On tiopixkej niman on levitas
12
In yejuamej on tiopixkej niman levitas yejuan okiskej Babilonia para Judá iuan Zorobabel, ikoneu Salatiel, niman iuan on ueyi tlayekanki tiopixki Josué:On yejuan tiopixkej yejuamej in katkaj:
Seraías, Jeremías, Esdras,
2 Amarías, maluc, Hatús,
3 Secanías, Rehum, Meremot,
4 Ido, Gineto, Abías,
5 Mijamín, Maadías, Bilga,
6 Semaías, Joiarib, Jedaías,
7 Salú, Amoc, Hilcías niman Jedaías.
In yejuamej intlayekankauan katkaj on tiopixkej niman yejuan ken kintayaj, ipan on tonaltin ijkuak Josué nemiya.
8 On levitas yejuan onokuepkej yejuamej in katkaj: Josué, Binuy, Cadmiel, Serebías, Judá niman Matanías, yejuan kinyekanayaj on kuikamej ijkuak kuikatlaliayaj Dios. 9 Bacbuquías, Uni, niman oksekimej levitas, no nokuikatiayaj para iminuan nonankilijtiayaj.
10 Josué itataj katka de Joiacim, Joiacim itataj katka de Eliasib, Eliasib itataj katka de Joiada, 11 Joiada itataj katka de Johanán, niman Johanán itataj katka de Jadúa.
12 Ipan on tonaltin ijkuak nemiya Joiacim, on tiopixkej yejuan tlayekankej katkaj ipan infamilias yejuamej in katkaj:
Ipan ifamilia Seraías, tlayekanki katka Meraías;
ipan ifamilia Esdras, tlayekanki katka Mesulam;
ipan ifamilia Melicú, tlayekanki katka Jonatán;
ipan ifamilia Harim, tlayekanki katka Adna;
ipan ifamilia Ido, tlayekanki katka Zacarías;
ipan ifamilia Abías, tlayekanki katka Zicri;
ipan ifamilia Bilga, tlayekanki katka Samúa;
ipan ifamilia Joirarib, tlayekanki katka Matenai;
ipan ifamilia Salai, tlayekanki katka Calai;
ipan ifamilia Hilcías, tlayekanki katka Hasabías;
niman ipan ifamilia Jedaías, tlayekanki katka Natanael.
22 Ijkuak Darío, on rey de Persia tlamandarouaya, okijkuilojkej sen amatlatekpantli de on tlayekankej ipan infamilias on tiopixkej niman levitas. In onochiu ipan on tonaltin ijkuak Eliasib, Joiada, Johanan niman Jadúa ueyi tlayekankej tiopixkej katkaj. 23 On levitas yejuan tlayekankej katkaj ipan infamilias, okinmijkuilojkej ipan on amamoxtli kampa kijkuilouayaj tlinon nochiuaya mojmostla hasta ijkuak nemiya Johanán, ikoneu Eliasib. 24 On tlayekankej intech on levitas katkaj: Hasabías, Serebías, Josué, Binuy niman Cadmiel. Niman on oksekimej levitas iminuan nonankilijtiayaj, niman ijkon kuikatlaliayaj niman kimakayaj tlaxtlauilij Dios ijkon ken otlanauatij David itekitkau Dios.
25 Niman on yejuan tsakuijlotlajpixkej yejuamej in katkaj: Matanías, Bacbuquías, Obadías, Mesulam,Talmón niman Acub. Yejuamej okintlajpixkej on kaltlayejyeualoltin yejuan onkaj nisiu on ueyitsakuijomej. 26 Nochimej in, onenkej ipan on tonaltin ijkuak nemiya Joiacim, ikoneu Josué niman ixuiu Josadac, niman no, ijkuak nejua Nehemías nigobernador katka, niman ijkuak nemiya on tiopixki niman temachtijketl Esdras.
Kiyaxkatiaj* toTEKO on tepanchinantli
27 Ijkuak oyejkok on tonajli para kiyaxkatiskej toTEKO on tepanchinantli de Jerusalén, okiminnotskej on levitas nochiuiyan kampa chantiyaj, niman okinuikakej ipan on ueyikalpan Jerusalén para otlaluichijkej ikan paktli niman ikan kuikamej de tlaxtlauijli, niman otlatsotsonkej ikan címbalos, arpas niman liras. 28 Niman on levitas yejuan nokuikatiayaj, yejuan chantiyaj nisiu Jerusalén, no oyajkej. Niman no oyajkej yejuan chantiyaj ipan on kalpantsitsimej de on ueyikalpan Netofa, 29 de Gilgal, de iixtlauayo on ueyikalpan Geba niman de Azmavet, pampa on levitas yejuan nokuikatiayaj yokinchijchijkaj kalpantsitsimej iyeualkan Jerusalén. 30 Kemaj on tiopixkej niman on levitas onochipajkej ixpan Dios, niman no okinchipajkej on israelitas, on uejueyitsakuijlomej de on ueyikalpan, niman on tepanchinantli.
