Salomón okichijchiu ipalacio
7
Salomón okichijchiu ipalacio, niman otlan kuajli kichijchiua ipan majtlaktli uan yeyi xipan.2 No okichijchiu sen palacio yejuan okitokayotij “Ikojyoj on Líbano”. In palacio kipiyaya 45 metros ika ueyak, niman 22 metros uan tlajko ika patlauak, niman majtlaktli uan yeyi metros uan tlajko ika uejkapan. On palacio okichijchijkej ipan naui tlatekpantli pilares de cedrokojtin yejuan maniyaj. Niman inkuatipan okintenkej on kojtin* de cedro ueueyakej . 3 On kojtin* tlaxintin ueueyakej, katkaj 45, niman xexelijtikatkaj yexkantipan de 15 kojtin. In kojtin* okintlalij inkuatipan on pilares para tlamamajtikatkaj. Impan on kojtin* ueueyakej más tlapani okintlalilij tablas de cedro. 4 On palacio okipix yeyi tlatekpantli ventanas ipan on ome lados, niman on ventanas nijixnamiktikatkaj. 5 Nochi itsakuijlouan niman iventanas, cuadradas katkaj, niman nochimej nijixnamiktikatkaj ipan yeyi tlatekpantli.
6 No ijki Salomón okichijchiu sen ueyikalixkajli yejuan okichijchijkej ipan pilares. In ueyikalixkajli kipiyaya 22 metros uan tlajko ika ueyak, niman majtlaktli uan yeyi metros uan tlajko ika patlauak. Niman ixpan in ueyikalixkajli no okichijchiu iyanka* yejuan no kipiyaya pilares.
7 Niman no okichijchiu on kalixkajli kampa onkatka on trono* niman ompa teyolkuitiaya yejuan okitokayotij “Teyolkuitiloyan”. In kalixkajli okitlapachoj ikan tablas de cedro, desde tlatsintlan hasta tlakpak.
8 On palacio kampa chantiya Salomón, ixpan onkatka on Teyolkuitiloyan niman kinxelojtikatka sen kiauak intlakojtian. Ipalacio niman on Teyolkuitiloyan no ijki tlachijchijtli katka. No ijki, okichijchiu sen palacio para ompa ochantik ichpoch on rey de Egipto yejuan okinosiuatij. Niman on palacio kipiyaya sen kalixkajli no ijki kenon oksekimej palacios kipiyayaj. 9 Nochi in uejueyimej kaltin niman on ueyi kiauak okinchijchijkej ikan uejueyimej temej yejuan más kualtsitsimej. Okinchijchijkej desde icimiento* hasta ikuatipan, ikan on temej yejuan tlatejtektin katkaj ika sierra niman san se tlatemachijtin katkaj. 10 Para okichijchiu icimiento* on kaltin, on cimientos* okichijchiu ika uejueyimej temej yejuan más patiojkej. Seki kipiyaya naui metro uan tlako ika ueyak, niman okseki kipiyaya yeyi metro uan tlajko. 11 Tlapani ipan incimiento* okintlalij oksekimej temej yejuan patiojkej niman okintekkej ken nonekiya. Niman ipan on temej, okitlalilij kojtli* de cedro. 12 On tepanchinantli yejuan ika okiyeualtsaku on ueyi kiauak, kipiyaya yeyi pantli temej, niman más tlapani, okintekak kojtin* ueueyakej de cedro yejuan tlaxintin. Ijkin nesiya itepanchinanyo on ueyitiopan niman itepan ikalixpan on ueyitiopan.
Salomón kitlakeua Hiram
13 On rey Salomón okitekuitlan Hiram, yejuan ualeuaya Tiro. 14 In tlakatl Hiram, ikoneu katka sen siuakaualtsintli yejuan kisaya itech itribu* Neftalí. Itataj Hiram, katka sen tlakatl yejuan chanej* ne Tiro, niman yejua kitekitiya on tepostli bronce. Hiram sanoyej tlamatki* katka, tlamachilisyej katka niman sanoyej ueliya kitekitiya on tepostli bronce ken itataj. Yejua ika tej, oyaj itech Salomón, niman okichijchiu nochi tlen Salomón okinauatij.
