Salomón okichijchiu on ueyitiopan
(1 R 6.1-38)
3
Salomón opeu kichijchiua iueyitiopan toTEKO ne Jerusalén, ipan on tepetl Moriah kampa toTEKO okinotitijkaj David, on itataj. David yokijtojka para ompa kichijchiuaskej on ueyitiopan, kampa Ornán, on jebuseo, kiteiniaya itrigo. 2 On ueyitiopan opeu kichijchiuaj ipan on ika ome tonajli de on ika ome metstli, ijkuak Salomón kuikaya naui xipan ika okalak rey.3 On cimientos* yejuan okitlalij Salomón para okichijchijkej on ueyitiopan ichkich in tlatemachijtli katka: 27 metros ika ueyak niman 9 metros ika patlauak. 4 On kalixpan yejuan okichijchijkej iyakapan on ueyitiopan kipiyaya 9 metros ika ueyak niman 9 metros ika patlauak, niman ika uejkapan no kipiyaya 9 metros. Salomón okalauilij oro yejuan más kuajli nochiuiyan ijtik ikalixpan on ueyitiopan. 5 Niman ijtik on ueyi kalijtik okitlapachoj on tepantli ikan tablas de pino. Kemaj okalauilijkej oro yejuan más kuajli, niman ipan okixneskayotijkej palmeras niman cadenas. 6 Niman kemaj okitlajmachyotijkej ikan temej yejuan kualtsitsimej para okualnextijkej. On oro yejuan okalauilijkej, katka yejuan más kuajli yejuan kisa iueyitlalpan Parvaim. 7 Ijkon tej, Salomón okalauilij oro nochiuiyan ijtik on ueyitiopan: ipan on tlapalokojtin, ipan ikiauatempanuan niman ipan itsakuijlouan. Niman ipan itepanuan on ueyitiopan okimixneskayotijkej querubines*.
8 No ijki, okichijchiu on kampa Más Tlayekkan, niman kipiyaya 9 metros ika ueyak, no ijki ken ika patlauak on ueyitiopan. Niman ika patlauak no kipiyaya 9 metros. Kemaj okalauilij oro yejuan más kuajli. On oro yejuan okalauilij, katka kanaj 20 mil kilos. 9 On clavos yejuan okintekitiltijkej katkaj de tlajko kilo cada se. No, okiminalauilij oro on kalijtikej yejuan tlakpak okinchijchijkej.
10 No ijki, salomón otlanauatij ma kinchijchiuakan omemej querubines para okintlalijkej ijtik on ueyitiopan kampa Más Tlayekkan. Niman on querubines no okiminalauilijkej oro. 11 Iminmastlakapaluan on omemej querubines katkaj 9 metros san se ueyi, pampa cada se kipiyaya ome metro ipan 25 centímetros. Se imastlakapal sen querubín notelojtikatka ipan itepan on kalijtik, niman on okse imastlakapal notelojtikatka iuan ikuayak imastlakapal on okse querubín. 12 No ijki, imastlapakapaluan on okse querubín, yejuan no ichkichmej katkaj ken imastlakapaluan on achtoj querubín, se no notelojtikatka iuan itepan on kalijtik, niman on okse imastlakapal no notelojtikatka iuan ikuayak imastlakapal on okse querubín. 13 Yejuamej in querubines yejuan iminmastlakapaluan katkaj 9 metros san se ueyi. Ijkatikatkaj, niman ontlachixtikatkaj kampaka onkaj on ueyi kalijtik. 14 No otlanauatij ma kichijchiuakan on yekcortina ikan tela yejuan morada, azul, chichiltik, niman tela de lino, niman okitlajmachyotijkej ikan querubines.
On ome pilar
(1 R 7.15-22)
15 Salomón no okichijchiu ome pilar yejuan kipiyaya kanaj 16 metros ika uejkapan para okitlalij ixpan on ueyitiopan. Iminkuatlajmachyo on pilares kipiyayaj ome metro ipan 25 centimetros ika uejkapan. 16 No, okinchijchiu cadenas yejuan katkaj ken koskatl, niman okintlalij inkuatipan on pilares. Niman no okinchijchiu 100 granadas para okintlalij ipan on cadenas. 17 On pilares okintlalij ixpan on ueyitiopan, se tlayekmakopa niman okse tlaopochmakopa. On pilar yejuan okitlalij tlayekmakopa okitokayotij Jaquín, niman on yejuan okitlalij tlaopochmakopa okitokayotij Boaz.