Ester 9

On judíos otetlankej

Ipan on tonajli majtlaktli uan yeyi, de on ika majtlaktli uan ome metstli, yejuan itoka Adar, ijkuakon kitocarouaya nochiuas on tlen otlanauatij on rey. Sano ipan on tonajli, imintlauelikniuan on judíos kuitiayaj kinmiktiskiaj, pero xijki onochiu. Yej on judíos tepan oyajkej niman otetlankej. 2 Ipan nochi iuejueyitlalpanuan on rey Asuero, on judíos onosentlalijkej ipan on uejueyikalpanmej kampa chantiyaj para okinmixnamikkej on yejuan kinekiyaj kinmiktiskej. Pero xakaj ouel okinuijsok pampa nochimej sanoyej okiminmakaskej. 3 Nochimej on tekiuakej, on gobernadores ipan on uejueyitlalpanmej, on uejueyitlayekankej, niman itlapeliuikauan on rey okimpaleuijkej on judíos pampa okimakaskej Mardoqueo. 4 Okimakaskej pampa Mardoqueo yoajsika sanoyej ueyixtikaj ipan ipalacio on rey, niman sanoyej okixmatkej ipan nochimej on uejueyitlalpanmej, niman mojmostla kajsitiaya más poder

5 On judíos okinmiktijkej nochimej imintlauelikniuan ikan espada, niman okinchiuilijkej ken yejuamej okinekkej. 6 San ipan on ueyikalpan Susa, on judíos okimiktijkej makuijli ciento tlakatl. 7-10 No teuan okimiktijkej in majtlaktlimej ikoneuan Amán, ikoneu Hannedata, yejuan imintlauelikniu katka on judíos: Parsandata, Dalfón, Aspata, Porata, Adalía, Aridata, Parmasta, Arisai, Aridai niman Vaizata. Pero on judíos xokinoyaxkatijkej on tlajtlamach tlen iminyaxka katka ikoneuan Amán.

11 Ipan on tonajli, ijkuak on rey okimat ika miyek tlakatl yokimiktijkej ipan on ueyikalpan Susa, 12 ijkin okijlij on reina Ester:

—Tla on judíos yokimiktijkej makuijli ciento tlakatl ipan in ueyikalpan Susa, niman no yokinmiktijkej on majtlaktlimej ikoneuan Amán, kijtosneki, ika ipan on oksekimej ueyitlalpanmej kampa nitlamandaroua, más sanoyej miyek tlakatl yokimiktijkej. Pero xnechijli tlinon más tikneki ma nochiua, niman nejua nitlanauatis para ma nochiua.

13 Niman Ester ijkin okinankilij:

—Tla tejua tikita kuajli noueyirey, xkinkauili on judíos yejuan nemij ipan in ueyikalpan Susa para mostla oksejpa ma kichiuakan on tlen otikinnauatij ma kichiuakan aman, niman xkinkauili ma kinkechpilokan inmikatlalnakayo on majtlaktlimej ikoneuan Amán.

14 Niman on rey otlanauatij para ijki ma nochiua. Ipan on ueyikalpan Susa okiminnauatijkej tlinon kichiuaskej, niman on majtlaktlimej ikoneuan Amán okinajkopilojkej inmikatlalnakayo.

15 Ijkon tej, on judíos yejuan chantiyaj ipan on ueyikalpan Susa, oksejpa onosentlalijkej ipan on tonajli majtlaktli uan naui, de on metstli Adar. Niman ompa ipan on ueyikalpan, okimiktijkej okse yeyi ciento tlakatl, pero xokinkuilijkej on tlajtlamach* tlen iminyaxka katka.

16-17 On judíos yejuan chantiyaj ipan oksekimej uejueyitlalpanmej, onosentlalijkej ipan on tonajli majtlaktli uan yeyi, ipan on metstli de Adar, para onomanauijkej niman para okinmiktijkej imintlauelikniuan. Okinmiktijkej 75 mil tlakamej, pero xokinkuilijkej on tlajtlamach* tlen iminyaxka katka. Niman ipan on tonajli majtlaktli uan naui, onoseuijkej niman otlaluichijkej ikan miyek paktli pampa otetlankej.