15 Hiram okichijchiu ome pilar de bronce. On pilares kipiyayaj chikueyi metro ika uejkapan niman makuijli metro uan tlajko ika tomauak yejuan okintlalijkej ixpan on ueyitiopan. 16 No ijki, okichijchiu ome kuatlajmachyotl yeualtikej de bronce para okintlalij inkuapan on pilares. On kuatlajmachyomej kipiyayaj ome metro ipan 25 centimetros ika uejkapan. 17 No okichijchiu ome tsatsastli xixinepaltikej ken cadenas. On tsatsastin okintlalij ipan cada kuatlajmachyotl yejuan onkatkaj ikuatipan on pilares. 18 On tsatsastin yejuan onkintlalij impan on ome kuatlajmachyomej yejuan onkatkaj inkuapan on pilares, okintlajmachyotij ikan ome tlatekpantli granadas de bronce. 19 Niman on kuatlajmachyomej yejuan onkatkaj inkuapan on pilares yejuan okintlalijkej ipan ikalixpan on ueyitiopan, kipiyayaj se metro ipan 80 centimetros ika uejkapan, niman itlachalis katka ken lirio xochitl. 20 Iyeualkan cada kuatlajmachyotl kampa ikuapan ika, onokau más tomauakkampa más tomauak, nesiya ken itlaj globo. Itech on tsatsastli, okiyeualoltilij ikan ome tlatekpantli 200 on yejuan nesiya tlajtlacha ken granadas. 21 Hiram okintlalij on pilares itech ikalixpan on ueyitiopan. Yejuan okitlalij tlayekmakopa, okitokayotij Jaquín, niman yejuan okitlalij tlaopochmakopa okitokayotij Boaz. 22 Inkuatipan on pilares, kimpiyayaj kuatlajmachyomej yejuan intlachalis ken lirio xochitl. Ijkon otlan on tekitl de on pilares.
Hiram okinchijchiu on tlajtlamach* yejuan onkaj ijtik on ueyitiopan
23 Kemaj Hiram okichijchiu sen ueyi pila yeualtik de bronce para ipan atekayaj. On pila kipiyaya naui metro uan tlajko ika koyauak, matlaktli uan yeyi metros ika yeualtik niman ome metro uan tlajko ika uejkapan. 24 Itlanika itenyeuajlo on pila, okixneskayotij ome atekonmekatl ikan ome tlatekpantli de atekonmamej. Niman cada 45 centimetros okitlalilij majtlaktli atekonmajmej. On pila niman on atekonmamej, san se ueyi tlachijchijtli katka. 25 Yejua in pila okitlalij ipan majtlaktli uan ome intlakapan okichuakaxtin yejuan tlachijchitin ikan bronce. Yeyi ontlachixtikatkaj kampaka norte, okse yeyi ontlachixtikatkaj kampaka sur, okse yeyi ontlachixtikatkaj kampaka ikisayan tonaltsintli, niman okse yeyi ontlachixtikatkaj kampaka ikalakiyan tonaltsintli. Ijkon tej, on okichuakaxtin notsijtsinnamiktikatkaj, niman on pila tlapani onkatka. 26 Itepanyo on pila tilauak katka chikueyi centimetro, niman itenmimijlo uajkuelpachijtikatka ken itlaj ixochiyo lirio. Ijtik on pila onakiya 40 mil litro atl.
27 No okichijchiu majtlaktli carretas de bronce. Cada carreta kipiyaya se metro ipan 80 centimetros ika ueyak niman ika patlauak. Ika uejkapan kipiyaya se metro ipan 35 centimetros. 28 Ijkin okinchijchijkej on carretas: Cada carreta okintlatlapalotekilij kojtin* ipan sen marco niman onokau ken kaltechtli. 29 Niman ijtik on marco okinmixneskayotij leones, toros niman querubines*. Inkuapan niman inmikxitlan on yolkej okintlajmachyotij ikan xochimej de bronce. No okinmixneskayotij on tlapalokojtsitsimej. 30 Cada carreta kipiyaya naui rueda tlachijchitli ikan bronce, niman on tepostli ueyak tlachijchitli ikan bronce yejuan ipan salijtiayaj on ruedas. Niman cada carreta okitlalilij naui ikxiuan tlachijchitli ikan bronce para kojtik katka. Se kipiyaya cada esquina tlatsintlan de on pila. Niman cada carreta okitlalilij naui ikxiuan tlachijchitli ikan bronce. Para on pila noseuijtikatka ipan, cada carreta okitlalilij sen ikxi ipan cada esquina tlachijchitli ikan bronce. Niman ipan cada ikxi okitlajmachyotij inajnakastlan ikan xochitl. 31 Tlapani ipan cada carreta onkatka sen tlatsakuyotl yejuan yeualtik, niman ijtik on tlatsakuyotl onkatka on pila. On tlatsakuyotl kipiyaya 45 centimetros ika tlakpak, niman kipiyaya 68 centimetros ika koyauak. No ijki, ipan on tlatsakuyotl kipiyaya tlajmachyomej. Inmarcos on carratas xyeualtikej katkaj, yej cuadrados. 32 On naui rueda onkatkaj tlatsintlan de on kojtin* yejuan onkaj ipan on marcos, onkatkaj naui rueda. Niman on tepostin yejuan ika salijtiuij iruedas san se ueyi tlachijchijtli katkaj iuan on carreta. Cada rueda kipiyaya 68 centimetros ika uejkapan. 33 Iminruedas on carretas katkaj ken iruedas sen carreta de nouijsokilistli. On tepostin yejuan ika salijtiayaj on ruedas, okichijchiu ikan on tepostli bronce, niman nochi ipartes on ruedas no tlachijchitin katkaj ikan bronce. 34 Cada esquina ipan on carreta okipix se ikxi, niman san se ueyi tlachijchijtli katka iuan on carreta. 35 Tlakpak ipan on carreta okitlalilij itenyeual yejuan kipiyaya 22 centimetros ika patlauak. On tlapalokojtsitsimej niman on itentlajmachyo yejuan kistiaya para tlakpak san se ueyi tlachijchijtli katka iuan on carreta. 36 Ipan on itenyeual, Hiram okinmixneskayotij querubines*, leones niman pameras. Okitlalilij itlajmachyo nochiuiyan kampa ueliya kitlaliliaya on tlajmachyotl. 37 Ijkon tej, Hiram okichijchiu on majtlaktli carreta tlachijchitin ikan bronce. San se tlatemachijtin niman san se tlachalistli kipiyayaj, pampa okinchijchiu ipan san se molde de tlalajmojli.
