Nehemías oksejpa okipajsolokej itlauelikniuan
6
Ijkuak Sambalat, Tobías, Gesem on árabe, niman on sekimej totlauelikniuan okimatkej ika yonitlan nikchijchiua on tepanchinantli niman xkanaj onikau kampa nojuitiskej yejuamej (maski ijkuakon xe nikintlaliaya on tsakuijlomej), 2 Sanbalat niman Gesem onechtitlanilijkej sen amatlajkuilojli para ma titosentlalikan ipan semej on kalpantsitsimej yejuan onokej ipan on ixtlauatl itoka Ono. Pero yejuamej yej kinekiyaj itlaj nechchiuiliskej tlen xkuajli. 3 Kemaj onitlatitlan para ma kinmijlitij ika xniuelis nias pampa nikpiyaya sen tekitl yejuan xuelis nikauas, niman xuelis nikteltis para nikomintas yejuamej. 4 Naupa ijkon onechijlitoj, pero nejua nochipa ijki onikinnankilij.5 Kemaj Sambalat okititlan sen itlakeual para ma nechkauiliti sen amatlajkuilojli yejuan xkipiya sello. 6 Kijtouaya: “Ijkin kijtouaj pakaon, niman Gesem no kijtoua ika tejua iminuan on hebreos xipan nenkitasnekij on rey. Yejua ika, oksejpa nenkichijchijtokej on tepanchinantli. Kijtouaj kitl tejua tiiminrey yes, 7 niman yotikintlalij tiotlajtojkej yejuan kiteijliskej ne Jerusalén ika ipan on ueyitlalpan Judá ye nemi sen rey. In uelis kimatis on rey Artajerjes. Yejua ika tej, xuajla para titlajtlajtoskej.”
8 Kemaj nejua onitlatitlan para ma kijlitij ika xnikneltoka tlen kijtoua, yej on tlen kijtoua san yejua kinejnemilia. 9 Yejuamej yej kinekiyaj techmomojtiskej. Kinemiliayaj ijki xok tiknekiskej titlamiskej on tekitl. Pero nejua oniktlajtlanilij Dios para yej más ma nechyolchikaua. 10 Sakin, oniaj ichan Semaías, ikoneu Delaías niman ixuiu Mehetabel. Yejua yonokaltsakuka ichan, niman ijkin onechijlij: “Ma titosentlalikan ichan Dios, ijtik on yektiopan, niman ma titlatsajtsakuakan pampa in tlayoua motlauelikniuan kinekij mitsajmiktiskej.” 11 Pero nejua ijkin oniknankilij: “Nejua xniyejteuas ken oksekimej kichiuaj, nion xnonkalakis ipan on ueyitiopan para ninomanauis. "¡Ka, xijkon nikchiuas!”
12 Niman no, oniknomakak cuenta ika Semaías xnechmelajkaijliaya on tlen Dios kinekiya ma nikmati, yej ijkon onechijlij pampa Tobías niman Sanbalat okitlaxtlauilijkej para ijkon ma nechijli. 13 Okitlaxtlauilijkej para ma nechmomojti niman para ma niuetsi ipan tlajtlakojli, para ijkon kipiyaskej tlinon ika nechteixpanuiskej niman nechpijpinajtiskej. 14 Kemaj ijkin oninoueyikatsajtsilij: “¡NoDios, maka tikelkauas on tlen xkuajli okichijkej Sanbalat niman Tobías! ¡Niman no, maka tikelkauas on siuatiotlajtojketl Noadías niman on sekimej tiotlajtojkej yejuan kinekiyaj nechmomojtiskej!
15 On tepanchinantli otlan tikchijchiuaj ipan on tonajli 25 de on metstli itoka Elul, niman okuikak 52 tonajli para otikchijchijkej. 16 Ijkuak on totlauelikniuan niman nochimej on naciones yejuan nijnisiu onokej okimatkej ika yotitlankej on tepanchinantli, sanoyej onomojtijkej, niman xok onoueyimatkej pampa okimatkej ika Dios yejua otechpaleuij ipan on tekitl.
17 Ipan on tonaltin, Tobías niman on yejuan uejueyixtikatkaj ne Judá, kinotitlanilijtikatkaj miyek amatlajkuiloltin. 18 Ijkon kichiuayaj pampa miyekej de Judá yokitlajtolmakakaj Tobías ika san yejua kitlakamatiskej, pampa Tobías montli katka itech Secanías, ikoneu Ara. No ijki, itelpoch Tobías yejuan itoka katka Johanán, ononamiktij iuan ichpoch Mesulam, ikoneu Berequías. 19 Niman nixpan, sanoyej kuajli kiteneuayaj Tobías, niman nochi kijliayaj tlinon nikijtouaya. Niman yejua Tobías, nechtitlaniliaya amatlajkuiloltin pampa kinekiya nechmomojtis.