Elías ocholojteu itech Jezabel niman oyaj Horeb
19
Acab okijlij Jezabel nochi on tlen Elías okichiu, niman kenijki otlanauatij para okinmiktijkej nochimej on itiotlajtojkauan Baal. 2 Kemaj Jezabel okititlan sen temachistijketl para ma kijliti Elías: “¡Nodioses ma nechmiktikan tla mostla mayanin xno yonimitsmiktij ken tejua otikinmiktij on itiotlajtojkauan on dios Baal.”3 Elías onomojtij ijkuak okimat ika uelis kimiktiskej. Yejua ika, amanaman okis niman oyaj ipan on kalpan itoka Beerseba, yejuan nokaua ne ipan iueyitlalpan Judá. Ompa okikau itekitkau. 4 Kemaj yejua oyaj niman onejnen se tonajli ipan on xalpatajkan. Kemaj ompa onotlalij itsintlan sen kojtli* itoka “Nextamalxotli” yejuan mayeualtik. Niman pampa xok kinekiya nemis, okijtoj: “¡Ma ijki noTEKO! ¡Xnechkixtili no nemilis, pampa nejua xninoteneua más nikuajli ken noachtojtajuan yejuan yomikkej!”
5 Niman ompa onotekak, itsintlan on “nextamalkojtli a” niman okochtiaj. Pero sen ángel oajsik niman ijkuak okiteteloj, okijlij: “Xmokuiteua niman xtlakua.”
6 Elías ontlatlachix iyeualkan, niman okitak ika nisiu kampaka itsontlan onkatka sen pan yejuan oiksik ipan tlixochtli, niman sen jarra ikan atl. Kemaj onokuiteu, otlakuaj niman oatlik. Kemaj oksejpa onotekak. 7 Más sakin*, on ángel yejuan toTEKO okuajtitlan ouajlaj ika okpa, niman ijkuak okiteteloj, okijlij: “Xmokuiteua niman xtlakua. Tlamo xtikxikos moojui.”
8 Elías onokuiteu, otlakuaj niman oatlik. Niman on tlakuajli okimakak chikaualistli. Kemaj onejnen 40 tonajli niman yeuajli hasta oajsik ne Horeb, ipan on itepeu Dios. 9 Ijkuak oajsik, okalak ipan sen ostotl, niman ompa okoch on yeuajli. Kemaj toTEKO okinots Elías, niman okijlij: “¿Tlinon tikchijtikaj nikan Elías?” 10 Yejua okinankilij: “Nejua xnikxikoua nikita on tlen xkuajli kichiuaj on mokoneuan pampa sanoyej nimitstlajsojtla*noTEKO Dios yejuan tikpiya nochi poder. Xnikxikoua pampa on israelitas yokitlalkauijkej mopacto* niman yokinxoxotonijkej motlaixpanuan*, niman okinmiktijkej motiotlajtojkauan. Sa nejua yoninokau, niman aman nechtejtemouaj para nechmiktiskej."
11 Niman toTEKO okijlij: "Xuajkisa nikan kiauak niman xmotelketsa nixpan ikuapan on tepetl." Kemaj toTEKO ompa opanok, niman sen ajakatl chikauak niman ika nochi poder okalau on tepetl niman okintlajtlapan on temej ixpan toTEKO. Pero toTEKO xokinotitij Elías ipan on ajakatl. Sakin de on ajakatl oonyak sen tlalolinilistli; pero toTEKO no xokinotitij Elías ipan on tlalolinalistli. 12 Niman ijkuak yopanok on tlalonalistli, oonyak sen tlitl. Pero toTEKO xokinotitij Elías ipan on tlitl. Pero sakin* ijkuak yopanok on tlitl, okakistik itlaj san yolik niman yemanki. 13 Ijkuak Elías okak, onixtlapachoj ika icapa. Okis niman onokau ikalakiyan on ostotl. Kemaj okak sen tlajtojli yejuan kijliaya: “¿Tlinon tikchiua paon, Elías?”
14 Yejua okinankilij: “Nejua xnikxikoua nikita on tlen xkuajli kichiuaj on mokoneuan pampa sanoyej nimitstlajsojtla* noTEKO Dios yejuan tikpiya nochi poder. Xnikxikoua pampa on israelitas yokitlalkauijkej mopacto* niman yokinxoxotonijkej motlaixpanuan*, niman yokinmiktijkej motiotlajtojkauan. Sa nejua yoninokau, niman aman nechtejtemouaj para nechmiktiskej.”
15 Kemaj toTEKO okijlij: “Xmokuepa ne ipan on xalpatlajkan Damasco kampa otiualeu. Xuiya niman xkuatêki Hazael ikan aceite para rey yes ne Siria, 16 niman Jehú, ikoneu Nimsi, xkuatêki ikan aceite para rey de Israel. Niman no xkuatêki Eliseo ikan aceite, ikoneu Safat, yejuan ualeua ipan on kalpan Abel-mehola. Xkuatêki ikan aceite para tiotlajtojketl yes yejuan mitspatlas. 17 Niman ijki nochimej on yejuan kimauistiliaj Baal yejuan xkinmiktis Hazael, kinmiktis Jehú, niman yejuan xkimiktis Jehú, kinmiktis Eliseo. 18 Pero nejua nikincuidaros ne Israel on 7 mil tlakamej yejuan xonotlakuantelketskej ixpan Baal, nion xokitenkuajkej."
Eliseo onochiu tiotlajtojketl
19 Elías okis ompa ne niman okinextito Eliseo, kampa tlaxoponiaya. Ipan itlal tekitiyaj majtlaktli uan ome yunta uakaxtin, niman yejua kuikaya on yejuan sa ika nochi yunta. Elías oyaj itech Eliseo niman okikentij icapa. 20 Kemaj Eliseo nimantsin okinkau iuakaxuan, onotlaloj ikuitlapan Elías, niman okijlij:
—Xnechkauili ma nikintenkuati notajuan ijkon ken titouikaj ijkuak titonauatiaj, niman kemaj nias mouan.
Elías okijlij:
—Uelis tias pero xkelnamiki on ika onimitskentij nocapab.
21 Eliseo onoxeloj itech Elías. Yejua oyaj niman okanato ome iuakax niman okinmiktij. Niman ika on kojtli* itoka yugo okikxitij on nakatl niman okintlakualtij on tlakamej. Kemaj iuan oyaj Elías niman onochiu itlapaleuijkau.