Nehemías okinkajkaualtij on israelitas on tlen xkuajli kichiuayaj
13
Ipan on tonajli okinomachtijkej* amamoxtli de Moisés* inmixpan nochimej on israelitas. Niman ipan on amamoxtli* okinextitoj kampa kijtoua ika on amonitas niman on moabitas maka kaman noneloskej iminuan itlapejpeniluan Dios. 2 (Ijkon kijtoua, pampa yejuamej xokinselitoj on israelitas ikan tlakuajli niman atl ijkuak yejuamej apismikiyaj niman amikiyaj. Yej okitlaxtlauilijkej Balam para ma kintlaueliti. Pero toDios yej okintiochiu on israelitas.) 3 Ijkon tej, ijkuak okakkej ken kijtoua on ley, okinmejkuanijkej intech on israelitas nochimej on yejuan xchanejkej.4 Achtoj, ijkuak xe kinkakistiliayaj on ley, on tiopixki Eliasib yejua tekitiya ipan on kaltlayejyeualoltin ipan iueyitiopan toDios. Niman pampa Eliasib ken kitaya Tobías, 5 okimakak sen kalijtik ueyi kampa achtoj keuayaj on uentomin, on kopajli, on tlajtlamach yejuan notekitiltia ipan on ueyitiopan, on diezmo de trigo, de vino niman de aceite, yejuan kiminmakayaj on levitas, on nokuikatijkej niman on tsakuijlotlajpixkej. Niman no, ompa keuayaj on tlen ika kintlaxtlauiliayaj on tiopixkej. 6 In onochiu ijkuak nejua xninemiya Jerusalén, pampa ipan on xipan 32 ijkuak on rey Artajerjes yejua tlamandarouaya ne Babilonia, nejua oksejpa oniaj itech. Pero sakin, oniktlajtlanilij ma nechkauili 7 para oksejpa nias Jerusalén. Niman ijkuak oninokuep Jerusalén, onikmat ika Eliasib okichiu tlen xkuajli ika okimakak Tobías sen kalijtik yejuan onkaj ipan ikiauak iueyitiopan Dios. 8 On tlen okichiu Eliasib sanoyej onechkualanij, niman onikinuajxinij kiauak nochi on tlen Tobías kipiyaya ipan on kalijtik. 9 Kemaj onitlanauatij ma kinchipauakan ixpan Dios on kalijtikej. Niman no onitlanauatij para oksejpa ompa ma kintlalikan on tlajtlamach*yejuan notekitiltiaj ipan iueyitiopan Dios, iuan on uentin de trigo niman on kopajli.
10 No onikmat ika on levitas xkiminmakayaj tlen kikuaskej. Yejua ika, on levitas niman on yejuan nokuikatiayaj ijkuak kimauistiliayaj toTEKO, oyajyajkej. Cada se oyaj ipan imintlal kampa achtoj chantiya. 11 Kemaj nejua, onikinmajuak on tekiuajkej pampa xok ipan otlachixkej iueyitiopan Dios. Sakin, onikinsentlalij on tiopixkej niman on levitas, niman onikintlalij ipan intekiu. 12 Niman kemaj nochimej on chanejkej ne Judá okiktikej ipan on kaltlayejyeualoltin on diezmo* de trigo, de vino niman de aceite. 13 Kemaj ipan on kaltlayejyeualoltin onikintlalij yejuan ompa tekitiskej. Oniktlalij on tiopixki Selemías, on tlajkuilojketl Sadoc niman sen levita yejuan itoka Pedaías. No, ompa oniktlalij Hanán, (ikoneu Zacur, ixuiu Matanías), para ma kimpaleui. Nochimej in onikintlalij ompa pampa kuajli nikimpiyaliaya noyojlo. Yejuamej onikintekiutij para kinxelouiliskej on oksekimej tiopixkej niman on levitas on tlen kikuaskej. 14 Kemaj ijkin onikijlij Dios: "¡NoDios, maka tikelkauas nochi on tlen yonikchiu, niman maka tikelkauas nochi on tlen kuajli onikchiu ipampa moueyitiopan niman para momauistilis.
