Elías oksejpa oyaj itech Acab
18
Sakin, ijkuak yopanok yeyi xipan, toTEKO okinots Elías niman okijlij: “Xuiya xmoteitititi itech Acab, pampa oksejpa peuas nitlakiauitis ipan in tlaltikpaktli.”2 Niman Elías oyaj okitato Acab.
Chika ijkuakon ne Samaria, sanoyej onkatka temojtij apistli. 3 Ipan on tonaltin, Acab okitekuitlan Abdías, itekitlayekankau ipan ipalacio. Abdías sanoyej kitlakaitaya toTEKO. 4 Se tonajli, ijkuak on reina Jezabel opeu kinmiktia itiotlajtojkauan toTEKO, Abdías okinmiyan 100 tiotlajtojkej. Okinmiyan ipan ome ostotl. Ipan cada tekajli okinmiyan 50 tiotlajtojkej niman yejua kinmakaya tlakuajli niman atl. 5 Niman Acab okijlij Abdías:
—Tiauij nochiuiyan ipan in país. Tikomintejtemouaj ameyaltin niman ayajtoktsitsimej. Tikitaskej tla tiknextiaj sakatl para tocaballos niman tomulas. Tlamo mijmikiskej nochi toyolkauan.
6 Ijkon tej, okinnoxelouilijkej on país. Acab oyaj ipan se ojtli niman Abdías oyaj ipan okse. 7 Niman ijkuak Abdías yaya ipan iojui, ouajnonextij niman okinamikiko Elías. Ijkuak Abdías okixmat Elías, ixpan onotlakuantelkets niman onopachoj hasta ipan tlajli, niman ijkin okijlij:
—¡Tlakaj tejua on noteko Elías!
8 Elías okinankilij:
—Kemaj nejua.
Kemaj Elías okijlij:
—Xuiya xkijliti moteko ika nikan ninemi.
9 Abdías okinankilij:
—¿Tlen tlinon xkuajli onikchiu ika tikneki ma nechmikti on rey Acab? 10 Nimitstlajtolmaka ika itokatsin toTEKO yejuan moDios, ika nouiyan ipan nochi naciones niman reinojyomej yomitstejtemoj. Niman ijkuak kijliayaj ika xkanaj mitsitaj, yejua, kinchiualtiaya ma kitlajtolmakakan ika itokatsin Dios ika melauak xkanaj mitsitaj. 11 Niman aman, ¿Yej tinechtitlani ma nikijliti noteko ika nikan tinemi? 12 Manin ijkuak nimitskajteuas, iespíritu Dios mitsuikas oksekan kampa xnikmati. Niman ijkuak nias nikonijlis on rey Acab, yejua uajlas niman xmitsnextis. Ijkuakon nechmiktis, maski nejua nimotekitkau desde nikonetl nochipa oniktlakaitak toTEKO. 13 ¿Tlen xmitstlajtlajtouiliaj on tlen onikchiu ijkuak Jezabel kinmiktiaya itiotlajtojkauan toTEKO? Nejua onikinmiyan 100 de yejuamej ipan ome ostotl. 50 tiotlajtojkej onikinkalaktij ipan cada ostotl niman nikinmakaya tlakuajli niman atl. 14 ¿Niman aman tinechijlia ma niuiya ma nikijliti noteko ika nikan tinemi? ¡Tla ijkon, yejua nechmiktis!
15 Kemaj Elías okijlij:
—Nimitstlajtolmaka ika itokatsin toTEKO yejuan kipiya nochi poder, niman yejuan niktekipanoua, ika aman iuan ninotas Acab.
16 Kemaj, Abdías oyaj okitejtemoto Acab para okijlito on tlen Elías okijlij. Niman kemaj Acab oyaj iuan ononamikito Elías. 17 Niman ijkuak okitak, okijlij:
—¿Tejua on yejuan otikuajkik tlajyouilistli ipan in tlajli Israel?
