Ester oyaj ixpan on rey
5
Ipan yeyi tonajli, Ester okinotlaliltij on itlaken de reina, niman oyaj okalak ipan ikiauak on palacio. Kemaj onoteltij ixpan on kalijtik kampa on rey yeuatikatka ipan itrono imelajkan on kiauatenko. 2 Ijkuak on rey okitak on reina Ester ipan on kiauak, sanoyej opak, niman okontelkechilij on itopil* de oro yejuan kipiyaya ipan ima. Kemaj Ester okinisiuij on rey niman okimatokak ikuayaka on itopil, 3 niman on rey okitlajtoltij:—¿Tlinon tikneki, reina Ester? Xnechtlajtlanili nochi tlinon tiknekis. Hasta tlajkotipan kampa nitlamandaroua nimitsmakas tla tejua tikneki.
4 Niman Ester okinankilij: —Tla tejua noueyirey tikita kuajli, nimitstlajtlanilia xuiya ipan on iluitl yejuan nikchiua aman para tejua, niman no xkuika Amán.
Kemaj on rey nimansin ijkin otlanauatij:
5 —Nimantsin xtejtemokan Amán, niman ma nochiua on tlen on reina Ester kineki kichiuas.
Ijkon tej, on rey niman Amán oyajkej ipan on iluitl yejuan okichiu on reina Ester. 6 Niman chika tlakuayaj niman tlaoniyaj, on rey ijkin okijlij Ester:
—¡Xnechtlajtlanili nochi tlinon tiknekis. Hasta tlajkotipan kampa nitlamandaroua nimitsmakas tla tejua tikneki.
7 Niman Ester okinankilij:
—Nejua san yejua in nimitstlajtlanilia: 8 Tla tejua noueyirey tinechtlajsojtla*, niman tla tiknekis tikchiuas tlinon nimitstlajtlanilis niman tinechmakas tlinon niknekis, tla ijkon, xuajla mostla iuan Amán ipan okse iluitl yejuan nikchiuas para tejua. Kemaj nimitsijlis tlinon nikneki.
Amán okitlalij kampa kechpiloskej Mardoqueo
9 Amán sanoyej iyolika nemiya niman uajpaktiaya ijkuak ouajkis ipan on iluitl, pero ijkuak okitak ika Mardoqueo yeuatikatka ikiauatempan on palacio niman xonotelkets, nion xokitlakaitak ijkuak ixpan opanok, sanoyej okualan. 10 Pero maski sanoyej okualan, nion xokiteititij. Niman ijkuak oajsik ichan, amanaman okintekuitlan itlajsojkaikniuan* niman Zeres, on isiuau. 11 Kemaj opeu kinmijlia ika sanoyej miyek kipiya riquezas niman kimpiya miyekej ikoneuan. Niman no okinmijlij ika para on rey, san yejua más ueyixtikaj xken nochimej on oksekimej itlapaleuijkauan niman itekiuajkauan on rey, pampa okitlalij ipan sen tekitl kampa más ueyixtikaj. 12 Niman no, ijkin okijtoj:
—No ijki, on reina san nejua onechnots ipan on iluitl yejuan aman okichiu para on rey; niman onechijlij para mostla oksejpa ma niuiya ipan okse iluitl yejuan oksejpa kichiuas para on rey. 13 Pero nochi on xnechpaktia, pampa ijkuak nikita on judío Mardoqueo yeuatikaj itech itsakuijlou on palacio, sanoyej nechkualania.
14 Kemaj isiuau niman nochimej on itlajsojkaikniuan* ijkin okijlijkej:
—Xtlanauati ma kitelketsakan sen kojtli para ipan tekechpiloskej. Ma kitlalikan kanaj 25 metros ika tlakpak, niman mostla kualkan xkijli on rey para ompa ma kechpilokan Mardoqueo. Ijkon uelis tias moyolika ipan on iluitl iuan on rey.
Niman Amán okuelkak on tlen okijlijkej, niman otlanauatij ma kitelketsakan on kojtli kampa tekechpilouaj.