15 Ipan on tonaltin onikitak ika ne Judá nemiyaj yejuan ipan on tonajli sábado kipaxouayaj uvas ika inmikxiuan para kichijchiuayaj vino. Sekimej kisasakayaj trigo yejuan yokisasalojkej, niman kintlamamaltiayaj impolokouan ikan vino, ikan imatlakyouan uvas, higos niman okseki tlajtlamach, niman ijkuak sábado kiktiyaj ne Jerusalén. Kemaj, nejua onikinmajuak pampa tlanamakayaj ijkuak sábado. 16 No ijki, sekimej yejuan ualeuayaj ipan on ueyikalpan Tiro niman chantiyaj ne Jerusalén, kinamakayaj michimej niman okseki tlajtlamach, niman kintlanamakiltiayaj on judíos ipan on tonajli sábado. 17 Kemaj, nejua onikinmajuak on tlayekankej de Judá, onikinmijlij:
—¿Tlen xnenkimatij ika nenkijtlakouaj on tonajli sábado? 18 In no yejua ika otlajtlakojkej nemoachtojtajuan. Yejua ika, toDios okuajtitlan tlamach tlen xkuajli topan niman ipan in ueyikalpan. ¿Tlen nenkinekij para Dios más ma kualani niman más ma castigaro Israel pampa nentekitij ijkuak sábado?
19 Kemaj onitlanauatij para cada viernes tiotlak ijkuak ye ixtlatlakatsajtikaj ma kintsakuakan iueyitsakuijlouan on ueyikalpan Jerusalén, niman ma ka tlatlapokan hasta ijkuak yopanok on tonajli sábado. No ijki, ijkuak sábado onikintlalij keskimej notekitkauan ipan on uejueyitsakuijlomej para maka yakaj kauiliskej ma kalaki ikan on tlen kinekis kinamakas. 20 On yejuan tlakouayaj niman on yejuan tlanamakayaj keskipa xokalakkej ipan on ueyikalpan Jerusalén, yej ijkuak tlayoua ompa nokauayaj kaltenko. 21 Pero nejua onikinmixtlaloltij pampa nokauayaj kiauak de on tepanchinantli, niman onikijmijlij tla xtlakakij, nitlanauatis ma kintsakuakan ipan cárcel. Niman desde ijkuakon xokaman oualakej ijkuak sábado. 22 Sakin, onikinnauatij on levitas ma nochipauakan ixpan Dios niman ma tlajpiyakan ipan on uejueyitsakuijlomej, para ijkon on tonajli sábado xkijtlakoskej. Kemaj ijkin onikchiu oración: ¡NoDios, xnechelnamiki ipampa in tlen nikchiua, niman xnechikneli ikan motetlajsojtlalis!
23 No ijki ipan on tonaltin onikitak ika sekimej Judíos yononamiktijkaj iminuan siuamej yejuan ualeuayaj ipan on países Asdod, Amón niman Moab. 24 Niman tlajkotipan inkoneuan tlajtouayaj ikan on tlajtojli de on país Asdod niman de oksekimej países, pero xueliyaj tlajtouayaj ika intlajtol* on judíos. 25 Niman nejua onikinmajuak on tlakamej niman onikintlauelij. Oksekimej onikinmajmailij niman hasta onikintsonuiuitlak. Niman onikinchiualtij ma notlajtolmakakan ixpan Dios, ika yejuamej niman inkoneuan xokaman nonamiktiskej iminuan on yejuan xchanejkej. 26 Niman no onikinmijlij: “Salomón, on rey de Israel, no ijki otlajtlakoj ken nemejuamej yonentlajtlakojkej. Niman maski xonen okse rey ken yejua, niman Dios sanoyej okitlajsojtlak niman okitlalij ken rey ipan nochi Israel, on siuamej xchanejkej okichijkej para ma tlajtlako. 27 Yejua ika tej, tejuamej xok temechkauiliskej xchiuakan in xompayejyejualistli ika nemonamiktiaj iminuan siuamej yejuan xchanejkej, para maka más nentlajtlakoskej ixpan Dios.”
28 Sen ikoneu Joiada, ikoneu on ueyitlayekankitiopixki Eliasib, imon katka Sanbalat, on horonita. On tlakatl oniktotokak uejka de Jerusalén. 29 Kemaj ijkin onikchiu oración: ¡NoDios, tejua xkincastigaro on tiopixkej niman on levitas yejuan okijtlakojkej on tiopixkatekitl niman on pacto yejuan okichijkej mouan!
30 Ijkon tej, onikinkixtij nochimej on yejuan xchanejkej pampa kiteitiaj on tlen xkuajli kichiuaj. Niman on tiopixkej niman on levitas onikinnauatij ken nopatlatiaskej ijkuak tekitiskej. Cada se oniktlalij ipan itekiu. 31 No onikinnauatij para ipan on tonaltin yejuan ye kimatstokej, ma kisentlalikan on kojtli yejuan tlatlas ipan itlaixpan toTEKO, niman no, ma kisentlalikan on achtoj tlakyotl.
Kemaj ijkin onikchiu oración: "¡NoDios, xnechtiochiua ipampa nochi on tlen yonikchiu!"