16
Kemaj toTEKO okinauatij on tiotlajtolketl Jehú, ikoneu Hanani, para ma kijliti Baasa in tlajtojli: “Ijkin kijtoua toTEKO:2 'Nejua onimitskixtij kampa xitlaj* motekiu katka niman onimitstlalij tlayekanki intech notlapejpeniluan israelitas. Pero tejua no otitlajtlakoj ken Jeroboam, niman otikchiu para on israelitas ma tlajtlakokan. Yejua ika, sanoyej yotinechkualanij.3 Aman tej, tejua Baasa, nimitspopolos iuan nochi mofamilia ken onikpopoloj Jeroboam, ikoneu Nabat, iuan ifamilia.4 San akinon yejuan ken tikita mikis ipan on ueyikalpan, kikuaskej chichimej. Niman yejuan mikis ipan mijlaj kikuaskej tsojpilomej.'”
5 Ipan on amamoxtli* kampa tlajkuilolnestikaj iminnemilis on reyes de Israel, ompa kijtoua inemilis Baasa, niman ompa kijtoua nochi on ueyi tlajtlamach* yejuan okichiu. 6 Niman ijkuak omik, okitôkakej ne Tirsa kampa toktôkej iachtojtajuan. Kemaj Ela, ikoneu, kej yejua okalak rey.
7 ToTEKO okititlan on tiotlajtojketl Jehú, ikoneu Hanani, para ma kijliti Baasa tlinon ipan nochiuas iuan ifamilia pampa sanoyej xkuajli tlinon okichijkej ixpan toTEKO. Baasa sanoyej okualanij toTEKO pampa okichiu sanoyej xkuajli ken Jeroboam iuan ifamilia, niman no pampa okinmiktij ifamilia Jeroboam.
Ela niman Zimri reyes katkaj ne Israel
8 Ijkuak Asa kuikaya 26 xipan ika tlamandarouaya ken rey ne Judá, Ela, ikoneu Baasa, okalak rey ne Israel. Otlamandaroj ken rey ome xipan, niman ochantik ipan on ueyikalpan Tirsa. 9 Pero sen itlapaleuijkau yejuan itoka katka Zimri, yejuan kiyekanaya tlajkotipan on carretas de guerra, okitlajtouilij para kimiktis. Se tonajli Ela nemiya ne Tirsa, ichan itekitlayekankau yejuan itoka katka Arsa. Ompa otlaonik niman otlauan. 10 Kemaj ompa oajsitets Zimri, okimiktij, niman yejua okalak rey. Yejua in onochiu ijkuak Asa kipiyaya 27 xipan ika tlamandarouaya ken rey ne Judá.
11 Ijkuak Zimri kemach opeu tlamandaroua ken rey, nimantsin okimiktij nochi ifamilia Baasa. Nochimej yejuan tlakamej yejuan ken kintaya noso yejuan itlajsojkaikniuan* katkaj, okinmiktij para maka kitlakuepiltiskej. 12 Ijkon tej, Zimri okimiktij nochi ifamilia Baasa ken toTEKO yokijtojka itechkopa on tiotlajtojketl Jehú ika Baasa niman ifamiliaj nochimej mikiskej. 13 Ijkon onochiu, pampa Baasa niman Ela, ikoneu, sanoyej otlajtlakojkej niman okichijkej para on israelitas no ma tlajtlakokan niman ma kinmauistilikan ídolos. Yejua ika, toTEKO, on iDios israel sanoyej okualan.
14 Ipan on amamoxtli* kampa tlajkuilolnestikaj iminnemilis on reyes de Israel, ompa kijtoua inemilis Ela, niman ompa kijtoua nochi tlinon okichiu.
15 Ijkuak Asa kuikaya 27 xipan ika tlamandarouaya ken rey ne Judá, Zimri okalak rey ne Israel, niman ochantik ipan on ueyikalpan Tirsa, pero san otlamandaroj chikome tonajli. Ijkuakon, on soldados yokitlalijkaj imincampamento nisiu iminueyikalpan on filisteos yejuan itoka Gibetón, para kuijsokiskiaj. 16 Pero sano ipan on tonajli on soldados okimatkej ika Zimri yokitlajtouilij kimiktis on rey Ela niman ika aman yokimiktij, nochimej yejuamej xokuelitakej. Yejua ika, okitenejkej Omri on tlayekankej intech on soldados para yejua okalaktijkej rey de Israel. 17 Kemaj Omri niman nochimej on soldados israelitas xok okuijsokkej on ueyikalpan Gibetón, yej oyajkej okuijsokitoj on ueyikalpan Tirsa.
