Opeu kuektlaliaj on tepanchinantli
3
Kemaj on ueyi tlayekankitiopixki Eliasib niman oksekimej tiopixkej, oksejpa okichijchijkej on ueyitsakuijlotl yejuan itoka Inueyitsakuijlou Borregos. Yejuamej okitiochijkatlalijkej para Dios, niman okitlalilijkej kuapanojli yejuan tomauak niman iueyitsakuijlouan. No okuektlalijkej on tepanchinantli desde on torre itoka Cien hasta on torre itoka Hananeel. Kemaj, in parte de on tepanchinantli okitiochijkatlalijkej para Dios. 2 Kemaj on parte de on tepanchinantli yejuan kontoka, okuektlalijkej on tlakamej yejuan chanejkej Jericó, niman on okse parte yejuan kontoka, okuektlalij Zacur, ikoneu Imri. 3 On iuejkakoneuan Senaa oksejpa okichijchijkej on ueyitsakuijlotl yejuan itoka Intsakuijlou Michimej. Inajnakastlan niman ikuatipan okitlalilijkej kojtin tojtomajkej yejuan tlaxintin, niman no, okitlalilijkej yejuan ika kitiliniaj. 4 Kemaj on parte de on tepanchinantli yejuan konmintoka on oksekimej partes, okuektlalij Meremot, ikoneu Urías niman ixuiu Cos. Niman on okse parte yejuan kontoka, okuektlalij Mesulam, ikoneu Berequías niman ixuiu Mesezabeel. Kemaj on okse parte yejuan kontoka okuektlalij Sadoc, ikoneu Baana. 5 Niman kemaj on okse parte yejuan kontoka okuektlalijkej on tlakamej yejuan chanejkej Tecoa, pero on intlayekankauan xokinekkej okimpaleuijkej on tekitlayekankej. 6 Joiada, ikoneu Paseah, niman Mesulam, ikoneu Besodías, oksejpa okichijchijkej on ueyitsakuijlotl yejuan itoka Jesana. Inajnakastlan niman ikuatipan okitlalilijkej kojtin tojtomajkej yejuan tlaxintin, niman no, okitlalilijkej yejuan ika kitiliniaj. 7 Kemaj on okse parte yejuan kontoka okuektlalij Melatías niman Jadón. Melatías chanej katka Gabaón, niman Jadón chanej katka Meronot. Iminuan yejuamej otekitkej on tlakamej yejuan chanejkej katkaj Gabaón niman Mizpa, kampa tlamandarouaya on gobernador yejuan nemiya kampaka ikalakiyan tonaltsintli de on río Éufrates. 8 Kemaj on okse parte yejuan kontoka okuektlalij Uziel, ikoneu Harharía yejuan plateros katkaj. Kemaj on okse parte yejuan kontoka, okuektlalij Hananías yejuan ajuiyachijchijketl katka. In omemej okuektlalijkej on okse parte de itepanchinan Jerusalén, niman otlamitoj hasta kampa ipatlajkan on tepanchinantli. 9 Kemaj on okse parte yejuan kontoka okuektlalij Refaías, ikoneu Hur. Refaías presidente katka ipan on tlajkotipan iregión Jerusalén. 10 Kemaj on okse parte yejuan kontoka okuektlalij Jedaías, ikoneu Harumaf, pampa nokauaya ixpan ichan. Niman on okse parte yejuan kontoka okuektlalij Hatús, ikoneu Hasabnías.11 Malquías, ikoneu Harim, niman Hasub, ikoneu Pahat-moab, no okuektlalijkej okse parte yejuan kontoka, niman no okuektlalijkej on torre itoka Hornos. 12 Kemaj on okse parte yejuan kontoka okuektlalij Salum, ikoneu Halohes. Salum presidente katka ipan on okse tlajkotipan Jerusalén. Okuektlalij yejua iuan ichpochuan. 13 Hanún niman on chanejkej de Zanoa, oksejpa okichijchijkej on ueyitsakuijlotl yejuan itoka Iueyitsakuijlou on Ixtlauatl. Okitlalilijkej itsakuijlouan niman okitlalilijkej yejuan ika kitiliniaj. Niman no, okuektlalijkej 450 metros de on tepanchinantli, niman otlamitoj hasta kampa onkaj on ueyitsakuijlotl yejuan itoka Kampa Tlajsolchapaniua. 14 Malquías ikoneu Recab okichijchiu on ueyitsakuijlotl "Kampa Tlajsolchapaniloyan", niman okitlalilij itsakuijlouan niman yejuan ika kitiliniaj. Malquías presidente katka ipan on iregión on ueyikalpan Bet-haquerem.
15 Salum, ikoneu Colhoze, presidente katka ipan iregión on ueyikalpan Mizpa. Yejua oksejpa okichijchiu on ueyitsakuijlotl yejuan itoka Iueyitsakuijlou on Amejli. On ueyitsakuijlotl okitlalilij itsakuijlouan niman ikuapachol niman yejuan ika kitiliniaj. Niman no, okuektlalij itepanchinan on amanajli itoka Siloé, yejuan onkaj itech ixochitlan on rey. On tepanchinantli ajsitok hasta itech on escaleras yejuan temoua ipan Iueyikalpan David. 16 Nehemías, ikoneu Azbuc, presidente katka ipan on tlajkotipan iregión on ueyikalpan Bet-su. Yejua okuektlalij on okse parte de on tepanchinantli yejuan panoua ixpan on mikiloyan kampa toktôkej ifamilias David, niman otlamito hasta kampa onkaj on pila de atl niman hasta kampa chantij on soldados.