31 Sakin, on tekiuajkej de Judá onikinnauatij ma tlejkokan ipan on tepanchinantli. Niman oniktlalij para tlayekanaskej ome ueyi grupo yejuan nokuikatiskej niman nejnemiskej ipan on tepanchinantli. On achtoj grupo oyaj tlayekmakopa kampaka onkaj on ueyitsakuijlotl yejuan itoka Tlajsolchapaniloyan. 32 Niman Osaías iminuan tlajkotipan de on tekiuajkej de Judá yayaj inkuitlapan on nokuikatijkej. 33 On nokuikatijkej imintoka katka: Azarías, Esdras, Mesulam, 34 Judá, Benjamín, Semaías niman Jeremías. 35 No iminuan yayaj chikomemej tiopixkej yejuan tlapitstiayaj. Yejuamej intoka katkaj: Zacarías, ikoneu Jonatán, ikoneu Semaías, ikoneu Matanías, ikoneu Micaías, ikoneu Zacur, niman ikoneu Asaf. 36 Niman no, ompa yayaj yejuan ken kintayaj on tiopixkej, yejuan imintoka katka: Semaías, Azarael, Milalai, Gilalai, Maai, Natanael, Judá niman Hanani. Yejuamej in kintsotsontiayaj on tlapitsaltin kenon yejuan okimpix David, itekitkau Dios. Niman on temachtijketl Esdras yejua kinyekanaya ipan on tepanchinantli. 37 Ijkuak oajsikej ikuatipan on ueyitsakuijkotl yejuan itoka Iueyitsakuijou on Pila, onejnenkej más tlayakapan ipan on tepanchinantli, niman otlejkokej ipan iescaleras on Iueyikalpan David. Niman opanokej tlakpakopa de ipalacio David, hasta oajsikej kampa onkaj on ueyitsakuijlotl yejuan itoka Iueyitsakuijlou Atl, yejuan onkaj kampaka ikisayan tonaltsintli.
38 On ika ome nokuikatijkej oyaj tlaopochmakopa ipan on tepanchinantli, niman nejua niaya inkuitlapan iminuan on okse tlajkotipan tekiuajkej. Otinejnenkej desde kampa onkaj on torre itoka Hornos, niman otajsikej hasta kampa ipatlajkan on tepanchinantli. 39 Kemaj otipanokej inkuatipan on uejueyitsakuijlomej yejuan intoka Iueyitsakuijlou Efraín, Iueyitsakuijlou Jesana niman Inueyitsakuijlou Michimej. Niman no otipanokej kampa onkaj on torre itoka Hananel niman on torre itoka Cien, hasta otajsikej kampa onkaj on ueyitsakuijlotl yejuan itoka Inueyitsakuijlou Borregos. Niman otitoteltitoj itech on ueyitsakuijlotl yejuan itoka Inueyitsakuijlou on Tlajpixkej. 40 Kemaj on ome grupo yejuan nokuikatiayaj okalakkej ijtik on ueyitiopan, niman onotelketskej kampa kintocarouaya nemiskej. Niman nejua no onikalak iminuan on okse tlajkotipan tekiuajkej yejuan nouan yayaj.
41 On tiopixkej yejuan tlapitstiayaj katkaj: Eliacim, Maaseías, Miniamín, Micaías, Elioenai, Zacarías, Hananías. 42 On nokuikatijkej katkaj: Maasías, Semaías, Eleazar, Uzi, Johanán, Malquías, Elam niman Ezer. Niman nochimej on nokuikatijkej opeu sanoyej chikauak nokuikatiaj, niman Izrahías yejua kinyekanaya.
43 Ipan on tonajli okinmiktijkej miyekej yolkej para okinuentlalijkej, niman nochimej on israelitas sanoyej opakkej pampa Dios okinmakak miyek pakilistli. On siuamej niman on kokonej no sanoyej opakkej, niman on paktli yejuan onkatka Jerusalén hasta uejka onkakistiya.
Tlakuajli yejuan kitlaniskej on tiopixkej niman on levitas
44 Ipan on tonaltin okintlalijkej yejuan tekitiskej ipan on kaltlayejyeualoltin kampa keuayaj on uentomin, on achtoj tlakyotl niman on diezmos, para ompa keuaskej on tlakyotl yejuan tlakis ipan icampo cada ueyikalpan, para kinmakaskej on tiopixkej niman on levitas, ijkon ken tlanauatia on ley. Ijkon okichijkej pampa on chanejkej ne Judá sanoyej pakiyaj pampa on tiopixkej niman on levitas kuajli kichiuayaj intekiu. 45 Yejuamej tej, niman on nokuikatijkej niman on tsakuijlotlajpixkej, kichiuayaj itekiu Dios niman kichipauaya on tlajtlamach para nokauaya tlatiochijtin, ijkon ken otlanauatijka David niman Salomón, on ikoneu. 46 Desde yeuejkaui ijkuak nemiya David niman Asaf, nemiyaj yejuan kinyekanayaj on nokuikatijkej para kuikatlaliayaj niman kueyitenuayaj Dios ikan tlaxtlauijli.
47 Ijkon tej, ipan on tonaltin ijkuak nemiya Zorobabel niman nejua Nehemías ninemiya, nochimej on israelitas mojmostla kinmakayaj tlen kikuaskej on nokuikatijkej niman on tsakuijlotlajpixkej. Niman on israelitas no kiminmakaya tlen kikuaskej on levitas, niman on levitas no kiminmakayaj se parte yejuan kintocarouaya on tiopixkej, iuejkakoneuan Aarón.