18 Niman ijkuak Zimri okitak ika on soldados israelitas yokinoyaxkatijkej on ueyikalpan Tirsa, okalak ipan on palacio kampa más kuajli tlatsakutok. Niman yejua okitlakechij on palacio kampa nemiya, niman ompa omik. 19 Ijkin onochiu pampa Zimri xkuajli tlen okichiu ixpan toTEKO, pampa no otlajtlakoj ken Jeroboam, niman okichiu para on israelitas ne Israel no ma tlajtlakokan.
20 Ipan on amamoxtli* kampa tlajkuilolnestikaj iminnemilis on reyes de Israel, ompa tlajkuilolnestikaj inemilis Zimri, niman ompa kijtoua kenijki okitlajtouilij kimiktis on rey Ela niman okimiktij.
Omri rey katka ne Israel
21 Kemaj on israelitas de on país Israel onoxelojkej okantipan. Sekimej kinekiyaj para Tibni, ikoneu Ginat, yejua ma rey, niman oksekimej kinekiyaj para Omri yejua ma rey. 22 Pero on yejuan nemiyaj iuan Omri okintlankej on yejuan nemiyaj iuan Tibni, ikoneu Ginat. Tibni omik, niman Omri yejua olalak rey.
23 Omri opeu tlamandaroua ken rey ne Israel ijkuak Asa kuikaya 31 xipan ika okalak rey ne Judá, niman otlamandaroj matlaktli uan ome xipan. On achtoj chikuasen xipan, otlamandaroj ipan on ueyikalpan Tirsa. 24 Omri okouilij Semer on tepetsintli yejuan onkaj Samaria ika 66 kilos de plata, niman ompa okichijchiu sen ueyikalpan yejuan kuajli okitepanyeualtsaku. Niman okitokayotij on ueyikalpan Samaria, para okitlakaitak Semer yejuan achtoj iyaxka* katka on tepetsintli.
25 Omri no xkuajli tlen okichiu ixpan toTEKO, niman más sanoyej otlajtlakoj xken on oksekimej reyes yejuan achtoj opanokej. 26 No sano yejua okichiu nochi tlajtlakojli ken Jeroboam, ikoneu Nabat, yejuan okichiu para on israelitas ma tlajtlakokan niman ma kinmauistilikan ídolos. Yejua ika, toTEKO, on iDios israel sanoyej okualan.
27 Ipan on amamoxtli* kampa tlajkuilolnestikaj iminnemilis on reyes de Israel, ompa tlajkuilolnestikaj inemilis Omri, niman ompa kijtoua nochi on uejueyi tlajtlamach* yejuan okichiu. 28 Niman ijkuak omik okitôkakej ne Samaria kampa toktôkej iachtojtajuan. Kemaj Acab, ikoneu, kej yejua okalak rey.
Acab rey katka ne Israel
29 Ijkuak Asa kuikaya 38 xipan ika tlamandarouaya ken rey ne Judá, Acab, ikoneu Omri, okalak rey ne Israel, niman otlamandaroj ken rey 22 xipan ipan on ueyikalpan Samaria. 30 Pero okichiu tlen sanoyej xkuajli ixpan toTEKO, niman más otlajtlakoj xken on oksekimej reyes yejuan opanokej achtoj de yejua. 31 Acab xsan otlajtlakoj ken Jeroboam, ikoneu Nabat, yej okichiu más sanoyej xkuajli. Hasta ononamiktij iuan Jezabel, ichpoch Et-baal, on rey de Sidón, niman opeu kimauistilia on dios Baal. 32 Acab okichijchiu sen pitentsin tiopan ne Samaria para okimauistilij on ídolo Baal, niman okitlalij ompa sen tlaixpan*. 33 No okixneskayotij sen ixneskayo on diosa Aserá ipan sen kojtli. Yejua ika toTEKO, iminDios on israelitas más sanoyej okualan xken ijkuak otlajtlakojkej on oksekimej reyes yejuan opanokej achtoj de yejua.
34 Ipan on tonaltin ijkuak Acab nemiya, sen tlakatl itoka Hiel yejuan chanej* katka Betel, oksejpa okichijchiu on ueyikalpan Jericó. Ijkuak okichijchiu ipeuyan on ueyikalpan, omik ikoneu yejuan iyenkuiyou itoka Abiram. Niman ijkuak okintlalij itsakuijlouan, omik ikoneu yejuan más konetl, itoka Segud. Ijki onochiu ken toTEKO yokijtojka ika akin kichijchiuas oksejpa on ueyikalpan ipan nochiuas on tlen okijtoj itechkopa Josué, ikoneu Nun.