17 Kemaj on okse parte de on tepanchinantli kej yejua okuektlalijkej in levitas: Rehum, ikoneu Bani, niman más tlayakapan okuektlalij Hasabías, yejuan presidente katka ipan on tlajkotipan iregión on kalpan Keila. Yejua, otekit itechkopa iregión. 18 Kemaj, on okse parte de on tepanchinantli kej yejua okuektlalijkej incompañeros, yejuan imintoka katka: Bavai, ikoneu Henadad, yejuan presidente katka ipan on okse tlajkotipan iregión on kalpan Keila, 19 niman Ezer, ikoneu Josué. Ezer presidente katka ipan on kalpan Mizpa. Yejuamej okuektlalijkej on tepanchinantli yejuan panoua ixpan on tlaixtli kampa kinmejeuaj nochi imintepos on soldados, niman otlamitoj hasta iyakapitsko on tepanchinantli. 20 Kemaj de ompa, kej Baruc, ikoneu Zabai, okuektlalij on okse parte de on tepanchinantli. Okipeualtij desde iyakapitsko on tepanchinantli, niman otlamito hasta ixpan ichan Eliasib, on ueyitlayekanki tiopixki. 21 Kemaj on okse parte yejuan kontoka, okuektlalij Meremot, ikoneu Urías niman ixuiu Cos. Okuektlalij desde kampa peua ichan Eliasib hasta kampa tlami on ikal.
22 Kemaj on okse parte de on tepanchinantli okuektlalijkej on tiopixkej yejuan chantiyaj ipan on ixtlauatl Jordán. 23 Kemaj de ompa, Benjamín niman Hasub okuektlalijkej on parte de on tepanchinantli yejuan nokaua ixpan iminchan. Niman kemaj Azarías, ikoneu Maasías niman ixuiu Ananías, no okuektlalij on parte yejuan nokaua ixpan ichan. 24 On okse parte de on tepanchinantli okuektlalij Binuy, ikoneu Henadad. Okipeualtij desde ichan ika Azarías, hasta iyakapitsko on tepanchinantli, niman otlamito hasta iyakapitsko on tepanchinantli. 25 Kemaj de ompa, Palal, ikoneu Uzai, okuektlalij on parte de on tepanchinantli yejuan nokaua ixpan on iyakapitsko, niman no okuektlalij on torre yejuan kipanauiya ika uejkapan ipalacio on rey, yejuan onkaj ikiauak on tlajpixki. 26 Kemaj Pedaías, ikoneu Faros niman on tekipanojkej ipan on ueyitiopan yejuan chantiyaj ne Ofel, okuektlalijkej on okse parte de on tepanchinantli yejuan kontoka. Otlamitoj hasta ixpan on ueyitsakuijlotl yejuan itoka Iueyitsakuijlou Atl, kampaka ikisayan tonaltsintli. No okuektlalijkej on torre yejuan tlakpak kistikaj.
27 On yejuan ualeuaj Tecoa okuektlalijkej on okse parte de on tepanchinantli yejuan kontoka. Okipeualtijkej desde itech on torre yejuan tlakpak kistikaj, niman otlamitoj hasta itech on tepanchinantli de Ofel.
28 On tiopixkej okuektlalijkej on tepanchinantli yejuan nokaua ixpan iminchan desde on ueyitsakuijlotl yejuan itoka Inueyitsakuijlou Caballos. 29 Kemaj de ompa, Sadoc, ikoneu Imer, okuektlalij on tepanchinantli yejuan nokaua ixpan ichan, niman on parte yejuan kontoka okuektlalij Semaías, ikoneu Secanías. Semaías tlajpixki katka ipan on ueyitsakuijlotl yejuan itoka Ikisayan Tonaltsintli. 30 Kemaj on okse parte de on tepanchinantli yejuan kontoka, okuektlalijkej Hananías, ikoneu Selemías, niman Hanún, yejuan katka ika chikuasen ikoneu Salaf. Kemaj de ompa, Mesulam, ikoneu Berequías, okichijchiu on parte yejuan nokaua ixpan ichan. 31 Malquías, on platero, okuektlalij on okse parte de on tepanchinantli yejuan kontoka, niman otlamito hasta itech iminchan on yejuan tekitij ipan on ueyitiopan niman itech iminchan on yejuan tlanamakaj, ixpan on ueyitsakuijlotl kampa kinmitstokej on yejuan kalakij ipan on ueyikalpan. Niman otlamitoj hasta iesquina on tepanchinantli kampa nemiyaj yejuan tlacuidarouaj. 32 On plateros niman on yejuan tlanamakaj okuektlalijkej on okse parte de on tepanchinantli yejuan kontoka. Okipeualtijkej desde on kampa nemiyaj yejuan tlacuidarouaj, niman otlamitoj hasta kampa onkaj on ueyitsakuijlotl itoka Inueyitsakuijlou Borregos.