Mardoqueo otetlan
6
Sano ipan on tlayoua, on rey xueliya kochi, niman otlanauatij ma kuajkuilikan on amamoxtli* kampa tlajkuilolnestikaj nochi on tlajtlamach* yejuan youajnochijtiaj ipan on nación. Niman on amamoxtli* okinomachtijkej* ompa ixpan. 2 Ipan on amamoxtli* okinextitoj kampa kijtoua ika Mardoqueo okinteixpanuijka Bigtán niman Teres, on omemej tsakuijlotlapixkej yejuan kicuidarouayaj itsakuijlou on rey, pampa okinkak ika kimiktisnekiyaj on rey Asuero.3 Kemaj on rey ijkin otetlajtoltij:
—¿Tlinon ika okitlaxtlauilijkej Mardoqueo niman kenijki okititijkej tlakaitalistli ipampa on tlen kuajli okichiu?
Niman itlapaleuikauan on rey ijkin okinankilijkej:
— Xitlaj okimakakej.
4 Ijkuak on rey tlajtojtikatka, Amán okalakito ipan ikiauak on kajli kampa chantiya on rey, para okitlajtlanilito favor ma kechpilo Mardoqueo ipan on kojtli yejuan otlanauatij ma kitelketsakan. Kemaj on rey otetlajtoltij:
—¿Akinon nemi paon kiauak?
5 On itlapaleuijkauan okinankilijkej:
—Amán, yejua nikan nemi.
Kemaj on rey ijkin otlanauatij:
—Xkijlikan ma kalaki.
6 Ijkuak Amán okalakito, on rey okitlajtoltij:
— ¿Tlinon kuajli noneki kichiuaskej ipampa on tlakatl yejuan nejua nikneki nikueyiteneuas?
Niman Amán, okinemilij: "¿Akinon kineki on rey kiueyiteneuas tla xnejua?" 7 Yejua ika, ijkin okinankilij:
—On tlakatl yejuan tejua tikneki tikueyiteneuas 8 noneki kuajkuiliskej on ueyak tlakentli yejuan tejua tiktlalia toueyirey, niman kuajuikiliskej mocaballo yejuan tejua tiktekitiltia, yejuan kipiya on kuaxochitl kueltsin ipan itsontekon. 9 On ueyak tlakentli* niman on caballo, kimakaskej on tlakatl yejuan más ueyixtikaj kampa titlamanaroua, para yejua kitlakentis on tlakatl yejuan tejua toueyirey tikneki tikueyiteneuas. Niman kemaj, kuikas kompaxaloltis ipan on caballo ipan iplaza in ueyikalpan, niman ijkin chikauak kijtojtias: "¡Ijkin noneki kuikaskej on tlakatl yejuan on rey kineki kiueyiteneuas!"
10 Kemaj on rey okijlij Amán:
—Tla ijkon, amanaman xkuajki on ueyak tlakentli* niman xkuajuika on caballo ken yotikijtoj, niman ijki xtlakenti on judío Mardoqueo yejuan yeuatikaj itech itsakuijlou on palacio. Xchiua nochi ken yotikijtoj. Maka itlaj tikelkauas.
11 Amán okuajkik on ueyak tlakentli* niman okuajuikak on caballo, niman okitlakentij Mardoqueo. Kemaj okuikak okipaxaloltito ipan iplaza on ueyikalpan niman ijkin chikauak kijtojtiaya: "¡Ijkin noneki kuikaskej on tlakatl yejuan on rey kineki kiueyiteneuas!"
12 Ijkuak Mardoqueo yotlan kipaxaloltiaj, oksejpa onotlalito itech itsakuijlou on palacio. Niman Amán, uej ontlaktsak ichan onixtlapachojtiaj pampa sanoyej opinau. 13 Niman ompa okitlajtlajtouilij isiuau niman itlajsojkaikniuan* nochi on tlen ipan onochiu. Niman yejuamej ijkin okijlijkej:
—Tla on tlakatl Mardoqueo yejuan ipampa ye tikpolojtikaj motekiuajyo, sen hebro, tla ijkon, xuelis tiktlanis, yej yejua mitstlanis.
14 Ijkuak saken tlajtlajtojtikatkaj, ompa oajsitetskej itekitkauan on rey para okuikakej Amán ipan on iluitl kampa on reina Ester sa kinchaya.