 9 Niman tla tejua noueyirey tikita kuajli, xtlali sen tlanauatijli yejuan kijtos para ma kinmiktikan nochimej on tlakamej. Niman nejua nikinmakas 330 mil kilos de plata motlapeliuikauan para ma kitlalikan kampa onkaj motesoros.
10 Kemaj on rey okinokixtilij ianillo niman okimakak Amán, yejuan kintlauelitaya on judíos, 11 niman ijkin okijlij:
—Maski, maka xnechmaka on plata, niman on tlakamej yejuan tikinteneua uelis tikinchiuilis tlen tejua tiknekis.
12 Ipan on tonajli majtlaktli uan yeyi, de on achtoj metstli de on xipan, okimintekuitlankej itlajkuilojkauan on rey para okijkuilojkej itlanauatiluan on tlakatl Amán para kintitlaniliskej on gobernadores yejuan tlamandarouayaj ipan on uejueyitlalpanmej, niman on tekiuajkej ipan cada nación. Niman no, para kintitlaniliskej on tekiuajkej de cada nación. In tlanauatiltin okijkuilojkej ikan itlajtol cada ueyitlalpan niman cada kalpan, niman yayaj ikan ifirma niman isello on rey Asuero. 13 Kemaj, okintitlankej tlakamej para ma kinkajkauatij on amatlanauatiltin ipan nochi on uejueyitlalpanmej kampa tlamandarouaya on rey Asuero. Ipan on tlanauatiltin kijtouaya para ipan on tonajli majtlaktli uan yeyi, de on ika majtlaktli uan ome metstli, yejuan no itoka Adar, ma kinmiktikan nochimej on judíos, san ipan se tonajli. Otlanauatij para ma kinmiktikan telpokamej, ueuentsitsimej, kokonej niman siuamej. Niman no otlanauatij para ma kinkuilikan nochi tlen kipiyayaj. 14 Ijkon tej, on tlanauatijli yejuan okijkuilojkej onochiu sen ley, niman okipanoltijkej ipan miyek amamej para okintitlankej ipan nochimej on uejueyitlalpanmej niman ipan on kalpanmej para ma kimatstiakan tlinon kichiuaskej ipan on tonajli.
15 On rey okiminnauatij on tlakamej para amanaman ma kinkajkauakan on amatlanauatiltin. Niman ipan on ueyikalpan Susa, no okiselijkej on tlanauatijli. Niman chika on rey niman Amán onotlalijkej tlaonij*, on chanejkej ipan on ueyikalpan Susa uej opeu ometlamatij.