18 Elías okinankilij:
—Xnejua onikuajkik tlajyouilistli. Yej tejua iuan ifamilia motajtaj onenkuajkikej, pampa xok nenkitlakamatij itlanauatiluan toTEKO, niman yej nenkinmauistiliaj on sesekneka itlachalis de on dios Baal. 19 Aman xtlanauati para ma nosentlalikan nochimej on israelitas ipan on tepetl itoka Carmelo, iminuan on 450 itiotlajtojkauan Baal niman on 400 itiotlajtojkauan Asera yejuan Jezabel kintlakualtia.
Elías niman on itiotlajtojkauan Baal niman Asera
20 Niman Acab otlanauatij para ma nosentlalikan nochimej on israelitas niman on tiotlajtojkej ne ipan on tepetl itoka Carmelo. 21 Kemaj, Elías okinnisiuij nochimej on israelitas niman ijkin okinmijlij:
—¿Hasta kamanon nenometlamatiskej? Xkitakan, tla toTEKO yejua melauak Dios, yejua xtokakan. Niman tla Baal yejua melauak dios, yejua xtokakan.
—Nejua sa niika nochi ninokaua yejuan niitiotlajtojkau toTEKO, pero Baal uej kipiya 450 itiotlajtojkauan. 23 Aman tej, xtechinmakakan ome becerros. Niman on itiotlajtojkauan Baal se ma kitlapejpenikan. Kemaj, ma kimiktikan niman ma kitejtekikan. Kemaj, ma kitlalikan ipan on kojtli* yejuan onkaj ipan intlaixpan* kampa nouentlalis, pero maka kitlatlatiliskej. Kemaj, nejua nikmiktis on okse becerro niman niktlalis ipan on kojtli* yejuan onkaj ipan on tlaixpan*, niman no xniktlatlatilis. 24 Kemaj nemejuamej nemoueyikatsajtsiliskej itech nemodios, niman nejua ninoueyikatsajtsilis itech noTEKO. Niman on dios yejuan tenankilis niman kitlatis on uentli kijtosneki yejua melauak Dios.
Niman nochimej on israelitas ijkin okinankilijkej:
—¡Kuajli ken yotikijtoj!
25 Kemaj Elías ijkin okinmijlij itiotlajtojkauan Baal:
—Pampa nemejuamej más nenmiyekej, achtoj nemejuamej xtlapejpenikan semej on becerros niman xmiktikan. Kemaj, xmoueyikatsajtsilikan itech nemodios, pero maka nenkitlatlatiliskej.
26 Ijkon tej, on itiotlajtojkauan Baal okimiktijkej on becerro yejuan okiminmakakej. Niman desde kualkan hasta tlakualispan onoueyikatsajtsilijkej itech Baal, ijkin kijtouayaj: “¡Baal, xtechnankili!” Pero xakaj kiminnankiliaya, niman yejuamej nijtotiayaj, niman tsikuiniyaj iyeualkan on tlaixpan*. 27 Ijkuak oajsik tlakualispan, Elías kimpijpinauiyaya niman kimijliaya:
—Más chikauak xtsajtsikan, pampa yejua sen dios. Manin sanoyej tekimiki, noso kanaj oyaj. ¡Noso tla yej kochi, noneki xtlachaltikan!
28 Yejua ika, yejuamej más chikauak tsajtsiyaj, niman notetekiyaj ikan cuchillo noso ikan lancetas pampa yejuamej ijkon nochipa nokuiyaj, niman sanoyej noyejyeskixtiayaj. 29 Ijki opanok tlakualispan. Sanken tsajtsiyaj niman tsikuiniyaj ken ajakayojkej, hasta ijki oajsik tiotlak, on hora ijkuak kitemakaj uentli, pero xokiminnankilijkej. ¡Xakaj dios okinkak nion xakaj okiminnankilij! 30 Kemaj Elías ijkin okinmijlij nochimej on tlakamej:
—Xmonisiuikan notech. Niman nochimej on tlakamej okinisiuijkej, niman yejua oksejpa opeu kuektlalia on itlaixpan* toTEKO yejuan xoxotontoya. 31 Okikuik majtlaktli uan ome tetl, yejuan kijtosneki no ichkich kenon tribus yejuan kisaj itech ikoneuan Jacob yejuan toTEKO okijtoj itokayes Israel. 32 Niman ika on temej okichijchiu on itlaixpan* toTEKO. Kemaj okichijchiu sen apantli iyeualkan on tlaixpan*, kampa ueliskia kipiyaskia matlaktli uan makuijli litro de atl. 33 Niman ijkuak yokitlatlalij on kojtli* ipan on tlaixpan*, okitejtek on becerro niman okitlatlalij ipan on kojtli. 34 Kemaj okinmijlij:
—Xkintemiltikan naui tsotsokoltin uejueyimej ikan atl niman xtekakan ipan on nakatl niman ipan on kojtli.
