Acab kintlani on sirios
20
Ben-adad, rey de Siria, okinsentlalij nochimej isoldados niman 32 reyes inuan imincaballos niman imincarretas de guerra. Niman oyajkej ipan on ueyikalpan Samaria, okiyejyeualojkej niman okuijsokkej. 2 Yejua okintitlan itlajtojkauan ipan on ueyikalpan para ma kijlikan Acab, rey de Israel: 3 “Ijkin kijtoua Ben-adad: ‘Moplata niman mooro noyaxka. No ijki noyaxkauan mosiuauan niman on mokoneuan yejuan más chijchikajtokej noyaxka’.”4 On rey de Israel okinnakilij: “On melauak ken yotikijtoj ueyixtikaj rey. Nejua niman nochi tlen nikpiya tejua iyaxka.”
5 On tlajtojkamej oksejpa oyajkej okitatoj Acab, niman okijlijkej: “Ben-adad kijtoua: ‘Yonitlatitlan ma mitsijlitij xnechmaka moriquezas, mosiuauan niman mokoneuan. 6 Niman no nimitsijlia ika, mostla mayanin nikintitlanis notekitkauan ma tlatejtemotij ipan mopalacio niman ipan iminchan on motlapaleuijkauan, niman nochi tlen pajtio kikuiskej’.”
7 Kemaj on rey de Israel otlatitlan ma kinnotsatij nochimej on uejueyitlayekankej ipan on país, niman ijkin okinmijlij:
—Nemejuamej nenkitaj ika in rey kineki nechchiuilis tlen xkuajli, maski nejua yonikijli ika nikinmakas nosiuauan, nokoneuan, noplata niman nooro.
8 On uejueyitlayekankej niman nochimej on tlakamej ijkin okinankilijkej:
—Maka xkaki, nion maka xtlakamati.
9 Kemaj Acab okinmijlij on yejuan okintitlan Ben-adad:
—Xkijlikan nemoueyixtikaj rey ika nikchiuas nochi on tlen achtoj onechnauatij, pero xuelis nikchiuas on ken aman kineki.
On yejuan okintitlankej oyajkej okijlitoj Ben-adad kenijki okinnankilij on rey. 10 Kemaj Ben-adad oksejpa okintitlan itlajtojkauan para ijkin ma kijlitij Acab: “¡Tlami xamti ika xitlaj* nokauas de on ueyikalpan Samaria, nion kanaj se mapichtli tlajli yejuan uelis kiktiskej nosoldados. On dioses ma nechmakakan ueyi castigo tla xmelauak ijki nikchiuas!
11 Pero on rey de Israel otlanauatij ijkin ma kijlikan Ben-adad: “Maka xpaki ijkuak xe titetlani.”
12 Ijkuak Ben-adad okiselij on tlajtojli, tlaonitikatka iminuan on oksekimej reyes ipan on kalmatsitsimej yejuan okinchijchijkaj. Kemaj okinmijlij itlapeliuikauan: “¡Tiauij tontlauijsokij!” Niman nochimej opeu notlaliaj para tlauijsokiskej ipan on ueyikalpan.
13 Chika ijkuakon, sen tiotlajtojketl oajsik itech Acab, rey de Israel, niman okijlij:
—ToTEKO yokijtoj: "Maski tikinta sanoyej miyekej motlauelikniuan, nejua nimitsinmaktilis aman; para tikmatis ika nejua ninemoTEKO."
14 Acab okitlajtoltij: —¿Niman itechkopa akinon nechinmaktilis?
On tiotlajtojketl okinankilij:
—ToTEKO yokijtoj ika intechkopa on telpokamej yejuan kimpaleuiyaj on gobernadores ipan on regiones.
Niman kemaj Acab okitlajtoltij:
—¿Niman akinon achtoj tlauijsokis?
Niman on tiotlajtojketl okinankilij:
—Tejua.
