Sanbalat niman Tobías
4
Ijkuak Sanbalat okimat ika oksejpa yetikchijchijtikatkaj on tepanchinantli, sanoyej okualan, niman opeu tlamach kinteneuilia on hebreos. 2 Niman ijkin okinmijlij on icompañeros niman on soldados de Samaria: “¿Tlinon kichijtokej in mayankachichimej hebreos? ¿Kinemiliaj ika oksejpa kichijchiuaskej on tepanchinantli niman oksejpa tlauentlaliskej? ¿Tlen kinemiliaj san ipan se tonajli tlamiskej on tekitl? ¿Noso kinemiliaj oksejpa kinyenkuiliskej on temej yejuan otlatlakej?”3 Tobías, on amonita, yejuan nemiya inakastlan Sanbalat, no ijkin okijtoj: “¡Xkitakan, on tepanchinantli yejuan kichijchijtokej semi xkojtik. Hasta sen ostotsin uelis kitlajkalis tla ompa tlejkos!”
4 Kemaj nejua onikchiu in oración: “ToTEKO Dios: Xkaki ken techpijpinauiyaj on tlakamej. Xchiua para nochi on tlen techteneuiliaj yejuamej impan ma uetsi. Ma uetsikan inmak intlauelikniuan, niman ma kinuikakan ipan okse país. 5 Maka tikintlapojpoluilis inxompayejyeualis, nion maka tikimpanoltilis intlajtlakol, pampa yejuamej okinuijuikaltijkej on yejuan oksejpa kichijchiuaj on tepanchinantli.”
6 Ijkon tej, otiknejnemiltijkej on tekitl de on tepanchinantli, niman otikajxiltijkej tlajkotipan ika tlakpak. On hebreos otekitkej ikan nochi iminyojlo. 7 Pero ijkuak Sanbalat, Tobías, on árabes, on amonitas niman on yejuan ualeuaj Asdod okimatkej ika sanken tikchijchiuaj on tepanchinantli de Jerusalén niman opeu tiktsakuaj on kampa on tepanchinantli ouets, sanoyej okualankej. 8 Kemaj nochimej onotlajtolmakakej para kinuijsokiskej on chanejkej Jerusalén niman para techyolmajxaloskej. 9 Pero tejuamej otitoueyikatsajtsilijkej itech toDios, niman otikintlalijkej yejuan tlacuidarouayaj tlayoua niman tlajokaj para otitomanauijkej de yejuamej. 10 Kemaj on chanejkej Judá opejkej amankajtlajtoua niman kijtouayaj: “On yejuan tlasakaj sanoyej yosiaukej niman sanken sanoyej tlaxixintok. Ijkon xuelis tlamis tikuektlaliskej in tepanchinantli.”
11 On totlauelikniuan kuitiayaj xtikmatiskej ika kinekiyaj kalakiskej san ichtaka ipan on ueyikalpan para techonmiktiskiaj, niman ijkon techteltiskiaj para makasa ma titekitikan. 12 Pero on hebreos yejuan chantiyaj nisiu yejuamej, miyekpa otechijlitoj ika on totlauelikniuan kinekiyaj techyejyeualoskej niman techuijsokiskej. 13 Yejua ika, on hebreos onikiminnauatij ma nosentlalikan por familias niman ma tlacuidarokan ikuitlapan on tepanchinantli kampa tlajtlaltech niman kampa nojuitiuaya. Niman onikinnauatij ma kipiyakan iminespadas, iminlanzas niman tlaminaltin. 14 Niman pampa onikitak nomojtiayaj, oniuajnotelkets para onikiminnots on yejuan uejueyixtokej, on tlapaleuijkej niman nochimej on chanejkej. Onikinmijlij: “Maka xkinmakajsikan on totlauelikniuan. Xkelnamikikan ika toTEKO ueyixtikaj niman nochi ueli kichiua. Xtlauijsokikan impampa nemochanejkauan, impampa nemokoneuan tlakamej niman siuamej, impampa nemosiuauan niman ipampa nemochan”.
15 Ijkuak on totlauelikniuan okimatkej ika tikinchayaj para tikinmixnamikiskej, niman ika Dios xok okinkauilij ma techuijsokikan, oyajyajkej. Niman kemaj tinochimej oksejpa otiajkej ipan on tepanchinantli, cada se ipan itekiu para okuektlalij on tepanchinantli. 16 Desde ipan on tonajli, tlajkotipan de on tekitkej tekitiyaj ipan on tepanchinantli, niman on okse tlajkotipan tlacuidarouayaj ikan iminlanzas, escudos*, tlaminaltin, niman iminteposchaleko. On tlayekankej sanoyej kimpaleuiyayaj on chanejkej ne Judá 17 yejuan tekitiyaj ipan on tepanchinantli. On tlakamej yejuan tlasakayaj, ika se iminma tekitiyaj, niman ika okse iminma kipiyayaj intepos. 18 Nochimej yejuan tekitiyaj ipan on tepanchinantli kipiyayaj iminespada ipan iminxijlan, niman nonakastlan nemiya yejuan kipitsaya on trompeta. 19 On uejueyixtokej, on tlapaleuijkej niman nochimej on chanejkej, ijkin yonikinmijlijka: "In tekitl kampa titekitij sanoyej ueyak niman tejuamej sanoyej ueuejka tinemij de se iuan okse. 20 Yejua ika tej, ne kampa nenkakiskej kipitsaj on trompeta, ompa xmotlajtlalokan para ompa titosentlaliskej, niman toDios tlauijsokis topampa.”
21 Ijki tej, chika tejuamej titekitiyaj nochi tonajli ipan on tepanchinantli, desde tlanesi hasta ixtlatlakatsajtikaj inuan tlajkotipan de on tekitkej tlacuidarouayaj ikan iminlanzas. 22 No ijki, ipan on tonaltin onikinmijlij on tekitkej ika nochimej iminuan intlakeualuan nonekiya nokauaskej ipan on ueyikalpan Jerusalén, para techcuidaroskej ijkuak tlayoua niman tekitiskej ijkuak tlajokaj. 23 Niman nion nejua, nion on yejuan ken nikintaya, nion notlakeualuan, nion on tlakamej yejuan tlacuidarouayaj yejuan notech nemiyaj, xtikpatayaj totlaken, niman cada se kipiyaya ilanza ipan ima.