Elías okitemachistij ika tlauajuakis
17
On tiotlajtojketl Elías, yejuan ualeuaya on kalpan Tisbe, ipan iueyitlalpan Galaad, ijkin okijlij Acab: “Nimitstlajtolmaka ika itokatsin toTEKO, iminDios on israelitas yejuan niktekipanoua, ika ipan in keski xipan yejuan uajlau, xkiauis nion xinis ajuichtli. Xkiauis, yej hasta nejua nikijtos.”2 Kemaj toTEKO okijlij Elías: 3 “Xkisa nikan niman xuiya kampaka ikisayan tonaltsintli, niman xmiyana itech on pitentsin ayajtok itoka Querit, yejuan nokaua okse lado de on río Jordán. 4 Ompa uelis tikonis atl ipan on pitentsin ayajtok, niman yonikinnauatij on totomej imintoka kakalomej para ma mitsmakatij tlakuajli.”
5 Elías okichiu on tlen toTEKO okinauatij, niman oyaj onochantito itech on pitentsin ayajtok Querit, yejuan onkaj kampaka ikisayan tonaltsintli de on río Jordán. 6 Niman on kakalomej kiktiliayaj pan niman nakatl ijkuak kualkan niman ijkuak tiotlak. On atl yejuan koniya kikuiya ipan on pitentsin ayajtok. 7 Pero san xuejkajtikaj on ayajtok ouak pampa xkiauiya ipan on país.
Elías niman on siuakaualtsintli de Sarepta
8 Kemaj toTEKO okijlij Elías: 9 “Xuiya ipan on kalpan Sarepta yejuan onkaj ipan iueyitlalpan Sidón, niman ompa xchantiti. Sen siuakaualtsintli yejuan ompa chanti, yoniknauatij ma mitsmaka tlakuajli.”
10 Niman Elías oyaj ne Sarepta. Ijkuak oajsik ikalakiyan on kalpan, okitak sen siuakaualtsintli yejuan kisentlaliaya kojtli. Kemaj okonots niman okijlij:
—Nimitstlajtlanilia, xnechtlayokoli achijtsin atl para nikonis.
11 Niman ijkuak on siuatl ye yajtikatka para konkuis on atl, Elías oksejpa okontsajtsilij, niman okijlij:
—Nimitstlajtlanilia, no xnechtlayokoli se pedazo pan.
12 On siuatl okinankilij:
—Nimitstlajtolmaka ika itokatsin toTEKO, yejuan moDios, ika xitlaj* nikpiya pan. San nikpiya se mapichtli harina ipan sen tlaltekomatl niman achijtsin aceite ipan sen tsotsokojli. Niman amantsin niksentlalijtikaj achijtsin kojtli* para nias nikonikxitis, para nikuas nejua niman notlakakoneu. Sa ika nochi tikpiyaj para titlakuaskej. Sakin, timijmikiskej ikan apistli.
13 Kemaj Elías okinankilij:
—Maka xmomojti. Xchiua tlen yotikijtoj tikchiuas. Pero achtoj, nejua xnechajkuili sen pitentsin pan ika on harina yejuan tikpiya, niman sakin*, tikchijchiuas para tejua niman para motlakakoneu. 14 Ijkon xchiua pampa toTEKO, iminDios on israelitas, yokijtoj ika xtlamis on harina yejuan onkaj ipan on tlaltekomatl nion on aceite yejuan onkaj ipan on tsotsokojli, hasta kaman toTEKO oksejpa peuas tlakiauitis.
15 Niman on siuakaualtsintli oyaj niman okichiu on tlen Elías okijlij. Niman yejua niman itlakakoneu niman Elías okipixkej tlakuajli para miyek tonajli. 16 Xotlan on harina ipan on tlaltekomatl, nion on aceite yejuan onkatka ipan on tsotsokojli, ijkon ken toTEKO okijtoj itechkopa Elías.
17 Más sakin* xuejkatika, itlakakoneu on siuakaualtsintli opeu kualo. Okajsik sen temojtij kokolistli niman omik. 18 Kemaj on siuakaualtsintli okijlij Elías:
—Itekitkau Dios, ¿Tline ijkin tinechchiuilia? ¿Otiuajlaj para otinechelnamiktiko notlajtlakoluan, niman otikmiktiko notlakakoneu para tinechkastigaroua?
19 Niman Elías okijlij:
—Xnechmaka motlakakoneu.
Kemaj Elías okonan on tlakakonetl kampa kinapalojtikatka inanaj, niman okitlejkoltij ipan on kalijtik kampa chantiya yejua Elías, niman okitekak ipan itlapech. 20 Kemaj chikauak onoueyikatsajtsilij itech toTEKO. Ijkin okijtoj: “NoTEKO Dios, ¿Tline tikmiktilia itlakakoneu in siuakaualtsintli para ma tlajyoui? ¿Tlen yejua itlaxtlauil ika onechselij ichan?”
21 Niman kemaj onotekak yexpa ipan on tlakakonetl, niman chikauak onoueyikatsajtsilij itech toTEKO. Ijkin okijtoj: “NoTEKO Dios, ¡nimitstlajtlanilia oksejpa xmaka inemilis in tlakakonetl.”
22 ToTEKO okak tlinon okitlajtlanilij Elías, niman okichiu para on tlakakonetl oksejpa ma yoliui. 23 Kemaj Elías okonan on konetl niman okuajtemoltij ipan on kajli yejuan tlatsintlan. Kemaj okimaktilij inanaj niman okijlij:
—¡Xkita, motlakakoneu yoltikaj!
24 Niman on siuatl okinankilij:
—Aman nikmati ika melauak tiitekitkau Dios, niman nikita ika on tlen tikijtoua ualeua yejua itech.