Nehemías kimpaleuiya on yejuan mayanaj
5
Ipan on tonaltin, miyekej on hebreos niman insiuauan okijtojkej ikan chikauak tlajtojli tlinon xkuajli kinchiuiliayaj on tlapaleuijkej hebreos. 2 Sekimej kijtouayaj ika kipiyayaj miyekej inkoneuan, tlakamej niman siuamej, niman nonekiya kitejtemoskej trigo para xmikiskej ikan apistli. 3 Oksekimej kijtouayaj yokimpeñarojkej imintlaluan, iminuvasyoj niman iminchan, pampa xkipiyayaj tlinon kikuaskej. 4 Niman oksekimej no kijtouayaj okinotlaneuijkej tomin para okitlaxtlauilijkej impuestos on rey ika imintlaluan niman iminuvasyoj. Niman no ijkin kijtouayaj: 5 “On tochanejkauan yejuan uejueyixtokej niman tejuamej, san se toyesyo tikpiyaj, niman tokoneuan no ijki valerouaj ken yejuamej inkoneuan. Pero tejuamej uej ika onkaj tikintemakaj tokoneuan ken esclavos. Hasta sekimej tochpochuan ye nemij ken esclavas, niman xueli tikinmanauiyaj pampa totlaluan niman touvasyoj xok toyaxkauan.”6 Ijkuak onikak nochi on tlen xkuajli kitechiuiliaj on uejueyixtokej, sanoyej onikualan. 7 Sakin, ijkuak yoniknemilij tlinon nikijtos, onikinmajuak on uejueyixtokej niman on tlapaleuijkej pampa hasta sa ijkon kinchiuiliayaj on inchanejkauan. Niman no onikinsentlalij nochimej on hebreos para onikinmijlij tlinon nochijtikaj. 8 Ijkin onikinmijlij: “Tejuamej, hasta kampa otiuelkej, otikintlaxtlajkej on tochanejkauan hebreos yejuan yokinnamakakaj ipan on naciones kampa xkineltokaj Dios. ¿Ijkon nenkinchiualtiaj sano nemokniuan ma nonamakakan nemotech on yejuan nemocompañeros hebreos?”
Yejuamej xonauatkej, pampa xokimatkej ken nechnankiliskej. 9 Kemaj oksepa onikinmijlij: “Xkuajli tlen nenkichijtokej, Yej nonekiya nenkiteititiskej ika nenkitlakaitaj Dios, niman ijki xtechpijpinauiskiaj on totlauelikniuan yejuan xhebreos. 10 Nejua niman nofamilias niman notlapaleuijkauan, no tikintlanejtianij tomin niman trigo on tochanejkauan. ¡Tla ijkon aman ma tikintlapojpoluilikan on tlen techuikiliaj! 11 Niman nemejuamej no nemechiknotlajtlanilia para niman aman xkinkuepilikan imintlaluan, iminuvasyoj, iminolivojkojyoj niman iminchan, niman no xkintlapojpoluilikan tlen mechuikiliaj tla tomin, trigo, vino noso aceite de olivo.” 12 Niman yejuamej okijtojkej: “Kemaj, tikuepaskej nochi on, niman xok itlaj tikintlajtlaniliskej. Tikchiuaskej nochi ken yotikijtoj.”
Kemaj onikintekuitlan on tiopixkej, niman inmixpan nochimej onikinchiualtij on uejueyixtokej niman on tlapaleuijkej ma notlajtolmakakan ixpan Dios ika on tlen okiprometerojkej. 13 Niman nejua oninotlakentsejtseloj niman onikijtoj: “Ijkin Dios ma kuajkixti ichan san akinon yejuan xcumpliros on tlen yokiprometeroj; niman ma kuili nochi on tlen kipiya.” Niman nochimej on kech tojlamej ompa nemiyaj okijtojkej: “Ma ijki nochiua.” Niman nochimej okueyiteneuakej toTEKO. Niman nochimej okichijkej tlen okiprometerojkej.
Nehemías sanoyej okimpaleuij on hebreos
14 Ijkuak Artajerjes otlamandaroj 20 xipan, onechteneu gobernador ipan iueyitlalpan Judá, niman nigobernador katka majtlaktli uan ome xipan. Ipan nochi on tiempo, nion nejua, nion notekitkauan xotiktlajtlankej on tlakuajli yejuan nechtocarouaya nikselis ken gobernador. 15 Pero on gobernadores yejuan opanokej achtoj xken nejua, uej kinchiualtiayaj on hebreos para mojmostla ma kintlaxtlauilikan 40 plata tomin para kouayaj tlakuajli niman vino. Niman on intlapaleuijkauan no kintlajyouiltiayaj on hebreos. Pero nejua xijki onikchiu pampa nikitlakaita Dios. 16 Niman no, ikan nochi noyojlo onitekit ipan on tepanchinantli de on ueyikalpan, niman xonikinkou tlaltin. Niman nochimej notlapaleuijkauan teuan otekitkej ipan on tepanchinantli. 17 Ipan nomesa tlakuayaj hasta 150 hebreos yejuan uejueyitlayekankej inuan on tlapaleuijkej. Niman xteuan tlapoualtin katkaj on yejuan techajtlajpalouayaj yejuan ualeuayaj ipan on nijnisiu naciones. 18 Niman on tlakuajli yejuan mojmostla kichijchiuayaj yejuan nejua niktemakaya, katka: sentetl uakax niman chikuasen borrego yejuan más tojtomajkej, niman sekimej totomej. Niman cada majtlaktli tonajli onkatka sanoyej miyek vino para koniyaj. Niman maski nejua niktemakaya nochi yejua in, xkaman onitlajtlan ma nechmakakan notlaxtlauil yejuan nechtocarouaya nikselis ken gobernador, pampa on hebreos hasta xok ueliyaj kitlaxtlauaj on impuestos.
19 Kemaj, onikichiu oración niman ijkin onikijlij Dios: ¡NoDios, maka tikelkauas nochi tlen yonikchiu impampa in hebreos!