38 No ijki, okichijchiu majtlaktli pilitas de bronce yejuan okintlalij ipan on carretas. Cada se kipiyaya se metro ipan 80 centimetros ika uejkapan, niman ijtik onakiya 880 litros atl. Niman cada se okitlalij ipan se de on majtlaktli carretas yejuan okinchijchiu. 39 Kemaj okinmiktik itech on ueyitiopan niman makuijli okitlalij tlayekmakopa niman on okse makuijli okitlalij tlaopochmakopa. Niman on ueyi pila okitlalij ixpan on ueyitiopan, okontlachaltij kampaka Sur ika niman tlayekmakopa, kampaka ikisayan tonaltsintli.
40 No ijki okinchijchiu teposkontin, palas niman tazas yejuan uejueyimej. Ijkin Hiram otlan kichiua on tekitl yejuan Salomón okinauatij ma kichiua ipan iueyitiopan toTEKO. 41 In tlajtlamach* yejuan okichijchiu Hiram: Ome pilar, niman ome ikuatlajmachyo yejuan okinchijchiu yeualtikej para okintlalij inkuatipan on pilares. No ijki, okichijchiu ome tsatsastin para okintlalij tlapani ipan inkuatlajmachyo on pilares. 42 No okichijchiu 400 granadas yejuan ika okintlajmachyotij on tsatsastin. Cada tsatsastin okitlalilij ome tlatekpantli granadas, niman on tsatsastin okintlalijkej impan on kuatlajmachyomej yeualtikej yejuan onkatkaj inkuatipan on pilares. 43 No ijki okichijchiu on majtlaktli carretas, on majtlaktli pilitas yejuan okintlalijkej impan on carretas, 44 on ueyi pila kampa kitekayaj atl iuan on majtlaktli uan ome ixneskayouan on okichuakaxtin yejuan onkatkaj tlatsintlan de on ueyi pila, 45 on teposkontin, on teposxoiltin niman on tazas uejueyimej.
Nochi in tlajtlamach* yejuan Hiram okichijchiuilij on rey Salomón para okintlalij ipan iueyitiopan toTEKO, tlachijchitin katkaj ika bronce yejuan petlanki. 46 On rey otlanauatij ma kichijchiuakan nochi in, ika moldes de tlalajmojli ne ipan iueyitlalpan on río Jordán, nisiu Sucot niman Saretán. 47 Salomón xokitemachiu on bronce yejuan okitekitiltijkej para okichijchijkej nochi on tlajtlamach* pampa sanoyej miyek katka.
48 No ijki Salomón otlanauatij ma kichijchiuakan ikan oro in okseki tlajtlamach* yejuan notekitiltiaya ipan iueyitiopan toTEKO: On tlaixpan*, on mesa kampa kitlaliayaj pan yejuan kiteititia ika toTEKO nemi touan, 49 on lámparas yejuan okitlalijkej ixpan on kalijtik kampa Más Tlayekkan, (Makuijli lámpara okintlalijkej tlayekmakopa niman okse makuijli okintlalijkej tlaopochmakopa.) inuan inxochiuan, intlauiltsitsiuan, niman itepostlakitskil. 50 No ijki okinchijchikej copas, copitas yejuan ika kiseuiyayaj on tlauiltsitsimej, tazas yejuan uejueyimej, cucharas yejuan uejueyimej niman popochkontsitsimej yejuan nochi de oro katkaj. Niman no okinchijchikej bisagras de oro para okintlalij on tsakuijlomej ipan on kalijtik kampa Tlayekkan niman ipan on kalijtik kampa Más Tlayekkan. Niman no, okinchijchiu para on oksekimej itsakuijlouan on ueyitiopan.
51 Niman ijkuak otlankej on tekitl de iueyitiopan toTEKO, rey Salomón okiktik nochi on tlajtlamach* de oro niman de plata yejuan David, itataj, okiyaxkatijka toTEKO, niman okimeu ipan iueyitiopan toTEKO kampa kimeuaj on tlajtlamach* yejuan patioj.