Acab niman iuvasyoj Nabot
21
Ye uejkajtika ijkuak yopanok on tlajtlamach*, ijkin onochiu ipan on kalpan Jezreel. Sen tlakatl itoka Nabot, kipiyaya sen uvasyoj yejuan onkatka itech ipalacio Acab, rey de Samaria. 2 Se tonajli Acab okijlij Nabot:—Xnechmaka mouvasyoj para nejua uelis ompa nikpiyas sen tlatokyoj pampa nokaua inakastlan nopalacio. Nimitspatilis iuan okse yejuan más kuajli, noso tla tikneki nimitstlaxtlauilis ikan tomin kech tejua tiknekis.
3 Pero Nabot okinankilij Acab:
—Maka noTEKO ma nechkauili nimitsmakas on herencia yejuan onechmakakej notajuan.
4 Acab oyaj ichan onajmantiaj niman okualantiaj ipampa on tlen okijlij Nabot, pampa okijlij xkimakaskia on herencia yejuan okimakakej itajuan. Oajsik ne ichan niman onotekak, konixnamiktikatka tepanchinantli, niman xokinek otlakuaj. 5 Kemaj Jezabel, isiuau, okinisiuij niman okijlij:
—¿Tline sanoyej tiajmankamiki, niman xtikneki titlakuas?
6 Acab okinankilij:
—Onitlajtoj iuan Nabot, on chanej* Jezreel, niman oniktlajtlanilij ma nechnamakilti iuvasyo, noso tla kineki, nikmakas okse para iuan nikpatlas. Pero yejua xkineki nechmakas.
7 Kemaj Jezabel, isiuau, okinankilij:
—¿Tlen xtejua titlamandaroua nikan Israel? Xmokuiteua, xtlakua niman makasa xajmankamiki. ¡Nejua nikitas kenijki nimitsmakas on iuvasyoj Nabot!
8 Yejua nimantsin opeu kinmijkuiloua amatlajkuiloltin ikan itoka Acab, niman okintlalilij isello on rey. Kemaj okintitlanilij on uejueyitlayekankej niman on ueuentsitismej yejuan chantij ipan iueyikalpan Nabot. 9 Ipan on amatlajkuiloltin kinmijliaya: “Xtlanauatikan nesauajli, niman xtlalikan Nabot kampa notlaliaj on uejueyixtokej. 10 Kemaj xkintlalikan ixpan omemej tlakamej istlakatkej niman xkinchiualtikan ipan ma istlakatikan. Ma kijtokan ika yejua okuijuikaltij Dios niman on rey. Kemaj xkixtikan niman xmiktikan ikan temej.”
11 On uejueyitlayekankej, niman on ueuentsitsimej ipan iueyikalpan Nabot, okichijkej on tlen Jezabel okinnauatij ipan on amatlajkuilojli yejuan okintitlanilij. 12 Otlanauatijkej nochi tlakatl ma nosaua, niman Nabot okitlalijkej inmixpan on chanejkej kampa tetlakaitaloyan. 13 Kemaj oajsikej on omemej tlakamej istlakatkej, niman oistlakatkej itechkopa Nabot inmixpan nochimej on chanejkej ipan on ueyikalpan. Okijtojkej ika Nabot okuijuikaltij Dios niman on rey. Kemaj okixtijkej ipan on ueyikalpan niman okimiktijkej ikan temej. 14 Kemaj otlatitlankej ma kijlitij Jezabel ika Nabot yokitemojmotlakej niman yomik.
15 Ijkuak Jezabel okimat, okijlij Acab:
—Xuiya niman xmoyaxkati on iuvasyoj Nabot yejuan xkinekiya mitsnamakiltis. Yejua aman xok nemi, yej yomik.
16 Ijkuak Acab okimat ika Nabot yomik, oyaj niman okinoyaxkatij* on uvasyoj.
17 Kemaj toTEKO okinots Elías, yejuan ualeua on kalpan Tisbe, niman okijlij: 18 “Xuiya amanaman xkitati Acab, rey de Israel, yejuan chanti ne Samaria. Amantsin nemi ipan iuvasyoj Nabot para okinoyaxkatito. 19 Ijkin xkijliti: 'ToTEKO kijtoua: Tejua titemiktiani niman titlachteki. Otikuilij on tlen iyaxka* katka Nabot. Yejua ika, sano ompa kampa on chichimej okipajpalojkej iyesyo, no kipajpaloskej moyesyo’.”
20 Elías oyaj niman ijkuak Acab okitak, ijkin okijlij:
—¡ Notlauelikniu, yotinechnextij!
Niman Elías okinankilij:
—Kemaj yotimitsnextij, pampa xitlaj* kuajli tikchiua. Yej tikchiua nochi tlen xkuajli ixpan toTEKO. 21 Yejua ika tej, toTEKO kijtoua: "Nimitspopolos, niman tlamis nikinmiktis mokoneuan niman mouejkakoneuan yejuan tlakamej yejuan nemij ne Israel maski on yejuan xuejueyixtokej noso on yejuan uejueyixtokej. 22 Nikchiuas iuan mofamilia ken onikchiu iuan ifamilia Jeroboam, ikoneu Nabat, niman iuan ifamilia Baasa, ikoneu Ahías, pampa sanoyej onechkualanijkej ika okichijkej ma tlajtlakokan on israelitas." 23 Niman itechkopa Jezabel, toTEKO kijtoua: "On chichimej kikuaskej Jezabel itech itepanchinan on ueyikalpan Jezreel.” 24 San akinon yejuan ken tikita yejuan mikis nikan ipan in ueyikalpan, kikuaskej chichimej, niman san akinon yejuan mikis neka ipan mijlaj, kikuaskej on tsojpilomej.
25 (Xakaj okse onen ken Acab, yejuan okichiu tlen sanoyej xkuajli ixpan toTEKO. Niman Jezabel on isiuau, yejua kiyoyoleuaya para ma kichiua on tlen xkuajli. 26 Sanoyej xkuajli okichiu Acab, on ika okinmauistilij ídolos ijkon ken kichiuayaj on amorreos, yejuan toTEKO okinkixtij para onochantijkej on israelitas.)
27 Ijkuak Acab ijkon okak, okitetsayan itlaken, niman onotlakentij ikan tlakentli* yejuan tesontik, niman onosau. Kochiya ika on tlakentli* yejuan tesontik niman nochipa sa ajmankanemiya.