Yejuamej okichijkej tlen okinnauatij. Kemaj Elías okinmijlij:
—Oksejpa xtekilikan.
Yejuamej oksejpa okitekilijkej. Niman okinnauatij yexpa ma kitekilikan atl. 35 On atl notlalojtoya iyeualkan on tlaixpan*, niman on apantli oten ika on atl. 36 Niman ipan on tiotlak ijkuak oajsik on hora para on tiotlajtojketl Elías kitemakas on uentli yejuan nochi tlatla, ononisiuij itech on tlaixpan*, niman ijkin onoueyikatsajtsilij: “¡NoTEKO, iDios Abraham, Isaac niman Israel: Xchiua para aman ma kimatikan ika tejua tiiDios in mokoneuan israelitas, niman ma kimatikan ika nejua nimitstekipanoua, niman nikchiua nochi in pampa tejua otinechnauatij! 37 ¡Xnechnankili, noTEKO! ¡Xnechnankili para in tlakamej ma kimatikan ika tejua tiDios, niman ika tikinmijlia ma nokuepakan oksejpa motech!”
38 Kemaj toTEKO okuajtitlan on tlitl, niman okitlatij on uentli, on kojtli, on temej niman hasta on tlajli kampa onkatka on tlaixpan*. Niman no, okuats on atl yejuan onkatka ipan on apantli. 39 Ijkuak nochimej on tlakamej ijkin okitakej, onotlakuantelketskej niman onopachojkej hasta ipan tlajli, niman okijtojkej: “ToTEKO yejua Dios! ¡Melauak toTEKO yejua Dios!”
40 Kemaj Elías okinmijlij:
—¡Xkinmajsikan on itiotlajtojkauan Baal! ¡Maka xkinkauilikan nion se cholojteuas!
Niman ijkuak yokinmajsikej, Elías okinnauatij ma kinuikakan itech on ayajtok itoka Cisón, niman ma ompa kinmiktikan.
Elías okichiu oración para ma kiaui
41 Kemaj, Elías okijlij Acab:
—Xuiya xtlakuati niman xtlaoniti, pampa ye uajkakistitiu kiautli chikauak.
42 Acab oyaj otlakuato niman otlaonito. Pero Elías otlejkok más tlakpak ipan on tepetl itoka Carmelo, niman ompa onotlakuantelkets onopachoj hasta ipan tlajli, niman okalaktij itsontekon itsajlan ikxiuan. 43 Kemaj okijlij itekitkau:
—Xuiya niman xontlacha kampaka onkaj on mar.
Yejua oyaj niman ontlachix, niman okijtoj:
—Xitla nikita.
Pero Elías okijlij:
—Xontlacha. Niman Elías chikomepa más okijlij ma ontlacha kampaka onkaj on mar.
44 Ijkuak on itekitkau ontlachix ika chikomepa, okijtoj:
—¡Nikita sen moxtsintli, ken sen makpajli ika pitentsin yejuan okis ipan on mar niman tlejkotiu.
Kemaj Elías okijlij:
—Xuiya, xkijliti Acab ma tlejko ipan icarreta, niman ma uiya chika xe kiaui. Tlamo sakin* xok uelis yas.
45 Niman Acab otlejkok ipan icarreta, niman oyaj ne Jezreel. Chika ijkuakon, ipan on cielo sanoyej yotlatlilejka ika on moxtli, niman sanoyej ajakaya. Kemaj opeu sanoyej chikauak kiaui. 46 Kemaj toTEKO okimakak fuerza Elías, niman Elías okuelpachoj itlaken hasta ixilan niman okisaloj. Kemaj onotlaloj hasta ne Jezreel, niman achtoj oajsik xken Acab.