Abiam otlamandaroj ken rey ne Judá
(1 R 15.1-7)
13
Abiam opeu tlamandaroua ken rey ne Judá ijkuak Jeroboam kuikaya majtlaktli uan chikueyi xipan ika tlamandarouaya ken rey ne Israel. 2 Niman otlamandaroj yeyi xipan ne Jerusalén. Inanaj itoka katka Micaías, ichpoch Uriel. Yejua chanej katka ipan on ueyikalpan itoka Gabaa.Abiam niman Jeroboam opeu nouijsokij. 3 Abiam opeu tlauijsoki ika 400 mil soldados. Yejua okintlapepenij yejuan xmojkej katkaj. Niman Jeroboam okixnamik ika 800 mil soldados. Yejua okintlapepenij yejuan xmojkej katkaj. 4 Kemaj Abiam onotelkets ipan on tepetl Zemaraim, yejuan onkaj ipan on tepemej de Efraín, niman ijkin chikauak otsajtsik: “¡Jeroboam niman nochimej israelitas, xnechkakikan! 5 ¿Xnenkimatij ika toTEKO, Dios de Israel, okimakak David niman iuejkakoneuan on reino para nochipa, ikan sen pacto yejuan xakaj uelis kixoxotonis? 6 Pero Jeroboam, ikoneu Nabat, niman itekitkau katka Salomón, xipan okitak Salomón, ikoneu David, maski iteko katka. 7 Niman iuan onosentlalijkej tlakamej xompayejyeuamej yejuan san ika nokauaj kichijtinemij tlen xkuajli. On tlakamej sano yejuamej on yejuan tlamach okijijlijkej Roboam, ikoneu Salomón, para más chikauak ma kintekitilti on israelitas. Pero Roboam xouel okimixnamik pampa sanken konetl katka, xe más kimatiya niman xe yolchikauiya. 8 Niman aman nemejuamej no nenkinekij maka ma tlamandaro toTEKO intechkopa iuejkakoneuan David, san pampa nemejuamej sanoyej nenmiyekej niman nenkipiyaj on becerros de oro yejuan Jeroboam I omechchijchiuilij para xkimpiyakan ken nemodioses. 9 No ijki, hasta yonenkintotokakej itiopixkauan toTEKO yejuan iuejkakoneuan Aarón, niman on levitas. Niman sano nemejuamej yonenkintlalijkej nemotiopixkauan ken kichiuaj on naciones kampa xkineltokaj Dios. ¡Aman, san akinon yejuan uajlau niman kuauika sen becerro niman chikome borrego para noyekchiua, tikkalaktia ken tiopixki para on dioses yejuan xmelauak dioses! 10 Pero tejuamej, toTEKO yejua toDios, niman xtiktlalkauiyaj. On iuejkakoneuan Aarón, yejuamej totiopixkauan yejuan tlauentlaliaj ixpan toTEKO, niman on levitas, yejuamej kimpaleuiyaj. 11 Mojmostla, kualkan niman tiotlak, yejuamej kimakaj toTEKO uentli yejuan nochi tlatla, niman kitlatiaj on kopajli ajuiyak. Niman ipan on yekmesa yejuan chipauak ixpan toTEKO, yejuamej kitlaliaj on pan tlatiochijtli. Niman ijkuak tiotlak nochipa kintlikuiltiaj itlauiltsitsiuan on lámpara de oro. Tejuamej tikchiuaj on tlen otlanauatij toTEKO Dios, pero nemejuamej uej yonenkitlalkauijkej. 12 Kuajli xmatikan tej, ika Dios techyekana. Niman itiopixkauan nemij nikan ikan imintlapitsaluan. Yejuamej kimpitsaskej ijkuak peuas temechuijsokiskej. Yejua ika tej, israelitas, maka xkuijsokikan toTEKO, iminDios nemoachtojtajuan, pampa xnentetlaniskej.”
13 Pero Jeroboam yokiminnauatijka sekimej isoldados yejuan yayaj tlakuitlapan para ma kinuajuijsokitij on soldados de Judá iminkuitlapan, niman on oksekimej isoldados yejuan más miyekej, uej onokajkej imixpan on soldados de Judá. 14 Ijkuak on soldados de Judá ontlachixkej iminkuitlapan, okitakej ika tlakaj kinuijsokij iminyakapan niman iminkuitlapan. Kemaj onoueyikatsajtsilijkej itech toTEKO, niman on tiopixkej okimpitskej on tlapitsaltin. 15 Niman ijkuak on soldados de Judá otsajtsikej chikauak para peuas on nouijsokilistli, Dios okipaleuij Abiam niman on soldados de Judá para ma kitlanikan Jeroboam niman nochimej on israelitas. 16 Kemaj on israelitas ontlatlaksasnekiyaj, pero Dios okintemaktilij imintech on soldados de Judá. 17 Abiam niman isoldados, sanoyej miyek israelita okimiktijkej. Okimiktijkej 500 mil isoldados israel yejuan xmojkej katkaj. 18 Ijkin okimpijpinajtijkej on israelitas ipan on tiempo, niman on soldados de Judá uej okiteititijkej ika kojtikej, pampa okitlalijkej iminyojlo itech toTEKO, iminDios iminachtojtajuan para ma kimpaleui.
19 Abiam okitojtokak Jeroboam niman okinkuilij on uejueyikalpanmej Bet-el, Jesana niman Efraín, iuan inkalpanuan pipitikej. 20 Niman Jeroboam xokaman okipix poder para otlamandaroj ken rey chika Abiam nemiya. Sakin, toTEKO ocastigaro Jeroboam, niman omik. 21 Pero Abiam uej okajsik más poder para otlamandaroj ken rey. Okipix 14 isiuauan, 22 ikoneuan yejuan tlakamej, niman 16 ikoneuan yejuan siuamej. 22 On okseki tlajtlamach tlen okijto niman on tlen okichiu Abiam ipan inemilis, tlajkuilolnestikatkaj ipan iamamox on tiotlajtojketl Iddo.