18 Pero on judíos yejuan chantiyaj ipan on ueyikalpan Susa, uej onosentlalijkej para onomanauijkej de imintlauelikniuan ipan on tonajli majtlaktli uan yeyi niman ipan on tonajli majtlaktli uan naui. Kemaj onoseuikej ipan on tonajli majtlaktli uan makuijli niman otlaluichijkej ikan miyek paktli. 19 Yejua ika tej, on judíos yejuan chantij ipan on kalpanmej niman ipan on kalpantsitsimej yejuan xyeualtsakutokej ikan tepanchinantli, iluichiuaj ipan on tonajli majtlaktli uan naui, de on metstli de Adar. Tlaluichiuaj ikan miyek paktli niman notlatlayokoliaj tlakauajli. 20 Mardoqueo okijkuiloj nochi in tlen onochiu. Kemaj okintitlanilij amatlajkuiloltin nochimej on judíos yejuan chantiyaj nochiuiyan ipan on uejueyitlalpanmej kampa on rey Asuero tlamanarouaya. 21 Okiminnauatij para ma tlaluichiuakan cada xipan ipan on tonajli majtlaktli uan naui niman ipan on tonajli majtlaktli uan makuijli, de on metstli de Adar. 22 Ijkon okinnauatij pampa ipan on tonaltin, on judíos okinmiktijkej imintlauelikniuan, niman on ajmantli niman on chokistli yejuan kipiyayaj onokuep paktli. Niman no okiminnauatij ma notlayokolikan tlajtlamach*, niman no ma kinmakakan tlanechikoltin on yejuan mayankej. 23 On iluitl yejuan okipeualtijkej kichiuaj on judíos, ijki opeu nomatstiuij nochipa kichiuaj ken Mardoqueo okiminnauatij. 24 Ijkon onochiu pampa Amán, ikoneu Hammedata agagueo, yejuan imintlauelikniu katka on judíos, yokinemilijka kinmiktiskia nochimej on judíos, niman yokichijka suertes para okitak ipan tlen tonajli kinmiktiskia nochimej on judíos. 25 Pero ijkuak Ester oyaj itech on rey, on rey otlanauatij ikan amatlajkuiloltin para on tlen Amán xkuajli kinchiuiliskia on judíos, yej yejua ijki ma kichiuilikan. Niman Amán iuan ikoneuan okinkechpilojkej. 26 (Yejua ika tej, in tonaltin okintokayotijkej "Purim", pampa on suertes yejuan okichijkej itoka "Pur".)

Ipampa on amatlajkuilojli yejuan Mardoqueo okijkuiloj niman ipampa nochi on tlen okipanokej, 27 on judíos okitlalijkej sen tlanauatijli para yejuamej, iminuejkakoneuan niman para nochimej yejuan nochiuaskej judíos. Okijtojkej ika nochipa cada xipan tlaluichiuaskej ipan in ome tonajli de on metstli ijkon ken Mardoqueo okitlajkuiloltlalij ipan on amatlajkuilojli. 28 Otlanauatijkej para ipan cada familia, cada ueyitlalpan niman cada ueyikalpan, on iminuejkakoneuan on judíos nochipa ma kelnamikikan in tonaltin niman ma tlaluichiuakan para maka kaman kelkauaskej.

29 On reina Ester, ichpoch Abihail, iuan Mardoqueo, on judío, okichijchijkej okse amatlajkuilojli. Ipan on amatlajkuilojli Ester okitekitiltij itekiuajyo kampa oksejpa okiteijlijkej kamanon kichiuaskej on iluitl "Purim". 30 Niman okintitlanilijkej nochimej on judíos ipan on 127 uejueyitlalpanmej kampa on rey Asuero tlamandarouaya. Ipan on amatlajkuiloltin, on judíos okiminnotskej ikan yoltlalijli niman ikan tetlajsojtlalistli*. 31 No ijki, on judíos okinmijlijkej para yejuamej iuan iminuejkakoneuan ma kichiuakan on iluitl "Purim", yejuan Mardoqueo niman on reina Ester yokinmijlijkaj kamanon kichiuaskej. No ijki, ipan on tlanauatijli okiminnauatijkej on judíos para ma nosauakan niman ma noyolkokokan. 32 Ipan itlanauatil, on reina Ester okichikajkaijtoj kenijki nochiuas on iluitl "Purim". Niman nochi on tlen onochiu okijkuilojkej ipan sen amamoxtli*.