Salomón kichijchiua on ueyitiopan
6
Salomón opeu kichijchiua iueyitiopan toTEKO ijkuak kuikaya naui xipan ika tekiti ken rey ne Israel. Opeu kichijchiua ipan on metstli de Ziv, yejuan ika ome metstli de on xipan. Ijkuakon kuikaya 480 xipan ika on israelitas okiskej Egipto.2 On ueyitiopan yejuan rey Salomón okichijchiuilij toTEKO kipiyaya 27 metros ika ueyak, chiknaui metros ika patlauak. niman matlaktli uan yeyi metros uan tlajko ika uejkapan. 3 Ikalixpan on ueyitiopan, kipiyaya chiknaui metro ika patlauak, no ichkich ken patlauak on ueyitiopan, niman naui metro ika ueyak. 4 Salomón okitlalilij on ueyitiopan ventanas yejuan tsatsastikeja. 5 Inajnakastlan niman ikuitlapan on ueyitiopan, no okinchijchiu cuartitos. 6 On cuartitos katkaj yeyitlanepantli. On yejuan tlatsintlan onkatkaj kipiyayaj ome metro ipan 25 centimetros ika patlauak. On yejuan onkatkaj ipan on ika ome tlanepantli kipiyayaj ome metro ipan 70 centimetros. Niman on yejuan onkatkaj tlakpak kampa ika yeyi tlanepantli kipiyayaj yeyi metro ipan matlaktli uan majkuijli centimetros. On cuartitos kipiyayaj tlapalokojtin tomajkej yejuan salijtikatkaj ipan pilares ikuitlapan itepanyo on ueyitiopan para ijkon on tlapalokojtin xokintlalaktijkej ipan itepanyo on ueyitiopan.
7 Ipan on ueyitiopan okintekitiltijkej temej yejuan achtoj kualtsin okinxinkej ne kampa kinkixtiayaj on temej, niman ijkon xitlaj* okakistik ikan martillos, ika cinceles nion itlaj ika okse tepostli ijkuak okichijchijkej on ueyitiopan. 8 Inkalakiyan on cuartitos yejuan onkatkaj tlatsintlan ipan on achtoj tlanepantli, nokauaya kampaka tlayekmakopa de on ueyitiopan. Niman para tlejkolouaya ipan on cuartitos yejuan tlajkotian ipan on ika ome tlanepantli niman yejuan kampa ika yeyi tlanepantli, onkatka sen escalera yejuan mamalakachtlejkotoya. 9 Ijkuak Salomón otlan kichijchiua on ueyitiopan, okikuatsaku ikan tlapalokojtin tomajkej niman ikan tablas de cedro okitlajmachyotij. 10 On cuartitos yejuan okinchijchiu iyeualkan on ueyitiopan, cada se kipiyaya ome metro ipan 25 centimetros ika uejkapan. In cuartitos okinsaloj ipan itepan on ueyitiopan ikan tlapalokojtin tomajkej yejuan de cedro.
11 Kemaj toTEKO okinots Salomón, niman ijkin okijlij: 12 “Pampa ye tikchijchijtikaj in ueyitiopan, nikneki nimitsijlis: ‘Tla timouika ipan noleyes niman tikintlakamati nochi notlanauatiluan, motechkopa nikchiuas on tlen onikprometerouilij motataj David. 13 Niman nejua, nichantis intsajlan on israelitas, niman xnikintlauelkauas nokoneuan israelitas.' "
14 Salomón otlan kichijchiua on ueyitiopan. 15 Ijkin okichijchiu. Okitlapachojkej on tepantli yejuan tlaijtik, ikan tablas de cedro, desde tlakpak hasta tlatsintlan, niman on ipiso yejuan de temej, okintlapachoj ikan tablas de ciprés. 16 No ijki, okitlajkotsaku ijtik on ueyitiopan para okixeloj on kampa Tlayekkan iuan on Más tlayekkan. On Más Tlayekkan kipiya chiknaui metros ika patlauak, okitlapachojkej ikan tablas de cedro. Okitlapachoj desde tlakpak hasta tlatsintlan. 17 On kalijtik yejuan nokauaya ixpan on kampa Más Tlayekkan, kipiyaya matlaktli uan chikuasen metros ika ueyak. 18 Nochi itepan on ueyitiopan yejuan tlaijtik, okitlapachojkej ikan tablas de cedro, niman okitlajmachyotijkej ikan miyek xochitl niman itlakyo ayojtli. Nochi on tablas katkaj de cedro. Niman nochimej on temej kualtsin tlapachijtikatkaj, nion achijtsin xnestikatkaj.
