Amán okitlajtlakolmakakej niman okechpilojkej
7
On rey niman Amán oyajkej ipan on iluitl. 2 Niman ipan on ika ome tonajli de on iluitl, chika on rey niman yejuamej tlaoniyaj, oksejpa ijkin okijlij Ester:—¡Xnechtlajtlanili nochi tlinon tiknekis, hasta tlajkotipan kampa nitlamandaroua nimitsmakas tla tejua tikneki!
3 Niman Ester ijkin okinankilij:
—Tla tejua noueyirey tinechtlajsojtla* niman tikita kuajli, san nimitstlajtlanilia xnechmanauili nonemilis niman innemilis nochanejkauan. 4 Nejua niman nochanejkauan yotechnamakakej para ma techmiktikan niman ma techpopolokan. Tla san technamakaskiaj ken esclavos, nejua xitlaj* nikijtoskia, pero tla techmiktiskej, tejua noueyirey miyek tikpolos.
5 Kemaj, on rey Asuero okitlajtoltij Ester:
—¿Akinon okijtoj ika ijkon kichiuas niman kanon nemi?
6 Niman Ester okinankilij:
—¡On totlauelikniu yejuan techmiktisneki, yejua in xompayejyeua tlakatl Amán!
Ijkuak Amán ijkon okak, xok ouel onolinij pampa sanoyej onomojtij ixpan on rey niman ixpan on reina. 7 Kemaj on rey Asuero sanoyej okualan, niman onotelkets para okisako ipan on kajli kampa tlakuayaj niman oyaj ipan ixochitlan on palacio para otlauelseuito. Pero ijkuak Amán okitak ika on rey yokinemilij kimiktis, onokau ipan on kajli para okiiknotlajtlanilij on reina Ester ma kimanauili inemilis.
8 Ijkuak on rey oksejpa okalakito ne kalijtik kampa tlakuayaj, okitak ika Amán yonotekato ipan on ueyak sillón kampa Ester achi ken onoya pampa noseuijtikatka, niman ijkin okitsajtsilijtiaj:
—¿Aparte de on tlen xkuajli otikchiu, no tikneki ipan tikakalakis on reina nikan nixpan ipan nochan?
Ijkuak on rey ijkon okijtoj, keskimej eunucos* nimantsin okajsikej niman okixtlapachojkej Amán. 9 Niman semej on soldados yejuan itoka katka Harbona, ijkin okijtoj:
—Ichan Amán yokipilojkej sen mekatl kampa tekechpilouaj yejuan pilkak kanaj 25 metros ika tlakpak, yejuan Amán otlanauatij ma kichijchiuakan para ompa kechpiloskia Mardoqueo, on tlakatl yejuan omitsmanauij para xomitsmiktijkej toueyirey.
Kemaj on rey ijkin otlanauatij:
—¡Tla ijkon, yejua ompa xkechpilokan!
10 Ijkon tej, Amán sano yejua okechpilojkej kampa kechpiloskia Mardoqueo. Niman ijki otlauelseu on rey.