15 Kemaj Acab okinsentlalij niman okimpou on telpokamej yejuan kimpaleuiyayaj on gobernadores ipan regiones, niman katkaj 232, niman nochimej on soldados israelitas, katkaj 7 mil tlakamej. 16 Okiskej ijkuak tlakualispan, chika Ben-adad niman on 32 reyes yejuan ompa iuan nemiyaj ye tlajtlauantikatkaj ijtik on kalmatsitsimej. 17 Achtoj oyakatstiajkej intlapaleuijkauan on gobernadores. Ijkuak itlachixkauan Ben-adad okimachistijkej ika sekimej tlakamej yokiskej ne Samaria niman ye uajlauij, 18 yejua ijkin otlanauatij: “¡Sano ijki, tla uajlauij san kuajlotika noso ikan tlauijsokilistli, nikinneki xkinuajuikakan notech yoltokej!”
19 Intlapaleuijkauan on gobernadores okiskej tlayakapan ipan on ueyi kalpan niman on soldados okinkuitlapanuijkej. 20 Niman cada israelita okimiktij itlauelikniu yejuan iuan onouijsokij. Chika on sirios chojcholouayaj, on israelitas okintojtokakej. Pero Ben-adad, iminrey on sirios, ocholojteu ipan icaballo iminuan keskimej soldados yejuan yetiayaj ipan caballos. 21 Kemaj on rey de Israel oyakatstiaj niman okinoyaxkatij* imincaballos niman imincarretas de guerra, niman ijkon okintlan on sirios.
22 Sakin on tiotlajtojketl oyaj okitato on rey de Israel, niman okijlij:
—Xkinmiyekili mosoldados, niman kuajli xnemili tlinon uelis tikchiuas, pampa ipan se xipan on rey de Siria oksejpa mitsajuijsokis.
23 Itlapeliuikauan on rey de Siria ijkin okijlijkej:
—Imindioses on israelitas yejuamej dioses de ipan on tepemej. Yejua ika techtlanij. Pero tla iminuan titouijsokij ipan on ixtlauatl tikmatstokej ika tikintlaniskej. 24 On tlen aman noneki tikchiuas ueyixtikaj rey sa no yejua in: Tikimpatlas on reyes para xok yejuamej kinmandaroskej on soldados. Yej on uejueyitlayekankej ma kinyekanakan on soldados. 25 Kemaj xkinsentlali on soldados sano ichkich kenon yejuan okintlankej. Niman no xsentlalij oksejpa ichkich on caballos niman on carretas de guerra kenon yejuan achtoj otikpix. Kemaj tontouijsokiskej iminuan yejuamej ipan on ixtlauatl, niman tikintlaniskej.
Ben-adad okak on tlen okijlijkej niman ijki okichiu.
26 Se xipan sakin*, Ben-adad okinsentlalij on soldados de Siria, niman oyajkej ne ueyikalpan Afec para onouijsokkej iminuan on israelitas. 27 Ijkon on israelitas no okinsentlalikej iminsoldados niman okinmakakej on tlen kitekitiltiskej, niman okiskej okinmixnamikitoj on sirios. Ijkuak on israelitas onosentlalitoj inmixpan on sirios, nesiyaj semi xmiyekej ken ometejtsin manada de chivos, pampa on sirios kitemitijtikatkaj nochi on ixtlauatl.
28 Kemaj ijkuakon, oyaj sen tiotlajtojketl itech on rey de Israel, niman okijlij:
—Ijkin kijtoua toTEKO: “Pampa on sirios yokijtojkej ika nejua niDios de on tepemej, niman xniDios de on ixtlauamej, nimitsinmaktilis nochimej on miyekej tlakamej. Ijkon nenkimatiskej ika nejua ninemoTEKO.”
29 Chikome tonajli on sirios niman on israelitas onochachantijkej nijixnamiktikatkaj, niman ijkuak ika chikome tonajli opeu nouijsokij. Ipan on tonajli on israelitas okinmiktijkej 100 mil soldados sirios yejuan yayaj iminikxipan. 30 On oksekimej soldados ocholojkej niman okalakkej ipan on ueyikalpan Afec, pero on tepanchinantli yejuan ika yeualtsakutika on ueyikalpan ouets impan on 27 mil soldados yejuan ompa oniyankaj niman omikkej. Ben-adad no ocholojteu, niman oajsik ipan on ueyikalpan, kampa nijiyanaya techajchan.