19 No ijki, Salomón otlanauatij para ma kikuektlalikan on kampa Más Tlayekkan, para ompa okitlalijkej iyekcaja toTEKO yejuan kipiya ipacto*. 20 On tlaijtik kampa Más Tlayekkan, kipiyaya chikanui metros ika ueyak, chiknaui metros ika patlauak niman chiknaui metro ika uejkapan. Itepan on kampa Más Tlayekkan, okalauilijkej oro yejuan más kuajli, niman no okalauilijkej oro yejuan más kuajli on tlaixpan* de cedro. 21 No ijki, okalauilijkej oro yejuan más kuajli ikalijtik on Tlayekkan. Niman ikalakiyan ne kampa Más Tlayekkan, okipilojkej cadenas de oro yejuan no okalauilijkej oro. 22 Ijki tej, nouiyan ijtik on ueyitiopan okalauilijkej oro. No ijki okalauilijkej oro on tlaixpan* yejuan okitlalijkej ixpan on kalijtik kampa Más Tlayekkan.
23 No okichijchijkej ome querubín* ika on kojtli* olivo para okintlalij kampa Más Tlayekkan. Cada queribín kipiyaya naui metro uan tlajko ika uejkapan. 24-25 On omemej querubines san se tlatemachijtli kipiyayaj. In kijtosneki iminmastlakapaluan cada se kipiyaya naui metro uan tlajko niman kipiyayaj san se tlachalistli. Niman cada mastlakapajli kipiyaya ome metro ipan 25 centimetros. Ijkon tej, on ome mastlakapaltin desde se ikuayakapitsko hasta on okse ikuayakapitsiko, kipiyaya naui metro uan tlajko ika ueyak. 26 No ijki, on ome querubines kipiyayaj naui metro uan tlajko ika uejkapan. 27 Okintlalijkej on ome querubín kampa Más Tlayekkan ika inmastlakapaluan kimpatlajtikatkaj. Kijtosneki, se imastlakapal on querubín kitelojtikatka on tepantli niman on okse querubín no kitelojtikatka ika sen imastlakapal on okse tepantli. Niman ika on okse iminmastlakapal, nokuayakanamiktikatkaj itlajkotian on kalijtik kampa Más Tlayekkan. 28 Kemaj okinalauilijkej oro on querubines.
29 No ijki, okixtejtekej on tepantli para okinmixneskayotijkej querubines, palmeras niman xochimej ipan nochi itepanuan, ijtik onTlayekkan niman ijtik on Más Tlayekkan. 30 Ipiso on ueyitiopan kampa Tlayekkan niman kampa Más Tlayekkan, no okalauilijkej oro.
31 No okichijchikej tsakuijlotl de ome hoja ikan kojtli* de olivo para okitlalij ikalakiyan kampa Más Tlayekkan. Imarco on tsakuijlotl nepantik makuilpa. Ixpan pitsauak niman para tlaijtik patlauakb. 32 On ome hoja de on tsakuijlotl, yejuan katkaj de olivojkojtli, okixneskayotijkej querubines, palmakojtin niman xochimej. Kemaj okinalauilijkej oro nochi on ixneskayomej.
33 Para ikalakiyan on ueyitiopan okintlalijkej kojtin* de olivo para imarco on tsakuijlotl. 34 On tsakuijlotl okipix ome hoja, niman tlachijchijtli katka ikan kojtli* de pino. On ome hoja ueliya nokuelpachouaya itlajkotian. 35 Ipan on tsakuijlomej okixneskayotijkej querubines, palmeras, niman xochimej. Niman kemaj nochi kuajli okinalauilijkej oro.
36 No okichijchikej on tepanchinantli yejuan ika okiyeualtsakukej on ikiauak on ueyitiopan. On tepanchinantli okichijchiu de yeyi pantli ikan temej yejuan tlaxintin, niman se pantli más tlapani okintekakej kojtin* ueueyakej de cedro yejuan tlaxintin, para ika okaxitij on tepanchinantli.
37 Ijkuak Salomón kipiyaya naui xipan ika okalak rey, ipan on metstli Ziv, okipeualtijkej kichijchiuaj icimiento* on iueyitiopan toTEKO, 38 Niman ijkuak Salomón kipiyaya majtlaktli uan se xipan ika okalak rey, ipan on metstli Bul, yejuan ika chikueyi metstli de on xipan, otlan kichijchiuaj on ueyitiopan iuan nochi tlajtlamach* itlajmachyo. Ipan chikome xipan, Salomón kuajli otlan kichijchiua on ueyitiopan.