On judíos sanoyej onajmankej pampa Amán otlanauatij ma kinmiktikan
4
Ijkuak Mardoqueo okimat ika kinmiktiskej on judíos, onotlakentetsayan pampa sanoyej onajman. Okitlalij ajmankatlakentli*, okinotemilij tlikonextli ipan itsontekon, niman kemaj okis ipan on ueyikalpanojtli chikauak ajmankatsajtsitinemiya. 2 Niman ijki oajsik hasta ikalakiyan on palacio, pero xokalakito pampa xakaj kauiliayaj ma kalaki yejuan kitlalijtiu ajmankatlakentli*. 3 No ijki, nochiuiyan ipan on uejueyitlalpanmej kampa oajsik itlanauatil on rey, sanoyej onajmankej on judíos. Niman nosauayaj, chokayaj, ajmankatsajtsiyaj, niman miyekej kitlaliayaj iminajmankatlaken niman notekayaj ipan tlikonextli.Ester okimpaleuij on judíos
4 On siuamej yejuan kitekichiuiliayaj on reina Ester, niman on eunucos yejuan nochiuiyan cuidarojtinemiyaj, okilijkej Ester on tlen kichiua Mordoqueo. Niman on reina sanoyej onajman, niman okontitlanilij Mardoqueo sen tlakentli* para ma kipatla on ajmankatlakentli yejuan kitlalijtikatka, pero yejua xokiselij. 5 Kemaj Ester okitekuitlan Hatac, on eunuco* yejuan on rey okitlalij para kitekichiuiliaya on reina, niman okinauatij para ma kitlajtoltiti Mardoqueo tlinon nochijtikatka noso tline ijkon ajmana. 6 Hatac oyaj okinotsato Mardoqueo kampa nemiya ipan on plaza ixpan ikalakiyan on palacio. 7 Niman Mardoqueo okijlij nochi tlinon nochijtikatka. Niman okijlij kech plata kinekiya kitemakas Amán ipan itesoros on rey, para ma kinmiktikan nochimej on judíos. 8 No ijki, okimakak se on amatlanauatijli yejuan okichayajkej ipan on ueyikalpan Susa, kampa kijtoua para ma kinmiktikan nochimej on judíos. On amatlanauatijli okimakak para ma kimaka Ester, para ijkon Ester ma kimatstia nochi tlinon nochijtikatka. Niman no okijlij para Ester ma uiya ma kijliti on rey para maka ma kitekauili ma kinmiktikan on judíos, yej ma kinmikneli.
9 Kemaj Hatac onokuep, niman okitlajtlajtouilij Ester nochi on tlen Mardoqueo okijlij. 10 Kemaj Ester oksejpa okititlan Hatac para ijkin ma kijliti Mardoqueo: 11 “Nochimej itekitkauan on rey, niman nochimej yejuan chantij ipan on uejueyitlalpanmej kampa yejua tlamandaroua, kimatstokej ika onkaj sen ley, para san akinon, siuatl noso tlakatl, yejuan kalakis ikiauak on palacio kampa on rey tlamandaroua para kinekis kitas on rey ijkuak yejua xkitekuitlani, ika onkaj mikis. San nomanauiya on yejuan on rey kontelkechilia on itopil* de oro, para ijkon nesi ika kiknelia niman xkimiktis. Niman nejua ye kipiya se metstli ika on rey nion xnechajtekuitlani.”
12 Ijkuak Mardoqueo okijlitoj on tlen Ester okijtoj, 13 yejua oksejpa okititlan in tlajtojli para Ester: “Maka xnemili tla pampa tinemi ipan ipalacio on rey, san tejua tihebrea yejuan timomanauis. 14 Tla aman xitlaj* tikijtos, on judíos uelis oksekneka nomanauiskej, pero tejua iuan ifamiliaj motajuan nenmikiskej. ¡Pero manin, yej otajsik reina para titechmanauis ipan in mikilistli!”
15 Kemaj Ester ijkin okinankilij Mardoqueo: 16 “Xuiya xkinsentlaliti nochimej on judíos yejuan chantij nikan Susa, niman xkinmijli ma nosauakan nopampa. Maka itlaj kikuaskej, nion itlaj koniskej yeyi tonajli niman yeyi yeuajli. Niman nejua niman on siuamej yejuan nechtekichiuiliaj no ijki tikchiuaskej. Niman kemaj nias nikontas on rey, maski xniktlakamatis on ley. Niman tla nechmiktiskej, ma nechmiktikan.”
17 Ijkon tej, Mardoqueo oyaj niman okichiu nochi ken Ester okinauatij.