31 Kemaj itlapeliuikauan okijlijkej:
—Tikmatstokej ika on reyes de israel kipiyaj teiknelilistli* . Tla ijkon tej, ma tiktotlaliltikan tlakentin yejuan tesontikej niman sen mekatl ipan tokechkojyo para nesis ika titokneliaj, niman ma tiuiyan itech on rey de Israel. Ijkon tej, tikitaskej tla techiknelia niman xtechmiktia.
32 Kemaj on tlapaleuijkej okinotlaliltijkej tlakentin yejuan tesontikej niman sen mekatl ipan inkechkojyo, niman oyajkej itech on rey de Israel niman okijlijkej:
—Ben-adad mitsiknotlajtlanilia, tejua Ueyixtikaj Rey, para xmanauili inemilis.
Acab okiminnankili:
—¿Tlen, sanken* nemi? ¡Para nejua, ken yakaj nokniu!
33 On tlakamej okakkej ika kuajli kinselia, niman okineltokilijkej. Yejua ika amanaman okinankilijkej:
—¡Ben-adad melauak ken mokniu Ueyixtikaj Rey!
Acab okinankilij:
—¡Xuiyan tej, xkanatij!
Kemaj Ben-adad oyaj itech Acab, niman Acab okijlij ma tlejko ipan icarreta de guerra. 34 Niman Ben-adad okijlij:
—Nimitsinkuepilis on uejueyi kalpanmej yejuan notataj okinkuilijka motataj, niman tejua uelis tikpiyas kampa titlanamakas ne Damasco, no ijki ken notataj kipiyaya ne Samaria.
Acab okinankilij:
—Niman nejua, nimitsprometerouilia ika nimitskauilis xuiya.
Ijkon tej, Acab okichiu sen pacto* iuan Ben-adad niman okauilij oyaj.
Sen tiotlajtojketl okijtoj tlinon ipan nochiuas Acab
35 Kemaj, pampa toTEKO ijki otlanauatij, sen tiotlajtojketl yejuan kisa intech sekimej tiotlajtojkej okijlij okse tiotlajtojketl:
—¡Xnechmaili!
—Pampa xotiknek otinechmailij, tejua xotiktlakamat itlanauatil toTEKO. Yejua ika, ijkuak tikisas nikan niman tias, sen león mopan chapanis niman mitsmiktis.
Niman melauak ijki onochiu. Ijkuak on tiotlajtojketl onoxeloj iuan on okse, sen león ouajlaj okinamikiko niman okimiktij.
37 Sakin on tiotlajtojketl okinamik okse tlakatl, niman no okijlij ma kimaili. On tlakatl okimailij chikauak niman okikokoj. 38 Kemaj on tiotlajtojketl oyaj okichato on rey ipan ojtli, pero ixtlapachijtiaya ika sen tela para maka kixmatiskia on rey. 39 Niman ijkuak on rey panotiaya, on tiotlajtojketl okijlij chikauak:
—In motekitkau nemiya ipan on tlauijsokilistli. Ompa sen soldado onechijli ma nicuidaro sen tlakatl yejuan okajsikej. Onechijlij tla nikchololtia yej nejua nechmiktiskej san ipampa, noso niktlaxtlauas sen multa de yeyi mil tepostomin de plata. 40 Niman pampa in motekitkau tejua Ueyixtikaj Rey, okse tekitl kichijtinemiya, on tlakatl ocholojteu.
Kemaj on rey okinankilij:
—Sano tejua yotimotlajtlakolmakak, niman nochiuas ken yotikijtoj.
41 Kemaj nimantsin on tiotlajtojketl ouajnixtlapoj, niman on rey ijkuakon okixmat niman okimat ika tlakaj semej on tiotlajtojkej. 42 Kemaj on tiotlajtojketl okijlij:
—Ijkin kijtoua toTEKO: “Pampa tejua otikmakau on rey yejuan yonikijtojka para mikis, aman tejua tiktlaxtlauas ikan monemilis por inemilis yejua, niman mochanejkauan* mikiskej impampa ichanejkauan."
43 Kemaj on rey de Israel onajmantia niman okualantia ijkuak oyaj niman okalak ipan ipalacio ne Samaria.