Tlanauatijli para onomanauijkej on judíos
8
Sano ipan on tonajli, on rey Asuero okitlayokolij on reina Ester ikal niman tlen iyaxka* katka Amán, yejuan imintlauelikniu katka on judíos. Kemaj Mardoqueo okuikakej itech on rey, pampa Ester yokijlijka ika iprimo. 2 Kemaj on rey okinokixtilij ianillo yejuan okimakaka Amán niman okimakak Mardoqueo. Niman Ester okitlalij Mardoqueo para yejua ma cuidaro nochi on tlen iyaxka* katka Amán.3 Kemaj Ester oksejpa okinots on rey, onotlakuantelkets ixpan niman sanoyej chokaya, niman okitlajtlanilij para makasa ma nochiua on xkuajli tlen Amán otlanauatij ma kinchiuilikan on judíos. 4 Kemaj on rey okontelkechilij Ester on itopil* de oro, niman Ester onotelkets ixpan on rey, niman okijlij: 5
—Tla tejua noueyirey tikita kuajli tlinon nimitstlajtlanilia, niman tla techmelaua tlinon nitlajtlani, niman tla melauak tinechtlajsojtla, xkijkuilo sen tlanauatijli kampa kijtos para makasa ma nochiua on tlen kijtojtiu ipan on amatlajkuiloltin yejuan Amán ikoneu Hammedatha on Agagite okinchayau. Ipan on amatlajkuiloltin kijtojtiu para ma kinmiktikan nochimej on judíos yejuan nemij ipan nochi on ueyitlalpanmej kampa tejua titlamandaroua. 6 ¿Kenijki tej, uelis nikxikos nikitas on tlajyouilistli yejuan uajlau impan nochanejkauan judíos? ¿Kenijki uelis nikxikos nikitas nofamilias kinmiktiskej?
7 Kemaj on rey ijkin okinankilij on reina Ester niman Mardoqueo, on judío:
—Nejua yonikmakak Ester ikal Amán, niman Amán yokechpilojkej pampa kinekiya ma kinmiktikan on judíos. 8 Aman tej, xkijkuilokan tlinon nemejuamej nenkinekiskej ikan notoka, para nenkinmanauiskej on judíos. Niman on amatlajkuiloltin xkintlalilikan nosello, pampa nochi on amatlajkuiloltin yejuan kuika nofirma niman nosello, ika onkaj nochiuas tlinon ompa kijtojtiu.
9 Kemaj, nimantsin okintekuitlankej itlajkuilojkauan on rey. In onochiu ipan on tonajli 23 de on ika yeyi metstli, yejuan no itoka Siván. Nochi tlinon okijtoj Mardoqueo, okijkuilojkej para on judíos, para on gobernadores ipan on regiones niman ipan on uejueyitlalpanmej, niman para nochimej on tekiuajkej yejuan nemiyaj ipan on 127 uejueyitlalpanmej. On uejueyitlalpanmej pejtoyaj desde on país itoka India, niman ontlamiya hasta on país Etiopía. Niman on amatlajkuiloltin okinmijkuilojkej ikan itlajtol cada ueyitlalpan, niman on judios no okintlajkuiluijkej ikan yejuamej imintlajtol. 10 On amatlajkuiloltin okinmijkuilokej ikan itoka on rey Asuero niman okintlalilijkej isello on rey. Kemaj Mardoqueo okintitlan tlakamej yejuan yetiuij ipan caballos yejuan sanoyej tlaksaj yejuan iyaxkauan* on rey.
11 Ipan on amatlajkuiloltin kijtojtiu ika on rey kinkauilia on judíos ipan nochi on uejueyikalpanmej para ma nosentlalikan niman ma teixnamikikan para ma nomanauikan. No okinmijlij ika kinkauiliaj ma kinmiktikan niman ma kintlaxoxotonilikan nochimej on yejuan uajlaskej de oksekimej kalpanmej noso de oksekimej uejueyitlalpanmej yejuan kinekiskej kinmiktiskej yejuamej, insiuauan noso inkokoneuan. Niman no okinmijlij ika kinkauiliaj ma kinoyaxkatikan nochi tlen iminyaxka on imintlauelikniuan. 12 Okinmijlij ika nochi in nochiuas san ipan se tonajli ipan nochi on uejueyitlalpanmej de on rey Asuero, ipan on tonajli majtlaktli uan yeyi, de on ika majtlaktli uan ome metstli, yejuan no itoka Adar. 13 Itlanauatil on rey, okimachistikej nochi tlakatl ipan nochimej naciones kampa on rey tlamandaroua, para on judíos ma nemikan listos ipan on tonajli para kintlakuepiltiskej imintlauelikniuan. 14 On rey okiminnauatij on tlakamej yejuan kinkajkauaj on amatlajkuiloltin para amanaman ma uiyan ma kinkauatij on amatlajkuiloltin. On tlakamej oyajkej ipan caballos yejuan sanoyej tlaksaj yejuan iyaxkauan* on rey. Niman ipan on ueyikalpan Susa, no okitemakakej on tlanauatijli.
15 Mardoqueo ouajkis ipan on palacio, kuajtlalijtiaya sen ueyak tlakentli* Azul iuan istak ken notlakentia sen rey. Niman kuajtlalijtiaya sen ueyi corona de oro niman sen tlakenpani de lino yejuan achi chichiltik ken morado. Niman ijkuak on chanejkej ipan on ueyikalpan Susa okitakej, sanoyej opakatsajtsikej. 16 Para on judíos, sanoyej ueyi tonajli katka, pampa xok onomojtikej, yej onomatkej ikan miyek pakilistli, yolpakilistli niman tlakaitalistli. 17 Ipan cada ueyitlalpan niman cada ueyikalpan, niman nochiuiyan kampa oajsik itlanauatil on rey, on judíos sanoyej opakkej, otlakualchijkej niman oiluichijkej. Niman miyekej chanejkej ipan on países onochikej judíos pampa sanoyej kinmakajsiyaj on judíos.